බණ්ඩාරනායක මාවතේ සිදුවුයේ කුමක්ද? ජාබීර් මෞලවිට කන් දෙන්න

ශ්‍රී ලංකාවේ කොරෝනා වෛරස් ව්‍යාප්තියට මුස්ලිම් ජනතාවට දොස් පැවරෙන ආකාරයෙන් වාර්තා ඉදිරිපත් කරන ප්‍රධාන ධාරාවේ විද්‍යුත් මාධ්‍ය ඔවුන් වාසය කරන ප්‍රදේශ තුලට වසංගතය ඇතුළු වුයේ කෙසේදැයි කිසි විටකත් වාර්තා නොකරන බවට අගනුවර වාසී මෞලවි වරයකු චෝදනා කරයි.

“ගොඩක් අය හිතං ඉන්නෙ මුස්ලිම්වරුන් එකට ගොඩගැහිලා ඉන්න නිසා තමයි ඇවිත් තියෙන්නෙ කියලා.”

අද දෙරණ සහ හිරු මාධ්‍ය නාලිකා පුවත් වාර්තාකරණයේදී මුස්ලිම්වරුන්ට චෝදනා එල්ල වන අයුරින් කටයුතු කරන බවයි කොළඹ අලුත්කඩේ බණ්ඩාරනායක මාවතේ මොහොමඩ් ජාබිර් මෞලවිවරයා පවසන්නේ.

කොළඹ මහ නගර සභාවේ ප්‍රධාන සෞඛ්‍ය වෛද්‍ය නිලධාරී වෛද්‍ය රුවන් විජයමුණි පවසන පරිදි අප්‍රියෙල් 21 අඟහරුවාදා වන විට බණ්ඩාරනායක මාවතේ සහ ඒ අවට පදිංචි කරුවන් 1010 දෙනෙකු මේ වන විට නිරෝධායනයට යොමු කර තිබේ.

ආසාදිත බවට සැක පුද්ගලයන් දුරස්ව තබමින් ප්‍රවාහනය කිරීම සඳහා බස් රථ විශාල සංඛ්‍යාවක් එම පලාතට එවීම මුස්ලිම්වරුන් විශාල පිරිසක් ප්‍රවාහනය සඳහා කරන ලද්දක් සේ විකෘති කොට රුපවාහිනී ඔස්සේ ප්‍රචාරය කිරීම ගැන මෞලවි ජාවිඩ් කනගාටුව පල කරයි.

“සාමාන්‍යයෙන් එක බස් එකක හැටක් හැත්තෑවක් යන්න පුලුවන් විදියට එක සීට් එකක දෙන්නෙක් දාන්න පුලුවන් තරම් ඉඩ තිබුනත් එක්කෙනක් බැගින් තමයි දාලා තියෙන්නෙ. අන්න ඒ නිසා තමයි එච්චර බස් ගොඩක් නතර කරලා තියෙන්නෙ.”

දඹදිව වන්දනාව

මෞලවි ජාබිර් ප්‍රකාශ කරන ඇති පරිදි එම ප්‍රදේශයේ ජනතාවට කොරෝනා බෝවීමේ රෝග වාහකයා බවට පත්ව ඇත්තේ දඹදිව වන්දනාවේ ගොස් පැමිණි පවුලක සාමාජිකයෙකි.

වසංගත රෝග විද්‍යා අංශය අප්‍රේල් 20 සදුදා ප්‍රකාශ කර තිබු පරිදි බණ්ඩාරනායක මාවතේ පදිංචිව සිට නිවෙස් තුළම නිරෝධායනයට ලක් කළ සහ බණ්ඩාරනයක මාවතේ පදිංචිව සිටින නීරෝධායන මධ්‍යස්ථානවලට යොමු කර සිටින පිරිසෙන් 31 දෙනකුට වෛරසය ආසාදනය වී තිබුනි.

කොළඹ අලුත්කඩේ, මාලිගාවත්ත, මරදාන, කෙසෙල්වත්ත වැනි ප්‍රදේශ තුළ මුස්ලිම් දෙමළ, සිංහල යනාදී සෑම ජාතියක්ම මිනිස්සු එකට ජීවත් වන්නා සේම බණ්ඩාරනායක මාවතේ ද සියලු ජන වර්ග වලට අයත් ජාතීන් ඉන්නා බව ජාබිර් මෞලවිවරයා සමාජ මාධ්‍ය ජාල ඔස්සේ පලකළ පණිවිඩයකින් පෙන්වා දෙයි.

රොටි කඩේ වත්ත

“දැන් කොරෝනා කාටද ඇවිත් තියෙන්නෙ කියලා බැලුවොත් මේ රොටි කඩේ වත්ත කියලා කෝවිල ඉස්සරහා තියන වත්ත, ඒ කියන්නෙ මේ බණ්ඩාරනායක මාවතේ කෝවිලක් තියනවා ඒ කෝවිල ඉස්සරහා තියන වත්තට තමයි රොටි කඩේ වත්ත කියලා කියන්නෙ, දැන් ඒ වත්ත ගත්තම ඒ වත්තේ ගෙවල් 46 ක් තියනවා. ඒ ගෙවල් හතලිස් හයෙන් ගෙවල් පහක් සිංහල මිනිස්සුන්ට අයත් ගෙවල්, තුනක් දෙමළ මිනිස්සුන්ගේ ගෙවල්, සහ අනික් ඒවා මුස්ලිම්වරුන්ට අයත් ගෙවල්.”

ජාබිර් මෞලවි පෙන්වා දෙන ආකාරයට රොටි කඩ වත්තේ පදිංචි කාන්තාවක් පෙබරවාරි මාසයේදී ඔහුගේ සැමියා සහ පුතා සමගින් ඉන්දියාවේ දඹදිව වන්දනාවට ගොස් තිබේ.

ඔවුන් නැවත ලංකාවට පැමින ඇත්තේ මාර්තු 12 වැනි දිනයි. නමුත් රජය ඔවුන් නිරෝධායනයට යොමු කර නැත.

“එහෙම ගුවන් තොටුපොළේ ඉඳලා එන මේ අය නිරෝධානයේ හිටියෙත් නෑ. ඒ සඳහා ගන්න ඕනි පියවර මොකුත් කළේ නෑ. අනික ඒ අය ගෙදරටම එනවා. එහෙම ගෙදරට ආපුහම මේ අයට උණ තියන බවට සලකුණු දැක ගන්න පුලුවන් වෙලා තියනවා. ඒ අය මොකද කළේ ඒ දේ කාටවත් නොකියා හංගගෙන ඉඳලා තියනවා”.

“ඊට පස්සෙ පොලීසියෙන් ගෙදරට ඇවිත් තිබුනත් ඒ අයට උණ බවට දැනගන්න හෝ එහෙම සලකුණු තියන බවට පෙන්නගන්නෙ නැතිව කිසිම දෙයක් නොකියා හංගලා තියනවා.”

“ඊට පස්සෙ මේ අයට ඒ ලෙඩේ වැඩි වෙනවා. ඒ කවද්ද කිව්වොත් හතරවෙනි මාසේ පහලොස්වෙනි දා එයාගෙ පුතා අයි ඩී එච් (IDH) හොස්පිටල් එකට ක්ශනික දුරකථන ඇමතුමක් දීලා ඒ අය අරගෙන ගිහින් බලනවා. හවස්වරුවේ එයාවත් එයත් එක්ක ඉන්දියාවට ගිය පුතාවත් එයාගෙ ස්වාමි පුරුෂයවත් අරගෙන යනවා, එහෙම අරං ගිහින් බලද්දි අප්‍රේල් 16 තහවුරු වෙනවා ඒ අයට කොරෝනා වෛරසය වැළඳිලා කියලා.”

තුනක් සිංහල තුනක් මුස්ලිම්

ඉන් අනතුරුව අප්‍රේල් 17 දින එම සිංහල පවුල් පදිංචිව සිටි නිවසේ අසල්වැසියන් 12 දෙනකු නිරෝධායනයට රැගෙන ගොස් තිබේ.ඔවුන්ගෙන් හය දෙනකුට කොරෝනා වෛරසය ආසාදිත බව එහිදී හදුනාගෙන ඇත.

ජාබිර් මෞලවි පෙන්වා දෙන්නේ එම හය දෙනා අතර තුන් දෙනෙක් මුස්ලිම් වන අතර අනෙක් තිදෙනා සිංහල ජාතිකයන් බවයි.

“ඊට පස්සෙ ඒ හය දෙනා තහවුරු උනාට පස්සෙ දහඅට වෙනි දා සහ දහ නම වෙනි දා වෙනකං ඒ අය පරීක්ෂණවල නියැලිලා ඉන්නවා, එහෙම පරීක්ෂණ කරලා ඒ රොටි කඩේ වත්ත කියලා කියන ඒ වත්ත විතරයි කාටවත් යන්න නොදී පොලිසියේ රැකවල් එක්ක තියලා තිබුනේ. ඒ අතර අනික් වතුවලට බලපත්‍ර තියන අයට විතරක් යන්න පුලුවන් තත්ත්වයක් තමයි තිබුනේ ඒ අයට කිසිම බලපෑමක් තිබුනේ නෑ.”

“මේ දැන් පරීක්ෂණ කළා එහෙම පරීක්ෂා කරලා බලද්දි ඒ තැන්වල හිටිය අය ඒ අයට කිසිම රෝග ලක්ෂයක් නෑ, උණවත් හෙම්බිරිස්සාවක්වත් කිසිම දෙයක් නෑ, ඒ අය ඇවිත් පී එච් අයි එකින් ඇවිත් පර්යේෂණ කරලා බලද්දි තමයි එතැන (12) දොලොස් දෙනෙකුට කොරෝනා තියන බවට තහවුරු වෙන්නෙ. අන්න ඒ නිසා තමයි ඒ වත්තෙ ඒ ගෙවල් හතලිස්ට හයේම ඉන්න හැම කෙනෙක්වම බස්වල නග්ගලා අරං යන්නෙ.”

එම අවස්ථාව විඩියෝ කරමින් මුස්ලිම්වරුන් කොරෝනා වෛරසය ව්‍යාප්ත කරන බවට ඇගවෙන පරිදි සමාජය තුළ අදහස් ජනිත වන ආකාරයට අද දෙරණ සහ හිරු මාධ්‍ය නාලිකා කටයුතු කරන බවට චෝදනා කරන ජාබිර් මෞලවි අවධාරනය කරන්නේ “මොන යම් ජාතියේ ආගමේ අය උනත් මේ ලෝකයේ හොඳින් ඉන්න ඕනි, මොන යම් ජන කොටසකට අයත් ප්‍රාණයක් උනත් නිකරුනේ නාස්ති වෙන්න ඉඩ දෙන්න හොඳ නෑ.” යනුවෙනි.