ශ‍්‍රී ලාංකේය සාහිත්‍ය ක්ෂේත‍්‍රය පෝෂණය කිරීමට උරදුන් ලේඛක ලේඛිකාවන් ස්වකීය විශිෂ්ට නිර්මාණ දායකත්වයෙන් කළ සේවාව අගය කරමින් රාජ්‍ය සම්මානයෙන් පිදුම් ලැබූහ.
රාජ්‍ය සාහිත්‍ය සම්මාන උලෙළ 2018 ජනාධිපති මෛත්‍රීපාල සිරිසේනගේ ප්‍රධානත්වයෙන් 11 අඟහරුවාදා කොළඹ බණ්ඩාරනායක ජාත්‍යන්තර සම්මන්ත‍්‍රණ ශාලවේ දී පැවැත්විණි.
ශ‍්‍රී ලාංකේය සාහිත්‍ය ක්ෂේත‍්‍රයට අනුපමේය සේවාවක් කළ සිංහල, ඉංග්‍රීසි හා දෙමළ මාධ්‍ය සාහිත්‍ය නිර්මාණකරුවන් තිදෙනෙකුට ජීවිතයේ එක්වරක් පමණක් පිදෙන “සාහිත්‍ය රත්න” ගෞරව සම්මානය පිළිගැන්විම ජනාධිපතිවරයා අතින් සිදු විය.
සිංහල මාධ්‍ය වෙනුවෙන් මහාචාර්ය කේ. එන්. ඕ ධර්මදාසද, දෙමළ මාධ්‍ය වෙනුවෙන් එම්. පොන්නම්බලම් සහ ඉංග්‍රීසි මාධ්‍ය වෙනුවෙන් මහාචාර්ය ගනනාත් ඔබේසේකර එම සම්මානයෙන් පිදුම් ලැබුහ.
ගනනාත් ඔබේසේකර වෙනුවෙන් ඔහුගේ දියණිය මහාචාර්ය නලනිකා ඔබේසේකර සම්මානය ලබාගත්තා ය.
රාජ්‍ය සාහිත්‍ය උපදේශක මණ්ඩලය, ශ‍්‍රී ලංකා කලා මණ්ඩලය, සංස්කෘතික කටයුතු දෙපාර්තමේන්තුව සහ උසස් අධ්‍යාපන හා සංස්කෘතික කටයුතු අමාත්‍යාංශය එක්ව සංවිධාන කරන සම්මාන උළෙල මෙවර පැවැත්වුණේ 61 වන වරට ය.
Facebook Comments
