දෙමළ ජනතාව කරන අරගල වලට ප්‍රතිචාර වශයෙන් පළමු රාජපක්ෂ පාලන සමයේ දියත්කළ ආකාරයේම බලයක් යෙදවීමට ආණ්ඩුව පසුබට නොවන බව අගමැතිවරයා මාධ්‍යවේදීන් පිරිසක් සමග පවත්වන ලද සාකච්ඡාවකදී අනාවරණය වී තිබේ.
රටේ ආරක්ෂාව පිලිබඳ සැලකිල්ලෙන් කටයුතු කරන අතර උතුරු නැගෙනහිර නැවත අනාරක්ෂිත තත්වයක් මතුවුවහොත් එයට එකම විසඳුම ලෙස යුද සමයේ ජනාධිපතිවරයා ප්‍රකාශයට පත් කොට ඇත්තේ “පසුගිය කාලයේ උත්තරය” යන්නයි.
අගමැති මහින්ද රාජපක්ෂ මාධ්‍ය ආයතන ප්‍රධානීන් ඇතුළු මාධ්‍යවේදීන් හමුවේ මෙම ප්‍රකාශය කළේ 33 වසරකට ඉහතදී උපවාසයක යෙදී මියගිය තිලීපන් ලෙසින් ප්‍රචලිත, රාසයියා පාර්තීපන් අනුස්මරණය කිරීම වෙනුවෙන් පසුගිය 28 දා උතුරු නැගෙනහිර දියත්කළ හර්තාලය හේතුවෙන්, එකී පළාත් රටේ ආරක්ෂාවට තර්ජනයක්දැයි මාධ්‍යවේදියකු නැගූ ප්‍රශ්නයකට පිළිතුරු ලෙසිනි. “මර්දනය, යුද්ධය” වැනි වචන අගමැතිවරයාගේ මුවින් නිසගයෙන් පිට වුවත් ඒවා ගිල ගනිමින් ආණ්ඩුවේ විසඳුම “පහු ගිය කාලයේ විදියේ උත්තරයක්” බව අවසානයේදී කියා සිටියේය.
කෙසේ වෙතත් මහින්ද රාජපක්ෂ ජනාධිපතිවරයා ලෙසින් දියත් කළ යුද්ධයේදී නිරායුද දෙමළ වැසියන් 40,000ක් 70,000ක් අතර පිරිසක් අතුරුදහන් කර ඇති බවට එක්සත් ජාතීන්ගේ ගණන් බැලීමයි.
යුද්ධාවසානයේ රජයේ ආරක්ෂක අංශ වලට භාරවී අතුරුදහන් වූ දසදහස් සංඛ්‍යාත ජනකායේ ඉරණම හෙළි කරන ලෙස බලකරමින් දෙමළ වැසියන් අදත් වීදියේ අරගල කරති. එම අවදියේ ආරක්ෂක ලේකම් ලෙසින් බලසම්පන්නව සිටියේ වර්තමාන ජනාධිපති ගෝඨාභය රාජපක්ෂය.
විස්ස ගැන අගමැති මතය
කැබිනට් අමාත්‍යවරු ගණනාවක්ද සහභාගි වී සිටි අගමැතිගේ මාධ්‍ය හමුවේදී 20 වැනි ආණ්ඩුක්‍රම ව්‍යවස්ථා සංශෝධනය ඇතුළු ජන ජිවිතයට බලපා ඇති තවත් කරුණු ගණනාවක් පිළිබඳවද මාධ්‍යවේදීන් විසින් ප්‍රශ්න කරන ලදී.
එහිදී 20 වැනි ආණ්ඩුක්‍රම ව්‍යවස්ථා සංශෝධනය සහ එයට නව සංශෝධන ඇතුලත් කිරීම පිලිබඳ අගමැතිවරයාගේ මතය මෙතෙක් ප්‍රකාශ වී නොමැත්තේ මන්දැයි මාධ්‍යවේදියෙක් විමසා සිටියේය. එයට පිළිතුරු දෙමින් “ආණ්ඩුවක් උනාම ආණ්ඩුව ගන්න මතය තමයි මගේ මතය ” යි අගමැතිවරයා කියා සිටියත් රජයේ හවුල්කාර පක්ෂ විවිධ මත පලකිරීම පිළිබඳව මාධ්‍යවේදීන් නැවත නැවතත් නැගූ ප්‍රශ්න හමුවේ තමන් දරන මතය පිළිබඳ නිශ්චිත පිළිතුරක් ලබා දීමට රාජපක්ෂ අගමැතිවරයා අපොහොසත් විය.
අගමැතිවරයා පසෙක සිටි උදය ගම්මන්පිල ඇමතිවරයා ඒ පිළිබඳව පැහැදිලි කළේ, “පක්ෂවලට විවිධ මත තිබෙනවා, ඒක අමාත්‍ය මණ්ඩලයේදී සංවාදයට ලක් වෙනවා, ආණ්ඩු පක්ෂ කණ්ඩායමේදීත් සංවාදයට ලක්කොට ආණ්ඩුව විදියට රටට එක මතයක් ගෙනෙනවා “යි යනුවෙනි.
පාර්ලිමේන්තුව අබිබවා යන බලයක් විධායක ජනාධිපතිවරයා සතුවන 20 වැනි ව්‍යවස්ථා සංශෝධනය සම්බන්ධයෙන් අධ්‍යයනය කිරීමට අගමැතිවරයා විසින් මේ වනවිට කමිටුවක් පත් කර තිබේ.
Facebook Comments
