විධායකය සහ අධිකරණය අතර ගැටුම තීව්‍ර කරමින් ජනාධිපති කොමිසම හමුවේ පෙනී නොසිටින බව නීතිපතිවරයා දන්වා තිබියදී විනිසුරු නියෝග නොතකා සිටි එම කොමිසමේ ලේකම්වරිය වරෙන්තු නිකුත් වීමෙන් පසු උසාවියට බාරවී තිබේ.
දේශපාලන පළිගැනීම් පිළිබඳව සොයා බැලීම සඳහා පත් කර තිබෙන ජනාධිපති කොමිසමේ ලේකම්වරිය පර්ල්.කේ. විරසිංහ උසාවි කැඳවීමට නීතිපතිවරයා ගත් තීරණය වීමසීම සඳහා කොමිසම හමුවේ පෙනී සිටින ලෙස ඔහුට දන්වා තිබුනි.
ඊට ප්‍රතිචාර දක්වමින් නීතිපති දප්පුල ලිවේරා තමා කැඳවීමට අධිකරණ හෝ අධිකාරි බලයක් ජනපති කොමිසමට නැති බව දැනුම් දුන් බව නීතිපති දෙපාර්තුමේන්තුව පවසයි.
නීති විරෝධී ලෙස අලි ඇතුන් පස් දෙනකු සන්තකයේ තබා ගෙන ජාවාරම් කිරීම සම්බන්ධයෙන් සමරප්පුලිගේ නිරාජ් රොෂාන් හෙවත් අලි රොෂාන් නමැත්තාට එරෙහිව ගොනුකර තිබෙන නඩුව සම්බන්ධව කරුණු දැක්වීමට කොමිසමේ ලේකම්වරියට අධිකරණයේ පෙනී සිටින්නැයි මීට පෙර දැනුම් දෙන ලදී.
එහෙත් එම දැනුම් දීමට අනුව ඇය අධිකරණය හමුවේ පෙනී නොසිටි අතර ඇය නොඑන බව ද දන්වා නොතිබු හෙයින් එය අධිකරණයට කරන ලද අපහාසයක් ලෙස සලකා ලේකම්වරිය අත් අඩංගුවට ගැනීමට වරෙන්තු නිකුත් කළේය.
පළමු වරෙන්තුවට ජනාධිපති කොමිසමේ ලේකම්වරිය පර්ල්.කේ. විරසිංහ අත් අඩංගුවට ගැනීමට නොහැකි වීම නිසාවෙන් 10 අඟහරුවාදා නැවතත් වරෙන්තු නිකුත් කරන ලදී.
කෙසේ වෙතත් සිය නීතිඥවරුන් මාර්ගයෙන් 11 බදාදා දේශපාලන පළිගැනීම් පිළිබඳව සොයා බැලීම සඳහා පත් කර තිබෙන ජනාධිපති කොමිසමේ ලේකම්වරිය කොළඹ ත්‍රිපුද්ගල මහාධිකරණයට බාර වී තිබේ.
නිතිඥ සෙනරත් ජයසුන්දර මගින් අදාල ලේකම්වරිය අද දහවල් විකුම් කළුආරච්චි, ධම්මික ගනේපොල සහ ආධිත්‍යය පටබැඳිගේ යන මහාධිකරණ විනිසුරු මඩුල්ල හමුවට ඉදිරිපත් කෙරුණ ඇය අධිකරණය විසින් ඉල්ලා සිටින ලේඛන සියල්ල භාරදීමට තම සේවාදායකයා සූදානම් බව කියා ඇත.
ඒ අනුව අදාළ ලේඛන සියල්ල 12 බ්‍රහස්පතින්දා රහස් පොලිසිය වෙත බාර දෙන්නයි නියෝග කළ අධිකරණය ඇය වෙනුවෙන් නිකුත් කළ වරෙන්තුව ආපසු කැඳවන බවද සඳහන් කළේය.
සාමාන්‍ය වරෙන්තු කළ පුද්ගලයෙකුට අදාළ වරෙන්තුව ආපසු කැඳවීමේ දී බැඳුම්කරයක් නියම කරනු ලැබුවත් ජනාධිපති පරීක්ෂණ කොමිසමට තිබෙන ගරුත්වය සහ ලේකම්වරිය අධිකරණයට ඉදිරිපත් වීම සැලකිල්ලට ගෙන එවැනි බැඳුම්කරයක් නියම නොකරන බව ත්‍රිපුද්ගල විනිසුරු මඩුල්ලේ සභාපති විනිසුරු විකුම් කළුආරච්චි කියා සිටියේය.
Facebook Comments
