පාර්ලිමේන්තු මන්ත්‍රී රිෂාඩ් බදියුදීන්ව හට එල්ල වී ඇති චෝදනා වලට අනුව ඔහු අත් අඩංගුවට ගැනීමට වරෙන්තුවක් අනවශ්‍ය බව අධිකරණය අපරාධ පරීක්ෂණ දෙපාර්තමේන්තුව වෙත දැනුම් දී තිබේ.
මහජන මුදල් අවභාවිත කරමින් සහ මැතිවරණ නීති උල්ලංඝනය කරමින් පසුගිය ජනාධිපතිවරණයේ දී ඡන්දය ප්‍රකාශ කිරීම සඳහා අවතැන්වූවන් ප්‍රවාහනය කිරීමට ලංකා ගමනාගමන මණ්ඩලයේ බස් රථ යෙදවීමේ චෝදනා මත පාර්ලිමේන්තු මන්ත්‍රී රිෂාඩ් බදියුදීන් අත්අඩංගුවට ගැනීම සඳහා අධිකරණයෙන් වරෙන්තු ලබාගන්නා ලෙස වැඩබලන පොලිස්පතිවරයාට නීතිපතිවරයා විසින් උපදෙස් ලබාදී තිබුනි.
එම උපදෙස් මත මන්ත්‍රී රිෂාඩ් බදියුදීන් ව සහ තවත් දෙදෙනෙක්ව අත්අඩංගුවට ගැනීමට වරෙන්තු නිකුත් කරන මෙන් අපරාධ පරීක්ෂණ දෙපාර්තමේන්තුව 13 අඟහරුවාදා කොටුව මහෙස්ත්‍රාත් අධිකරණයෙන් ඉල්ලීමක් කළේය.
අපරාධ පරීක්ෂණ දෙපාර්තමේන්තුව කරන ලද ඉල්ලීම ප්‍රතික්ෂේප කරමින් මහේස්ත්‍රාත් ප්‍රියන්ත ලියනගේ දැනුම් දුන්නේ සැකකරුවන්ට එරෙහිව ඉදිරිපත්ව ඇත්තේ අධිකරණ වරෙන්තුවකින් තොරව අත්අඩංගුවට ගත හැකි වැරදි සම්බන්ධ චෝදනා බවයි.
ඒ අනුව ක්‍රියා කර ලබන 27 වනදා අධිකරණයට කරුණු වාර්තා කරන්නැයි මහේස්ත්‍රාත්වරයා වැඩිදුරටත් නියෝග කර තිබේ.
Facebook Comments
