දෙමළ ජනයාගේ ප්‍රධානතම ඉල්ලීම් හයක් මුල් කර ගනිමින් දෙවන වතාවටත් ‘දෙමළ පිබිදීම’ බහුජන උද්ඝෝෂණය යාපනයේ පැවැත්වීමට කටයුතු සුදානම් කර තිබේ.
දෙමළ මහජන කවුන්සිලය විසින් සංවිධානය කරන විරෝධතා රැළියට දෙමළ දේශපාලන පක්ෂ, සිවිල් සමාජ සංවිධාන, වෘත්තීය සමිති, විශ්ව විද්‍යාල සිසුන්, අතුරුදහන් වූවන්ගේ පවුල්, ආගමික නායකයන්, විද්වතුන්, යුද්ධයට ගොදුරු වූ කණ්ඩායම් ඇතුළු විශාල පිරිසක් සහභාගි වීමට නියමිත බවයි සංවිධායකයින් පවසන්නේ.
දෙමළ නිජබිමෙහි සිංහල ජනපදකරණය නතර කිරීම, ජාත්‍යන්තර යුක්තියට මුහුණ දීම සඳහා ශ්‍රී ලංකා යුද අපරාධකරුවන් ගෙන ඒම, සියලුම දෙමළ දේශපාලන සිරකරුවන් නිදහස් කිරීම, අතුරුදහන් වූවන් පිළිබඳව අපක්ෂපාතී, ජාත්‍යන්තර පරීක්ෂණයක් පැවැත්වීමට ක්ෂණික පියවර ගැනීම, දෙමළ ප්‍රදේශ හමුදාකරණය නතර කිරීම, යුද්ධය හේතුවෙන් අවතැන් වූ සියලු දෙනා ඔවුන්ගේ මුල් ස්ථානවල නැවත පදිංචි කිරීමට පියවර ගැනීම යන මුලික ඉල්ලීම් හය ඉටු කරන ලෙස රජයට බල කරමින් විරෝධතාවය සංවිධානය කර ඇත.
‘දෙමළ පිබිදීම’රැළිය විශාල ජනකායකගේ සහභාගිත්වයෙන් සැප්තැම්බර් 16 සඳුදා උදෑසන 10.00ට යාපනෙය්දී පැවැත්වීමට කටයුතු සුදානම් කර තිබේ.
යාපනයේ පැවැත්වෙන ‘දෙමළ පිබිදීම’රැළියට සහාය පිණිස ලොව පුරා රටවල් කිහිපයක ද විරෝධතා සංවිධානය කර ඇති බවයි සංවිධායකයින් වැඩි දුරටත් නිවේදනය කරන්නේ.
2016 වසරේදී මෙවැනිම උද්ඝෝණයක් යාපනයේදී පැවැත්වු අතර වසර කිහිපයක් තිස්සේ දෙමළ ජනතාව වෙනුවෙන් රජය හමුවේ ප්‍රකාශ කළ අදහස් සිංහල ජනතාව වෙත ඉදිරිපත් කිරීම ‘දෙමළ පිබිදීම’ බහුජන උද්ඝෝෂණයේ ප්‍රධාන අරමුණක් බව උතුරේ හිටපු මහ ඇමැති සී.වී විග්නේස්වරන් එහිදී කියා තිබුනි.
Facebook Comments
