රට පුරා එළවළු බෙදාහැරීම කාර්යක්ෂම කිරීම සඳහා ලොරි රථ වෙනුවට දුම්රිය මාර්ග පද්ධතිය යොදා ගන්නා ලෙස ගොවි නායකයකු රජයට යෝජනා කර තිබේ.
රටේ පවතින කොරෝනා වසංගත තත්වය හේතුවෙන් ධාවනය අත්හිටුවා ඇති දුම්රිය මාර්ග පද්ධතිය යොදාගෙන එළවළු ප්‍රවාහනය කිරීම ආරම්භ කරන ලෙසයි සමස්ත ලංකා ගොවිජන සම්මේලනයේ ජාතික සංවිධායක නාමල් කරුණාරත්න ආණ්ඩුවට යෝජනා කර ඇත්තේ.
දඹුල්ල ආර්ථික මධ්‍යස්ථානය අප්‍රේල් 7 දින සිට දින නියමයක් නොමැතිව වසා දැමීමට ආණ්ඩුව තීරණය කර තිබු අතර එම තීරණය ප්‍රකාශයට පත් කරන විටත් එළවළු රැගෙන දඹුල්ල ආර්ථික මධ්‍යස්ථානය වෙත පැමිණෙමින් සිටි ගොවි ජනතාව මුහුණ පා සිටින ගැටළු සම්බන්ධයෙන් සොයා බැලිමට ගොවි නායකයා එම ස්ථානයට ගොස් තිබුනි.
පුර්ව දැනුම් දීමක් නිසි අයුරින් සිදු නොකර දඹුල්ල ආර්ථික මධ්‍යස්ථානය වසා දැමීමට ආණ්ඩුව ගත් තීරණය නිසා ගොවි ජනතාව විශාල අසරණතාවයකට පත්ව සිටින අයුරු පෙන්වා දුන් ගොවි නායකයා සදහන් කළේ ගොවි ජනතාව සතු එළවළු පාරිභෝගිකයා අතටම ලැබෙන ආකාරයේ යාන්ත්‍රණයක් රජය විසින් සකස් කළ යුතු බවයි.
මරිමෝඩ තීරණ
දඹුල්ල ආර්ථික මධ්‍යස්ථානය වසා දැමීමට ආණ්ඩුව ගත් තීරණයට සිය මුහුණු පොතෙන් විරෝධය පළකරන පළාත් තුනක ආණ්ඩුකාර ධුරය දැරූ රජිත් කීර්ති තෙන්නකෝන් පවසා තිබුනේ “මරිමෝඩ තීරණ එළවළු වෙළදාම විනාශ කළා. ආර්ථික මධ්‍යස්ථාන වැසීම ගොවියා, පාරිභෝගිකයා එකවර විනාශයක්!” යනුවෙනි.
විශාල පිරිසක් ඒකරාශි වීම කොරෝනා මර්දනයට බාධාවක් ලෙස සලකා ආර්ථික මධ්‍යසථාන වසා දැමීමට ආණ්ඩුව තීරණය කර තිබුනද නාමල් කරුනාරත්න එහිදී පෙන්වා දී තිබුනේ විශාල වශයෙන් ලොරි රථ ආර්ථික මධ්‍යස්ථාන වෙත සේන්දුවීම වැළැක්වීම සඳහා දුම්රිය මාර්ග පද්ධතිය යොදාගෙන එළවළු ප්‍රවාහණය ආරම්භ කළ යුතු බවයි.
“අවුරුදු ඉල්ලක් කරගෙන ගොවියෝ විශාල ප්‍රමාණයක් වගා කරලා තියනවා. රජයේ වාහන විශාල ප්‍රමාණයක් තියනවා. ඒ වාහනත් යොදාගෙන ගොවි සංවිධානත් සම්බන්ධකරගෙන මේ යාන්ත්‍රණය අපි හදමු”
” අපි අළුත් යෝජනාවක් ගේනවා විශේෂයෙන්ම මේ වෙන කොට කෝච්චි දුවන්නේ නෑ. කෝච්චි නිකන් තියෙන්නේ. හැම ස්ටේෂන් එකකම කිරන යන්‍ත්‍ර තියනවා. බඩු ප්‍රවාහනය කරන යාන්ත්‍රණයක් තියනවා”
” යාපනයේ සිට හම්බන්තොට දක්වා එළවළු එහාට මෙහාට ගෙනියන්නත්, මඩකලපුව, ත්‍රිකුනාමලයේ සිට කොළඹ, මාතර එක්වා එහාට මෙහාට ගෙනියන්නත් , උඩරට එළවළු බදුලු කෝචිචිය හරහා එහාට මෙහාට ගෙනියන්නත් , හලාවත එළවළු පුත්තලම දුම්රිය මාර්ගය හරහාත් එහාට මෙයාට ගෙනියන්න පුළුවන්.”
එම ක්‍රමය යොදා ගන්නේනම් ලොරි 50 ක 60 ක රැ ගෙන යන එළවළු එක දුම්රියකින් රැගෙන යා හැකි බව නාමල් කරුනාරත්න පෙන්වා දී තිබුනි.
දඹුල්ල ආර්ථික මධ්‍යස්ථානය අප්‍රේල් 7 දින වසා දමන විටත් එළවළු රෑ ගෙන දඹුල්ලට පැමිණ සිටි ගොවීන් දඹුල්ල අවට ප්‍රධාන මාර්ග වල සහ විවිධ ස්ථාන වල තබාගෙන අප්‍රේල් 8 දිනයේ පිටස්තර ව්‍යාපාරිකයන්ට එළවළු අලෙවි කරනු අයුරු මාධ්‍ය වාර්තා කර තිබුනි.
Facebook Comments
