නව ආණ්ඩුක්‍රම ව්‍යවස්ථාවක් සකස් කර ගැනීම සඳහා වන අතුරු වාර්තාව පිළිබඳ විවෘතව සාකච්ඡා කර හොඳ දේවල් තබා ගෙන ඉදිරියට යාමට සියලු දෙනා මැදිහත් විය යුතු බව මහාමාර්ග රාජ්‍ය අමාත්‍යවරය පවසයි.
රට බෙදීමට යෝජනා කර ඇති ආණ්ඩුක්‍රම ව්‍යවස්ථාවක් පිළිබඳව මත නිර්මාණය කරමින් රට ගිනි නොතියන ලෙස රාජ්‍ය අමාත්‍ය ඩිලාන් පෙරේරා ඉල්ලිමක් කළේය.
අතුරු වාර්තාවේ ඇත්තේ සියලුම දෙනා ඉදිරිපත් කර තිබෙන යෝජනා වන හෙයින් ඒ පිළිබඳ සාකච්ඡා කළ හැකි බව කී අමාත්‍යවරයා අතුරු ව්‍යවස්ථාවේද ඒකීය යන්න හැලී නොමැති බව මෙන්ම ඉතිහාසයේ ප්‍රථම වරට දෙමළ ජාතික සන්ධානයද ඒකීය යන්න පිළිගෙන ඇතැයි සඳහන් කළේ කොළඔ පැවති මාධ්‍ය හමුවකදීය.
එම එකඟතාවය රටක් ලෙස විශාල ජයග්‍රහණයක් බවයි හෙතෙම අවධාරණය කරන්නේ.
1995/97 හා 2000 යන වසර වල ජී.එල්. පීරිස් සැකසු නව ආණ්ඩුක්‍රම ව්‍යවස්ථාවක් සඳහා වන සැකැස්ම තුළ ඒකීය යන වචනය ඇතුළත් නොවුන බව සිහිකල අමාත්‍ය ඩිලාන් පෙරේරා මෙවර එවැන්නක් නොවී රටේ ඒකීයභාවය ආරක්ෂා කිරීමට හැකි වී ඇති බව ප්‍රකාශ කළේය.
ජනාධිපතිවරයා හා අගමැතිවරයා පොරොන්දු වූ පරිදි අතුරු වාර්තාව තුළ රටේ ඒකීයභාවයට හෝ බුද්ධාගමට හානියක් කර නොමැති බව අමාත්‍ය ඩිලාන් පෙරේරා වැඩිදුරටත් පැවසීය.
Facebook Comments
