ආණ්ඩුවේ වාහන අසූ දෙදාහකට වැඩියි

ශ්‍රී ලංකාවේ රජයේ ආයතන සතුව වාහන අසූ දෙදහසකට වැඩි ප්‍රමාණයක් පවතින බව හෙළි වී තිබේ.

ආර්ථික ප්‍රතිපත්ති හා සැලසුම් ක්‍රියාත්මක කිරීමේ අමාත්‍ය ලෙස අගමැති මහින්ද රාජපක්ෂ විසින් කැබිනට් මණ්ඩලයට දැනුම් දී ඇති පරිදි අමාත්‍යාංශ ඇතුළු රජයේ ආයතන, රාජ්‍ය ව්‍යාපාර සහ පළාත් සභා හා පළාත් පාලන ආයතන සතු වාහන 82194 ක් පවති.

රජය පවසන්නේ ඒ අතුරින් වාහන 76661 ක් ධාවන තත්වයේ පවතින අතර වාහන 5533 ක් ධාවනය කළ නොහැකි තත්වයේ පවතින බවයි.

ධාවනය කළ හැකි වාහන අතුරින් අමාත්‍යාංශ ඇතුළු රජයේ ආයතන සතුව වාහන 33931 ක් ද රාජ්‍ය ව්‍යාපාර සතුව වාහන 26395 ක් ද පළාත් සභා හා පළාත් ආයතන සතුව වාහන 16335 ක් ද පවති.

රජය වැඩි දුරටත් පවසන්නේ රාජ්‍ය ආයතනවල ජ්‍යෙෂ්ඨ නිලධාරීන් 8500කට පමණ මාසික දීමනාවක් ලබා දී ඔවුන්ගේ පෞද්ගලික මෝටර් රථ නිල ප්‍රවාහන පහසුකම් සලසා ගැනීම සදහා භාවිත කිරීම පිණිස අනුමැතිය ලබා දී ඇති බවයි.

මහින්ද රාජපක්ෂ අගමැතිවරයා විසින් ඉදිරිපත් කරන ලද ඉහත තොරතුරු සැලකිල්ලට ගෙන දැනට ධාවන තත්වයේ නොමැති වාහන අතුරින් අලුත්වැඩියා කළ හැකි වාහන කඩිනමින් අලුත්වැඩිවයා කර ප්‍රයෝජනයට ගැනීමටත්, අලුත්වැඩියා කළ නොහැකි වාහන විධිමත් ක්‍රමවේදය අනුගමනය කරමින් නොපමාව අපහරණය කිරීමටත් අගෝස්තු 23 වැනි දින පැවැති අමාත්‍ය මණ්ඩල රැස්වීමේදී තිරණය කළ බව රජය නිවේදනය කර තිබේ.