පර්පෙචුවල් ට්‍රෙෂරීස් සමාගමේ අධ්‍යක්ෂ අර්ජුන් ඇලෝසියස් සහ එහි ප්‍රධාන විධායක නිලධාරි කසුන් පලිසේන ලබන 16 වනදා දක්වා යළි රක්ෂිත බන්ධනාගාර ගත කළ අතර ඔවුන්ගේ ඇප ඉල්ලීම සලකා බැලීම මේ මස 07 වනදා දක්වා කල් දමා තිබේ.
මහ බැංකු බැඳුම්කර වංචාවට සැක පිට 04 වනදා අත්අඩංගුවට ගත් ඔවුන් දෙදෙනා 05 සඳුදා කොළඹ කොටුව මහේස්ත්‍රාත් ලංකා ජයරත්න වෙත ඉදිරිපත් කල අවස්ථාවේදී මෙම නියෝගය නිකුත් කර ඇත.
සැකකරුවන් වෙනුවෙන් පෙනී සිටි ජනාධිපති නීතිඥ කාලිංග ඉන්ද්‍රතිස්ස අධිකරණයෙන් ඉල්ලා සිටියේ අදාළ චෝදනා පොදු දේපල පනතේ හෝ දණ්ඩ නීති සංග්‍රහයේ සාවද්‍ය මුදල් පරිහරණය යන චෝදනා යටතේ ඉදිරිපත් කර නොමැති බැවින් ඇප ලබා දෙන ලෙස ඉල්ලීමක් කරන ලදී.
දින දෙකක් තුළ ඇප ඉල්ලීම සඳහා වන යෝජනා ලිඛිතව ලබා දෙන ලෙස නියෝග කළ කොටුව ප්‍රධාන මහේස්ත්‍රාත් ලංකා ජයරත්න මෙනවිය ලබන 07 වනදා ඇප ඉල්ලීම සලකා බැලීමට නියෝග කළේය.
Facebook Comments
