මහින්ද රාජපක්ෂ පාලනයේදී පොලිස්පති පුජිත් ජයසුන්දර කොළඹින් ඉවත් කර කුරුණෑගල ප්‍රදේශය භාර දුන්නේ ඔහු සුදු වෑන් කල්ලියක් පිළිබඳව හෙළිකර ගත් නිසා බව වාමාංශික නායකයෙක් මුල් වරට ප්‍රසිද්ධියේ ප්‍රකාශ කර තිබේ.
තමන් මැදිහත්ව සුදු වෑන් පැහැර ගැනීමක් ගැන එවක කොළඹ බාර නියෝජ්‍ය පොලිස්පතිවරයා වෙත කළ දැනුම් දීමක් අනුව ඔහු එම පැහැර ගැනිමේ කල්ලිය හසු කර ගත් බව හා ඔවුන් රජයේ ආරක්ෂ හමුදා සාමාජිකයින් බවට හඳුනා ගත් බව නව සම සමාජ පක්ෂ නායකයා කොළඹ පැවති මාධ්‍ය හමුවක දී පවසා ඇත.
දෙමළ තරුණියක් තමන් වෙත කරන ලද දැනුවත් කිරීමකට අනුව පැහැර ගැනීමක් සම්බන්ධව තමන් එවක කොළඹ බාර නියෝජ්‍ය පොලිස්පති පුජිත් ජයසුන්දර දැනුවත් කළ බවත් ඔහු වහාම ක්‍රියාත්මක වී ඔවුන් ව්‍යවර්ථ කළ බව ආචාර්ය වික්‍රමබාහු කරුණාරත්න පැවසීය.
“පුජිත ජයසුන්ද තමයි ඒ අවස්ථාවේ කොළඹ DIG විදියට හිටියේ එතුමා වහාම ක්‍රියාත්මක වෙලා මගේ යටතේ සුදු වෑන් කාරයෝ ඉන්න පුලුවන් කමක් නෑ කියලා ඇත්තටම ගිහින් ඔහු අල්ල ගත්තා කවුද මේ තර්ජනය කරන කෙනො කියලා. බැලුවාම හමුදා නිලධාරියෙක්. පහල මට්ටමේ නිලධාරියෙක් සහ තවත් කෙනෙක්.”
කෙසේ වෙතත් එම පුද්ගලයින් අත් අඩංගුවට නෙගෙන අත් හැරීමට පුජිත් ජයසුන්දර සිදුවු බව කී නසසප නායකයා ඊට පසු දිනම ඔහුව කුරූණෑගලට මාරු කර යැවු බව ද කියා සිටියේය.
සුදු වෑන් සංස්කෘතියක් නොව විකෘතියක් බව අවධාරණය කළ අචාර්ය වික්‍රමබාහු තමන් ඒ පිළිබඳව අත්දැකීමෙන්ම දන්නා බවයි සඳහන් කළේ.
සිංහල අතුරුදහන්
සිංහල තරුණයක් පැහැර ගන්නා විට කෝප වී ඊට එරෙහි වු වත්මන් අගමැති මහින්ද රාජපක්ෂ තම පාලන කාලයන් තුල අනෙක් ජාතින්ගේ මැනව හිමිකම් කඩවීම පිළිබඳව නොතාක හැර ඒ ගැන කතා කරන පුද්ගලයින් පීඩාවට ලක් කරන ලද බවටයි ආචාර්යවරයා චෝදනා කරන්නේ.
එක්සත් ජාතික පක්ෂ පාලන සමයේදී දකුණේ සිංහල තරුණයන් මරා දැමීමට හා අතුරුදහන් කරවීමට කොළඹ සිට කතරගම දක්වා දියත් කළ පාද යාත්‍රාව පිළිබඳව මහින්ද රාජපක්ෂ හට සිහිපත් කර ආචාර්ය වික්‍රමබාහු “මේ වෙලාවේ සිංහල නොවන දොමළ හෝ මුස්ලිම් හෝ වෙනයම් අයට වෙන මානව අයිතිවාසිකම් උල්ලංඝනයන් ගැන ඔබතුමාට කැක්කුමක් නැති බවයි පෙන්නේ. ඒ විතරක් නෙමෙයි ඒ ගැන කතා කරන අයත් අල්ලා හිර ගෙවල් වල දාන්න හදනවා. අපි බලමුකො ඔබතුමා අපිවත් හිර ගෙවල් වල දානව ද කියලා.”
සුදු වෑන් පිළිබඳව කරන ලද හෙළිදරව්වක් නිසාවෙන් බන්ධනාගාර ගත කර සිටින රාජිත සේනාරත්න ද එවක දී මහින්ද රාජපක්ෂ සමඟ එක්ව පැහැර ගැනීම හා අතුරුදහන් කරවීම් වලට එරෙහිව සටන් වැඳුනේය.
රාජිත සේනාරත්න හිටපු ඇමැතිවරයා හිර කොට සුදු වෑන් විකෘතිය ක්‍රියාත්මක කරමින් යන ගමන වහාම නවතා දමන ලෙස නව සම සමාජ පක්ෂ නායක ආචාර්ය වික්‍රමබාහු කරුණාරත්ත වැඩි දුරටත් ඉල්ලා සිටියේය.
Facebook Comments
