විස්ස පස්ස ගස්සන්න වෘත්තීය සමිති අවි අමෝරා ගනී

0

ප්‍රජාතන්ත්‍රවාදයේ සිට කුරිරු ඒකාධිපතිත්වයක් කරා රැගෙන යාමට ආණ්ඩුවට එකදු පුරවැසියකු හෝ බලයක් ලබා දී නොමැති බවට ලංකාවේ වෘත්තිය සමිති ව්‍යාපාරය ආණ්ඩුවට අනතුරු අඟවා තිබේ.

“ජනවරම ඒකාධිපති වියරුවක් නොකරනු, වැඩකරන ජනයා දංගෙඩියට යවන ඒකාධිපති 20 පරදවමු” මැයෙන් මුද්‍රිත අත් පත්ත්‍රිකාවක් මගින් 20 ට එරෙහි වෘත්තිය සමිති ව්‍යාපාරය අවධාරණය කර ඇත්තේ නව ආණ්ඩුව බලයට පත් වී තෙමසක් ගතවීමටත් මත්තෙන් ජන වරමට පයින් ගසා ඇති බවයි.

විසි වැනි සංශෝධනය හරහා ශ්‍රී ලංකාව ප්‍රජාතන්ත්‍රවාදයේ සිට ඒකාධිපතිත්වය කරා රැගෙන යාම නියතයක් බව පෙන්වා දෙන එම වෘත්තිය සමිති ව්‍යාපාරය වැඩි දුරටත් අවධාරණය කරන්නේ විවිධ අඩුපාඩුකම් යටතේ වුවද මේ දක්වා පාරදෘශ්‍ය ස්වභාවයකින් පවත්වා ගත් ස්වාධීන කොමිෂන් සභා අහෝසි කර හෝ ඒවායේ ස්වාධීනත්වය නැති කර දමා ඇති බවයි.

ඒ හරහා ජනතා කැමැත්ත විමසන මැතිවරණ ක්‍රියාවලයේ සිට රාජ්‍ය සේවය, අධිකරණ පද්ධතිය ආදී ප්‍රජාතන්ත්‍රවාදී ව්‍යුහයන් දුෂිත වීමට නියමිත බව 20 ට එරෙහි වෘත්තිය සමිති ව්‍යාපාරයේ අදහසයි.

හදිසියට මුවාවෙමින් කිසිදු මහජන අදහස් විමසීමකින් තොරව ජනාධිපතිවරයාට නීති කෙටුම්පත් පැය 24 ක් තුළ සම්මත කර ගත හැකි බව පෙන්වා දෙන වෘත්තිය සමිති ව්‍යාපාරය අනතුරු අගවන්නේ මේ හරහා ගොවියා ඉඩම් අහිමිව උපන් බිමෙහි ම අනාථයන් බවට පත් කරන MCC වැනි ඉඩම් පැහැර ගැනීමේ ගිවිසුම් එක් රැයකින් සම්මත කළ හැකි බවයි.

එසේම, පසුගිය රජය සමයේ ගෙන ආ කම්කරු අයිතිවාසිකම් අළු දුහුවිලි කරන ඊනියා ඒකීය කම්කරු නීති සංශෝධනය වැනි ජන පීඩක පනත් එක රැයකින් සම්මත වීමේ අවධානමත් අත් පත්‍රිකාව මගින් වෘත්තිය සමිති නායකයෝ පෙන්වා දී තිබේ.

“කම්කරුවා, ගොවියා, ධීවරයා උපන් බිමේම අනාථයන් වන්නේ එලෙසිනි.”

යෝජිත විසි වැනි සංශෝධනය මගින් රාජ්‍ය විගණන ක්‍රියාවලියේ පැවැති ස්වාධීනත්වය සම්පුර්ණයෙන්ම හකුලා දමා ඇති බැවින් රාජ්‍ය සමාගම් 150 ක් පමණ රාජ්‍ය විගණනයෙන් ඉවත් කර හොරකමට විවෘත කර ඇති බවට චෝදනා කරන වෘත්තිය සමිති ව්‍යාපාරය අවධාරණය කරන්නේ රාජ්‍ය ආයතනයන් හොරකමට විවෘත කර ඒවා විනාශ වන විට එම රාජ්‍ය ආයතන වලින් ජනතාවට ලැබෙන සේවය අහිමිවීමත්, රාජ්‍ය සමාගම්වල අහිමි වන ආදායම ජනතාවට බදු ලෙස පැටවීමත් යන දෙයාකාරයක වන්දියක් ජනතාවට ගෙවීමට සිදු වනු ඇති බවයි.

” ඒ අනුව විදුලිය, ඉන්ධන, ජලය ඇතුලු බොහෝ මහජන සේවාවන් සුරාකෑමකට ලක් වනු ඇත. ”

අගමැති, ජනාධිපති කාර්යාල විගණන ක්‍රියාවලයෙන් ඉවත් කර ඇත්තේ කුමක් සදහාදැයි ප්‍රශ්න කරන වෘත්තිය සමිති නායකයන් පෙන්වා දෙන්නේ විගණනයට බිය විය යුත්තේ හොරකමට සිත් ඇත්තන් මිස වෙනකකු නොවන බවයි.

ජනපීඩක විසි වැනි සංශෝධනය යටතේ අධිකරණයේ සියලු විනිසුරන් පත් කිරීමේ බලය ජනාධිපති සතු බැවින් ඒ හරහා ජනාධිපති සිදු කරන කිසිදු ක්‍රියාවක් නීතිය හමුවේ ප්‍රශ්න කිරීමට ඇති ඉඩ අහිමිවන බව පෙන්වා දෙන වෘත්තිය සමිති නායකයන් අවදාරණය කරන්නේ එමගින් ජනතා උද්ඝෝෂණ සියල්ල පොලිස් යකඩ පොල්ලෙන් මර්දනය කළ හැකි බවයි.

“විරුද්ධවාදීන් ලෙස සලකා සිවිල් අයිතිවාසිකම් වෙනුවෙන් සටන් කරන පිරිස් සිරගත කරමින්, හිංසාවට ලක් කරමින්, බන්ධනාගාර ගත කරමින් මර්දනය කළ හැකිය.”

විසි වැනි සංශෝධනය හරහා ද්විත්ව පුරවැසියන්ට ජනාධිපති, අගමැති, පාර්ලිමේන්තු මන්ත්‍රී ලෙස තනතුරු දැරීමට ඉඩ සැලසීම තුළ රටට ජනතාවට වග නොකියන ද්විත්ව පුරවැසිභාවය සහිත පුද්ගලයකු මෙරට උත්තරීතර පාර්ලිමේන්තුවට පැමිනීමේ හැකියාව ලැබන බව 20 ට එරෙහි වෘත්තිය සමිති ව්‍යාපාරයේ අත් පත්‍රිකාවේ වැඩි දුරටත් සදහන්ය.

“20 ට එරෙහි වෘත්තිය සමිති ව්‍යාපාරය” වෙනුවෙන් ලංකා ගුරු සංගමයේ ප්‍රධාන ලේකම් ජෝසප් ස්ටාලින්, ලංකා වෙළද, කාර්මික සහ පොදු කම්කරු සංගමයේ ප්‍රධාන ලේකම් සිල්වෙස්ටර් ජයකොඩි සහ එක්සත් කම්කරු සම්මේලනයේ ලේකම් ලීනස් ජයතිලක විසින් මෙම අත් පත්‍රිකාව නිකුත් කර තිබේ.

Facebook Comments