සෞඛ්‍ය අමාත්‍යවරයා විසින් අත්තනෝමතික ආකාරයෙන් මහාචාර්ය කාලෝ ෆොන්සේකා ශ්‍රී ලංකා වෛද්‍ය සභාවේ සභාපති ධූරයෙන් ඉවත් කිරීමට කටයුතු කළහොත් වහාම අඛණ්ඩ වැඩ වර්ජනයක් කැඳවන වන බවට රජයේ වෛද්‍ය නිලධාරීන්ගේ සංගමය අනතුරු අඟවයි.
වෛද්‍ය සභාවේ සභාපතිවරයා පත් කිරීමේ බලය සෞඛ්‍ය අමාත්‍යවරයාට පැවරුණ ද ඉවත් කිරීමේ බලය අමාත්‍යවරයාට නොමැති බවයි රජයේ වෛද්‍ය නිලධාරීන්ගේ සංගමයේ ලේකම් වෛද්‍ය හරිත අලුත්ගේ පෙන්වා දෙන්නේ.
කෙසේ වෙතත් මේ වන විට සෞඛ්‍ය අමාත්‍ය රාජිත සේනාරත්න විසින් සයිටම් හිතවාදී පුද්ගලයෙකු සභාපතිධූරය සඳහා පත්කිරීමට සූදානම් වන බවට වාර්තා පළ වී ඇති බව වෛද්‍ය හරිත අලුත්ගේ පවසයි.
මහාචාර්ය කාලෝ ෆොන්සේකා තවදුරටත් වෛද්‍ය සභා සභාපති ධූරයේ සිටිය යුතු බවට සිය සංගමය විසින් මහනාහිමිවරුන්, අගරදගුරුතුමන්, ජනාධිපතිවරයා සහ අග්‍රමාත්‍ය දැනුවත් කර ඇති අතර ඒ සම්බන්ධයෙන් එම පාර්ශවල එකඟතාව පළ වී ඇති බවද වෛද්‍ය හරිත අලුත්ගේ අනාවරණය කළේය.
පසුගියදා සැලසුම් කර තිබු වර්ජනය මහනාහිමිවරුන් සහ අගරදගුරුතුමන් සිදුකළ ඉල්ලීම් සැලකිල්ලට ගනිමින් අත්හිටුවුවද වෛද්‍ය ආඥා පනත උල්ලංඝණය කරමින් රෝගීන් අපහසුතාවයට පත් කිරීමට සෞඛ්‍ය අමාත්‍යවරයාට ඉඩ ලබාදිය නොහැකි බවයි ඔහු අවධාරණය කරන්නේ.
ඒ අනුව මහාචාර්ය කාලෝ ෆොන්සේකාගේ තනතුරට වෙනත් පුද්ගලයෙකු පත් කළහොත් වහාම දීපව්‍යාප්ත අඛණ්ඩ වැඩ වර්ජනයක් ආරම්භ කරන බව රජයේ වෛද්‍ය නිලධාරීන්ගේ සංගමයේ ලේකම්වරයා වැඩිදුරටත් කියා සිටියේය.
Facebook Comments
