ඉදිරි ජනපතිවරණය ජය ගන්නා තැනැත්තාගේ ප්‍රමුඛතම වගකීම වනුයේ ජාතිවාදය තුරන් කර රට එක්සත් කිරිම බව බලය බෙදීම වෙනුවෙන් පෙනි සිටින වාමාංශික නායකයකු ප්‍රකාශ කර තිබේ.
“ජනාධිපතිවරණයෙන් ජය ගන්න තැනැත්තා පැහැදිලිවම තමන්ගේ මනස යොමු කළ යුත්තේ ජාතිවාදි, ආගම්වාදි ප්‍රශ්න නිසා බෙදිලා ඉන්න මේ සමාජය ඉහලම තැනින් එක්සත් කර ගන්නෙ කොහොමද කියලා,” යැයි නව සම සමාජ පක්ෂ නායකයා කියා සිටියේය.
ලෝකයටම පිලිගත හැකි ආකාරයට ප්‍රශ්න විසඳමින් පොදුවේ ජාතිකත්වයක් ලබා ගත යුතු බව පෙන්වා දුන් ආචාර්ය වික්‍රමබාහු කරුණාරත්න එසේ නොමැතිව රටේ අස්ථාවරත්වය නැති කළ නොහැකි බවට අනතුරු ඇඟවීය.
13 ව්‍යවස්ථා සංශෝධනය පුළුල් ලෙස ක්‍රියාත්මක කරමින් ස්ව පාලනයක් හා ස්වයං තීරණ අයිතිය ඇති කිරිම හරහා රට එක්සත් කළ හැකි බව නව සම සමාජ පක්ෂ නායකයා කියා සිටියේ ඔහු විසින් රචනා කරන ලද “අභිධර්මය, ජිවිත පරිත්‍යාගය හා ඉස්ලම් ආගම” කෘතිය එළි දැක්විමෙන් අනතුරුව මාධ්‍ය අමතමිනි.
පුළුල් බලය බෙදීමක් මඟින් රට එක්සත් කරන ජනාධිපතිවරයෙකු ඉතිහාසය තුළ විශාල නායකයකු වන බව ද නව සම සමාජ පක්ෂ නායකයා ආචාර්ය වික්‍රමබාහු කරුණාරත්න වැඩි දුරටත් සඳහන් කළේය.
Facebook Comments
