ජනාධිපතිවරයා විසින් කැඳවා තිබු පාර්ලිමේන්තුව එය නොකරම හදිසියේ විසුරුවා හැර තිබේ.
පාර්ලිමේන්තුව විසුරුවා හැරීමට පෙර මහින්ද රාජපක්ෂගේ නායකත්වයෙන් යුතුව ව්‍යවස්ථා විරෝධීව පිහිටුවා ගත් භාරකාර ආණ්ඩුවේ කැබිනෙට්ටුව සම්පුර්ණ වශයෙන් දිවුරුම් දුන් අතර රජයේ මුද්‍රණාලයද ආරක්ෂක අමාත්‍යංශය යටතට පවරා ගන්නා ලදී.
නොවැම්බර් 09 වනදා මධ්‍යම රාත්‍රීයේ සිට පාර්ලිමේන්තුව විසුරුවා හැරීමට ජනාධිපතිවරයා ගත් තීරණය ගැන ඔහු විසින්ම පිහිටුව ගත් කැබිනෙට්ටුවෙන් හෝ අදහස් නොවිමසා ඇති බවටයි වාර්තා වන්නේ.
ජනාධිපතිවරයා විසින් තම කැමැත්ත පරිදි මහින්ද රාජපක්ෂ අගමැති ධුරයට පත් කිරිමෙන් අනතුරුව නොවැම්බර් 16 දක්වා වාර අවසාන කර කල් තබන ලද පාර්ලිමේන්තුව මේ මස 14 වනදා කැඳවීමට දින නියම කර තිබුණි.
මහින්ද රාජපක්ෂ අගමැති ධුරයට පත් කිරීම අනුමත කර ගැනීමට පාර්ලිමේන්තු බහුතරය ලබා ගැනීමට දැරූ උත්සාහය අසාර්ථක වීම හේතුවෙන් මෙසේ පාර්ලිමේන්තුව විසුරු හැර ඇති බවටයි දේශපාලන ආරංචි මාර්ග පවසන්නේ.
19 වන ව්‍යවස්ථාවට අනුව තම තනි කැමැත්ත පරිදි පාර්ලිමේන්තුව විසුරුවා හැරීමට මේ මොහොතේ ජනපති හට බලතල නොමැති බවට පෙන්වා දෙන නීතිවේදීන් ඒ හරහා තවත් ව්‍යවස්ථා අර්බුදයක් නිර්මාණය වනු ඇති බවට සැක පල කරයි.
කෙසේ වෙතත් ජනාධිපතිවරයා විසින් පාර්ලිමේන්තුව විසුරුවා හැරීමට ගත් තීරණයට විරුද්ධව එක්සත් ජාතික පක්ෂය ශ්‍රේෂ්ඨාධීකරණයට යාමට තීරණය කර ඇති බවයි වාර්තා වන්නේ.
Facebook Comments
