ජනපතිගේ සුජාත දරුවා අපචාරයට ලක් වෙලා

යහපත් සහ පිරිසිදු රාජ්‍ය පාලනයක් වෙනුවෙන් තමා විසින් බිහිකළ 19 වන සංශෝධනය නම් සුජාත දරුවා මේ වන විට අපචාරයට ලක්ව ඇති බව ජනාධිපතිවරයා ප්‍රකාශ කර තිබේ.

2015 ජනවාරි 08 වනදා සිය මැතිවරණ ප්‍රකාශය තුළින් මේ රටේ ජනතාවට ලබාදුන් පොරොන්දුව අනුව ඉතාමත් පිරිසිදු හා පාරිශූද්ධ චේතනාවෙන් මෙන්ම බලාපොරොත්තු රැසක් සමඟ ,පාර්ලිමේන්තුවේ 225 න් 215 දෙනෙකුගේම කැමැත්ත අනුව ආණ්ඩුක්‍රම ව්‍යවස්ථාවේ 19 වන සංශෝධනය නම් සුජාත දරුවා තමා විසින් බිහි කරන ලද බවයි ජනාධිපතිවරයා පෙන්වා දෙන්නේ.

19 වන සංශෝධනයට අනුව ව්‍යවස්ථා සභාව සහ ස්වාධීන කොමිෂන් සභා පත්කිරීමට කටයුතු කළ අතර එහි වගකිම්, ප්‍රතිපත්ති සහ මගපෙන්වීම පිළිබඳ 19 වන ව්‍යවස්ථා සංශෝධනයේ පැහැදිළිව සඳහන්ව තිබුණ ද එම කිසියම්ම කරුණක් මෙතෙක් ඉටු වී නොමැති බව ජනාධිපති මෛත්‍රීපාල සිරිසේන 21 බ්‍රහස්පතින්දා ව්‍යවස්ථා සභාව පිළිබඳ විවාදයට එක්වෙමින් පාර්ලිමේන්තුවේදී පැවසීය.

විධායක ජනාධිපති ධුරය පිළිබඳව පාර්ලිමේන්තුව විසින් ගන්නා තීරණයකට එකඟ බවද ජනාධිපතිවරයා ප්‍රකාශ කළේය.

” විධායක ජනපතිධුරය අහෝසි කිරිම මගෙ අතේ තිබෙන දෙයක් නෙමෙයි. එය සභාව තීරණය කළ යුතුයි. සභාව ගන්න තීරණයට මම එකඟයි. විධායක ජනපතිධුරය අහෝසි කිරිමට මගේ අකමැත්තක් නෑ. ” යි ජනපති පැවසීය.