වත්මන් රජය සියලු පරිසර නීති උල්ලංඝනය කරමින් බහුජාතික සමාගම් හා ව්‍යාපාරිකයන් වෙත ඉඩම් ලබාදීම සදහා කටයුතු කරමින් සිටින බවට පරිසර සංවිධානයක් වෙතින් චෝදනා එල්ල වී තිබේ.
දෙදහස් පනහ වන තෙක් දියත් කරමින් යන ජාතික භෞතික සැලසුමට අවශ්‍ය ඉඩම් ලබාගැනීම සදහාත් MCC ගිවිසුම ක්‍රියාත්මක කිරීම උදෙසා ඉඩම් නිදහස් කරගැනීම වෙනුවෙනුත් රජයේ අවශේෂ කැළෑ වනාන්තරවල ආරක්ෂාව වෙනුවෙන් තිබූ චක්‍රලේඛය පසෙක තබා බහුජාතික සමාගම් හා ව්‍යාපාරිකයන් වෙත ඉඩම් ලබාදීම සදහා රජය කටයුතු කරමින් සිටින බවයි පරිසර හා සොබාදහම් අධ්‍යයන මධ්‍යස්ථානය පවසන්නේ.
ඒ සදහා සියලුම ප්‍රදේශීය හා දිසාපතිවරුන් යටතේ ඇති වනාන්තර හා වනජීවි හා වන සංරක්ෂණ දෙපාර්තමේන්තුව සතු ඉඩම් ලබාගැනීමට අවශ්‍ය තොරතුරු ලබා ගැනීම සදහා අවශ්‍ය සැලසුම මේ වන විට ක්‍රියාත්මක වෙමින් පවතින අතර මැතිවරණයට පෙර එම ඉඩම් හදුනාගැනීම සිදු කර ඇති බව පරිසර හා සොබාදහම් අධ්‍යයන මධ්‍යස්ථානයේ ජාතික සම්බන්ධීකාරක රවීන්ද්‍ර කාරියවසම් පෙන්වා දෙයි.
“සියලුම ප්‍රදේශීය ලේකම්වරු, දිසාපතිවරු, වන ජීවි සංරක්ෂණ දෙපාර්තමේන්තුව හා වන ජීවි සංරක්ෂණ දෙපාර්තමේන්තුව වෙත මේ වන විට රජය දැනුම් දී ඇත්තේ නිදහස් කළ හැකි සියලු ඉඩම් පිළිබඳ තොරතුරු ලබාදෙන ලෙසය. ඒ අනුව මෙලෙස නිදහස් කළ හැකි ඉඩම් රක්ෂිත ඉඩමක් වුවද සියලු පරිසර නීති උල්ලංඝනය කරමින් වගාවන් සදහා පුද්ගලික ආයතනවලට හා බහු ජාතික සමාගම් වෙත ලබාදීම සදහා රජය උත්සාහ කරමින් ඇත.”
රජයේ අවශේෂ කැළෑ වනාන්තරවල ආරක්ෂාව වෙනුවෙන් තිබූ 05/2001 චක්‍රලේඛය අහෝසි කිරීම් උත්සහය රජය විසින් ගනු ලැබුවේ මෙලෙස ඉඩම් නිදහස් කරගැනීමේ අවශ්‍යතාවය මත බවයි පරිසරවේදී රවීන්ද්‍ර කාරියවසම් පවසන්නේ.
“මෙම චක්‍රලේඛයේ ඉතාමත් වැදගත් වූයේ වනජීවී සංරක්ෂණ දෙපාර්තමේන්තුවට හා වනජීවි සංරක්ෂණ දෙපාර්තමේන්තුවට අයත් නොවන කැලෑ ඉඩම් ප්‍රදේශීය ලේඛම්වරුන්ගේ අවශ්‍යතාවය මත නිදහස් කිරීමට අවසරයක් නොතිබි නිසාය. එසේ කැලෑ ඉඩම් ව්‍යාපෘති සදහා නිදහස් කිරීම සිදුකරනවා නම් ඒ සදහා ව්‍යාපෘති යෝජනාව පරිසර අමාත්‍යංශ ලේකම්ගෙන් යුත් අන්තර් අමාත්‍යංශ කමිටුවකට ඉදිරිපත් කර ඒ සදහා අවසර ලබාගත යුතුව ඇත. මෙම නිසාම දේශපාලඥයන් විසින් ඒ ඒ ප්‍රදේශවල සිදු කිරීමට නියමිතව තිබූ ඉඩම් මංකොල්ලය යම් තරමක් දුරකට නැවතී තිබුනේ මෙම චක්‍රලේඛය නිසාය.”
එම චක්‍රලේඛය අහෝසි කිරීමත් සමගම මෙරට වනාන්තර බරපතල අර්බුදයකට පත්වන අතර මෙරට දැවැන්ත වන සංහාරයන් හා ඉඩම් මංකොල්ලයක් සිදුවන බව රජය විසින් දැනට ඉඩම් සම්බන්ධව ගනු ලබන ක්‍රියාමාර්ගවලින් ඉතාමත් පැහැදිලිව පෙන්නුම් කරන බව පරිසර හා සොබාදහම් අධ්‍යයන මධ්‍යස්ථානය අවධාරණය කරයි.
එම මධ්‍යස්ථානය පෙන්වා දෙන පරිදි දැනට අවශේෂ වනාන්තර බහුතරයක් පිහිටා ඇත්තේ අනුරාධපුර, මොණරාගල ආදි වියළි කලාපීය දිස්ත්‍රික්කවලය.
එයිනුත් වැඩි ඉඩම් ප්‍රමාණයක් අලිමංකඩවල් ලෙස හා වියළි කලාපීය වාරි පද්ධතියේ ජල පෝෂක කලාප ලෙස ක්‍රියාත්මක වේ.
රජයට දැනට ක්‍රියාත්මක කරමින් යන ඉඩම් ලබාගැනීමේ ක්‍රියාවලියේදී අලිමංකඩවල් හා වාරි ජල පෝෂිත පමණක් නොව ඉහත දිස්ත්‍රික්ක මට්ටමින් පෙන්වා දී ඇති වටිනාකමින් නොඅඩු නමුත් අවශේෂ ලෙස නම් කර ඇති වනාන්තර සියල්ලම වාණිජ භෝග වගාවන් හා වෙනත් ආයෝජන සදහා බහුජාතික සමාගම්වලට හා පෞද්ගලික අයිතියට ලබාදීමට නියමිත බව පරිසරවේදී රවීන්ද්‍ර කාරියවසම් පෙන්වා දෙයි.
මෙයට අමතරව වනජීවි හා වන සංරක්ෂණ දෙපාර්තමේන්තුවට අයිති වගා කිරීමට හැකි ඉඩම් ලෙස පෙන්වා දෙන සියලු ඉඩම්ද ව්‍යාපාරිකයන්ට හා විදේශීය සමාගම් සතු කිරීමට අවශ්‍ය සංගණන කටයුතු මේ දිනවල සිදු කරමින් සිටින බවටත් ඔහු චෝදනා කරයි.
කැලෑ අඥාපනත, 5/2001 චක්‍රලේඛය, වන සත්ව හා වෘක්ෂලතා ආඥා පනත, ජාතික පාරිසරික පනත ආදි පරිසර පද්ධති ආරක්ෂා කිරීමට මෙරට තිබෙන චක්‍රලේඛ හා නීති පද්ධතිය සියල්ල අභියෝගයට ලක් කරමින් වර්තමාන රජය විසින් මෙරට වනාන්තර සියල්ල වනසන පියවරට මේ වන විට අත තබා ඇති බවට පරිසර හා සොබාදහම් අධ්‍යයන මධ්‍යස්ථානය වැඩි දුරටත් චෝදනා කරයි.
Facebook Comments
