ශ්‍රී ලංකාවේ මරණ දඬුවම ක්‍රියාත්මක කිරීම හකුලා ගන්නා ලෙස බල කරන මුල්ම ජාත්‍යන්තර විරෝධය බුදුරජාණන් වහන්සේ ජන්ම භූමියෙන් දියත් කර තිබේ.
ඇම්නස්ටි ජාත්‍යන්තරයේ නේපාල ශාඛාවේ මෙහෙයවීමෙන් මානව හිමිකම් සංවිධාන ගණනාවක් එක්ව කත්මන්ඩු අගනුවර ශ්‍රී ලංකා තානාපති කාර්යාලය ඉදිරිපිට පවත්වන ලද උද්ඝෝෂණයකින් අනතුරුව සිය විරෝධය ජනාධිපති මෛත්‍රිපාල සිරිසේන වෙත ලියා දන්වන සංදේශයක්ද ක්‍රියාධාරීන් විසින් තානාපතිනි ස්වර්ණා පෙරේරා වෙත භාර දෙන ලදී.
“කුරිරු හා අමානුෂික මරණ දඬුවම යොදා ගැනීම නූතන සමාජය ලැජ්ජාවට පත් කරන්නකි,” යි ජනපතිට යැවීමට බාර දුන් සංදේශයේ දැක්වේ.
මානව හිමිකම් රැකීම සඳහා වන ජාත්‍යන්තර වගකීම් ශ්‍රී ලංකාවේ ආණ්ඩුවට සිහිපත් කරදීම ද තම උද්ඝෝෂණයේ එක් අරමුණක් බව නේපාල ඇම්නස්ටිය පවසයි.
බුදුරජාණන් වහන්සේගේ උපත සිදුවූ බවට විශ්වාසයෙන් ශ්‍රී ලාංකිකයන් වන්දනා ගමන් යන ලුම්බිණි සාල වන අඩවිය පිහිටා ඇත්තේ බහුතරයක් හින්දු බැතිමතුන් ජිවත් වන නේපාලයේය.
Facebook Comments
