වැස්ස ප්‍රදේශ කිහිපයක් අවදානම් කරයි

අයහපත් කාලගුණික තත්ත්වය හේතුවෙන් මාතර දෙණියාය මොරවක කන්ද සහ කළුතර බුලත්සිංහල බෝහගවත්ත දෙල්පාවත්ත යන ප්‍රදේශ වල නායයෑම් වාර්තා වේ.

කැලණි ගඟේ ජල මට්ටම ඉහළ යෑම නිසා කොලොන්නාව, බියගම, කැළණිය, කඩුවෙල, දොම්පේ, හංවැල්ල, පාදුක්ක, සහ අවිස්සාවේල්ල ආශ්‍රිතව සුලු ගංවතුර අවධානමක් ප්‍රකාශයට පත් කර ඇති බව ආපදා කළමනාකරණය මධ්‍යස්ථානය පවසයි.

දිවයින පුරා වැසි සහිත කාලගුණ තත්ත්වයත් සමග ඇතිවිය හැකි ඕනෑම ආපදා තත්ත්වයකට මුහුණදීම සදහා සියලුම පොලිස් ස්ථාන දැනුවත් කිරිමට පොලිස් මූලස්ථානය පියවර ගෙන තිබේ.

ආපදාවට පත් වුවන්ට සහන සැලසීමට හා පීඩාවට පත්වුවන් ගලා ගැනීමට නාවික හමුදාව හා ගුවන් හමුදාව මෙහෙයුම් සදහා එක්ව ඇති බවද ආපදා කළමණාකරණ මධ්‍යස්ථානය සදහන් කළේ ය.

පවතින වැසි සහිත කාලගුණ තත්ත්වය අද දිනයේද බලාපොරොත්තු වන බව කාලගුණ විද්‍යා දෙපාර්තමේන්තුව සඳහන් කරයි.

සබරගමුවේ පාසල් වහයි

දිවයිනට බලපා ඇති අයහපත් කාලගුණික තත්ත්වය හේතුවෙන් සබරගමුව පළාතේ සියලු පාසල් වසා දැමීමට තීරණය කර ඇති බව ආපදා කළමණාකරණ මධ්‍යස්ථානය කියා සිටී.

දින තුනක සිට අඛණ්ඩව ඇදහැලෙන ධාරාණිපාත වර්ෂාව හේතුවෙන් පවතින අවදානම් තත්ත්වය මත මෙම පියවර ගත් බවයි එම මධ්‍යස්ථානය පෙන්වා දෙන්නේ.