මෙවර පාර්ලිමේන්තුවට මුල් වරට තේරී පත්වූ මන්ත්රීවරුන් සඳහා නුදුරේදීම තීරු බදු රහිත වාහන බලපත්‍ර ලබාදීමට මුදල් අමාත්‍යාංශ විසින් කටයුතු කරමින් සිටින බව වාර්තා වේ.
මෙසේ මුල් වටයේදී වාහන බලපත්‍ර හිමි වන පාර්ලිමේන්තු මන්ත්රීවරුන් ප්‍රමාණය 79 ක් බවයි ලංකා සී නිවුස් වෙබ් අඩවිය පවසන්නේ.
ඔවුන්ට වාහන බලපත්‍ර ලබා දීමෙන් පසු සෙසු මන්ත්‍රීවරුන්ටද බලපත්‍ර ලබා දීම සිදු කිරීමට නියමිත බව එම වෙබ් අඩවිය වැඩි දුරටත් වාර්තා කර ඇත.
මන්ත්‍රී වාහන බලපත්‍රයක් සඳහා තීරු ලක්ෂ 65ක පමණ බදු සහනයක් හිමි වන අතර නමුත් මෙරටට වාහන ගෙන්වීම දැනට තහනම් කර ඇති නිසා එම තහනම ඉවත් කළ විට වාහන මිලදී ගත හැකි වනු ඇත.
රජයේ නිලධාරීන් සඳහා ද රුපියල් ලක්ෂ 36ක බදු සහන සහිත වාහන බලපත්‍ර නිකුත් කිරීමටද නියමිතව ඇතැයි ලංකා සී නිවුස් වාර්තා කර තිබේ.
කෝටි හත්දහසක්
මන්ත්‍රීවරුන්ට ලබා දෙන වාහන බලපත්‍රවලින් පමණක් රුපියල් කෝටි හත්දහසක මුදලකට වැඩි මුදලක් රජයට අහිමිවන බව නීතිඥ නාගානන්ද කොඩිතුවක්කු මිට ඉහතදී ශ්‍රේෂ්ඨාධිකරණය හමුවේ ප්‍රකාශකර තිබිණ.
ඒ, පාර්ලිමේන්තු මන්ත්රීවරුන් සිය දෙනෙකුට ආසන්න පිරිසක් තමන්ට හිමිවන තීරුබදු රහිත මන්ත්‍රී වාහන බලපත්‍රය ලක්ෂ 250කට වැඩි මුදලකට වෙනත් පාර්ශවයකට විකුණා ඇති බවට චෝදනා කරමින් ඊට එරෙහිව ශ්‍රේෂ්ඨාධිකරණය වෙත පෙත්සමක් ගොනු කරමිනි.
2016 වසර සඳහා වන අයවැය ඉදිරිපත් කරමින් මන්ත්රීවරුන් සහ රජයේ නිලධාරීන්ට වාහන බලපත්‍ර ලබා දීම අහෝසි කිරීමට යහපාලන ආණ්ඩුව යෝජනා කළ අතර එසේ බදු සහන ලබා දීම මගින් රජයට වාර්ෂිකව රුපියල් කෝටි හාරදහසක ආදායමක් අහිමිවන බව එයට හේතු වශයෙන් සඳහන් කළේය.
කෙසේ නමුත් මන්ත්‍රීවරුන්ගෙන් හා රජයේ නිලධාරීන්ගෙන් එයට එරෙහිව එල්ල වූ දැඩි විරෝධය හමුවේ යළිත් ඔවුන් වෙත තීරුබදු රහිත වාහන බලපත්‍ර ලබා දීමට යහපාලන ආණ්ඩුව කටයුතු කළේය.
Facebook Comments
