පාස්කු ඉරිදා ප්‍රහාරයෙන් පසුව සිදු කරන නීතිවිරෝධි අත් අඩංගුවට ගැනීම නවතාලන ලෙස ශ්‍රී ලංකා මානව හිමිකම් කොමිසම වැඩ බලන පොලිස්පතිවරයා වෙත අවවාද කර තිබේ.
“කටකතා මත පමණක් පදනම් වී අත් අඩංගුවට නොගත යුතුයි” යනුවෙන් කොමිසම වැඩබලන පොලිස්පති චන්දන වික්‍රමරත්නට මානව හිමිකම් කොමිසම යවන ලද ලිපියේ සඳහන් වේ.
“නීති විරෝධී අත් අඩංගුවට ගැනීම් සම්බන්ධයෙන් කොමිසමට මෑතදී පැමිණිළි ගණනාවක්ම ලැබී ඇතැ,” යි ලියන සභාපතිනි දීපිකා උඩගම, ඒ පැමිණිලි වල සඳහන් පරිදි ඇතැම් අත් අඩංගුවට ගැනීම් “සංස්කෘතික වරදවා වටහා ගැනීම්” හෝ අවිනිශ්චිත භාවය හෝ හේතුකොටගෙන ද, තවත් ඒවා මහජනතාව සැක පහල කිරීම නිසාද සිදු කර ඇතැ’යි පවසන්නීය.
“උදාහරණයක් ලෙස ගතහොත්, එක් කාන්තාවක් අත් අඩංගුවට ගෙන ඇත්තේ ඇගේ ඇඳුමේ තිබූ ලාංඡනයක් අවුස්සන සුලුයැයි උපකල්පනය කිරීම නිසාය; තවත් අවස්ථාවල අරාබි ග්‍රන්ථ ළඟ තබා ගැනීම නිසා පුද්ගලයන් අත් අඩංගුවට ගෙන ඇත්තේ ඒවායේ අන්තර්ගතය කුමක්දැයි නිර්ණය නොකර ය.”
මෑතදී මහත් ආන්දෝලනයට තුඩුදුන් කුරුණෑගල ජ්‍යෙෂ්ඨ නේවාසික වෛද්‍ය නිලධාරී මොහොමඩ් ශාෆි සම්බන්ධ පොලිස් පරීක්ෂණද පැවැත්වුනේ ජනමාධ්‍ය සහ බෞද්ධ භික්ෂුන් වහන්සේ විසින් එල්ල කරන ලද “වඳ සැත්කම්” චෝදනාවලට ඔහු අත් අඩංගුවට ගැනීමෙන් අනතුරුව බව අධිකරණයේදී හෙළි විය.
රහස් පොලිසිය පිටු 210 ක වාර්තාවක් ඉදිරිපත් කරමින් කුරුණෑගල මහේස්ත්‍රාත් අධිකරණයට පසුගිය 27 දා වාර්තා කළ පරිදි වෛද්‍යවරයාට එරෙහි චෝදනා සනාථ කිරීමට සාක්ෂි නැත.
පොලිස් ප්‍රකාශක රුවන් ගුණසේකර ජූනි මාසයේ මාධ්‍යවේදීන්ට කියා සිටියේ පාස්කු ප්‍රහාරයට සැකපිට අත් අඩංගුවට ගන්නා ලද 423 ක් රිමාන්ඩ් ගත කර සිටින අතර තවත් 211 ක් වෙනත් පොලිස් ස්ථානවල රඳවාගෙන ප්‍රශ්න කරනු ලැබේ.
අත් අඩංගුවට ගැනීම නීත්‍යානුකුල වීම සඳහා පිළිපැදිය යුතු චර්යාධර්ම කිහිපයක් මානව හිමිකම් කොමිසම් ලිපියෙන් පොලිසියට නිර්දේශ කර ඇත.
Facebook Comments
