ලංකාවේ කාන්තාවන් පිටට වඩා ගෙදරදී වද විඳින බව හෙළි වේ

0

ශ්‍රී ලංකාවේ කාන්තාවන්ට පිටස්තරයන්ගෙන් සිදු වනවාට වඩා දෙගුණයක ශාරීරික හිංසන තම සහකරුවාගෙන් අත්විඳින්නට සිදු වන බව හෙළි වී තිබේ.

මෙම කම්පා කරවන සුළු තොරතුරු අනාවරණය වී ඇත්තේ කාන්තාවන්ට හා ගැහැණු ළමයින්ට එරෙහි හිංසනය පිළිබදව ශ්‍රී ලංකාවේ ජන ලේඛන හා සංඛ්‍යා ලේඛන දෙපාර්තමේන්තුව සිදු කළ පළමු ජාතික සමීක්ෂණය මගිනි.

“කරුණාකර අප ජීවත් වන මෙම නරකාදියෙන් අප මුදා ගන්න” යි සමීක්ෂණයට දායක වු එක් කාන්තාවක් සමීක්ෂිකාවකගෙන් ඉල්ලා තිබේ.

මේ හිංසනය පදනම් වන්නේ ආර්ථික හා සමාජීය වශයෙන් කාන්තාව දරුණු ලෙස යටපත් කර තිබීම තුලින් බව පිටු 220 කින් යුත් වාර්තාව ඉස්මතු කරයි.

මේ තත්වය පෙන්නුම් කිරීම සදහා 2006 දී කළ ජනවිකාශ හා සෞඛ්‍යය සමීක්ෂණ වාර්තාව යලි සිහිපත් කරන නව සමීක්ෂණය පෙන්වා දෙන්නේ එක් හේතුවක් හෝ හේතු කිහිපයක් නිසා හෝ බිරිඳට පහර දීම සිදුවන්නේ යයි රටේ සමහර දිස්ත්‍රික්කවල කාන්තාවන්ගෙන් 54% ක් පිලිගත් බවයි.

ඒ අනුව සහකරුවන්, හා පවුලට සම්බන්ධ පිරිමින් කාන්තා හිංසනයේ මුල සිටින්නේ ආර්ථික හා සමාජීය වශයන් යටපත් කරනු ලැබූ කාන්තාවන් සම්න්ධයෙන් බවද වාර්තාවෙන් අවධාරණය වෙයි.

ජීවන සහකාරියන් වන සෑම කාන්තාවන් පස් දෙනකුගෙන් එක් අයකු (20.4%) ස්වකීය ජීවිත කාලය පුරාවටම තමන්ගේ ජීවන සහකරුවාගේ ශාරීරික හා/ හෝ ලිංගික අඩන්තේට්ටමට ගොදුරු වී ඇත.

මේ ජීවන සහකාරියන් ගෙන් සියයට හයක් පසුගිය මාස 12 තුළ දී සහකරුවාගේ ශාරීරික හෝ ලිංගික හිංසනය අත්විඳ ඇත්තෝය.

ඒ අතර තම සහකරුවන් නොවන්නා වූ අය අතින්, සෑම කාන්තාවන් 10 දෙනෙකුගෙන් එක් අයකුට වඩා මදක් අඩුවෙන් (7.2%) ශාරීරික හෝ ලිංගික අඩන්තේට්ටම් විඳ ඇත.

පසුගිය මාස 12 තුලදී කාන්තාවන්ගෙන් 1.2% ක් මේ අයුරු සහකරුවන් නොවන අයගේ හිංසනය අත්විද ඇත.

සමීක්ෂණයෙන් තවදුරටත් හෙළි වී ඇත්තේ කාන්තාවන්ගෙන් 24.9% ක් සමීප සහකරු ගෙන් සහකරු නොවන අයකුගේ ලිංගික හිංසනයට ගොදුරු වී ඇති බවයි.

එසේම යම් සම්බන්ධතාවයක් පවත්වාගෙන යන කාන්තාවන්ගෙන් 18.8% ක් තම ජීවිත කාලය තුළ ඔවුන් සබදතා පවත්වනා වූ අය අතින් යම් ආකාරයක ශාරීරික හා / හෝ ලිංගික හිංසනයකට මුහුණ දී ඇති බව මෙම වාර්තාව වැඩි දුරටත් සඳහන් කරයි.

කාන්තා යහපැවැත්ම පිළිබද සමීක්ෂණය ලෙසින් නම් කර ඇති සමීක්ෂණ වාර්තාව, කාන්තාවන්ගේ යහපැවැත්ම මනිනු ලැබීමේ දී පුද්ගලික ආරක්ෂාව මෙන්ම ඒ සදහා පසුබිම සැපයෙන යහපත් රැකියා ප්‍රස්තා, ආර්ථික ආරක්ෂාව, දේපල හා සම්පත් සඳහා සමාන අවස්ථා, තීරණ ගැනීමේ හා දේශපාලනයේ සහභාගිත්වය හා සෞඛ්‍ය වැනි බොහෝ අංශ එක සමාන වැදගත් කමකින් යොදාගත් බව අවධාරණය කරයි.

ආර්ථික හිංසනය

කාන්තාවන්ට හා ගැහැණු ළමුන්ට එරෙහි ගෘහස්ථ හිංසනය එහි අන්තය වන ආර්ථික ප්‍රතිලාභ ලැබීම දක්වාම නොනවතින බව මෙම සමීක්ෂණයේ සොයාගැනීම්වලින් පෙනී යයි.

රැකියා කිරීම සඳහා කාන්තාවන්ට ඇත්තේ පිරිමින්ට අඩු ඉඩ ප්‍රස්තාවක් බවද සමීක්ෂණය හෙළි කරගෙන තිබේ.

ශ්‍රී ලංකාවේ කාන්තාවන්ගේ ශ්‍රම බලකා සහභාගිත්ව අනුපාතය 2018 වසර වන විට මුළු ජනගහනයෙන් 33.6% ක් පමණි.

ආර්ථික වශයෙන් ක්‍රියාකාරී ජනගහනය මිලියන 8.6 කි. නමුත් ඉන් රැකියා වල නිරතවන කාන්තා ප්‍රතිශතය 35% ක් පමණකි. මේ අනුපාතය කලක සිට එකතැන පල් වෙමින් පවතී.

පිරිමින් හා සසඳන විට දළ ජාතික ආදායමේ කාන්තාවගේ කොටස 41% ක් පමණක් වෙයි .

වාර්තාව පෙන්වා දෙන ආකාරයට පිරිමින් දළ ජාතික ආදායමෙන් ඩොලර් 16,852 ක් අත් පත් කරගන්නා අතර කාන්තාවකට හිමි වන්නේ ඩොලර් 6,766 ක් පමණි. මෙය අති විශාල විශාල පරතරයකි.

ශ්‍රී ලංකාව ඇමරිකානු ඩොලර් 3,853(2019) ක ඒක පුද්ගල දළ දේශීය නිෂ්පාදනයක් සහිත අඩු මධ්‍යම ආදායම් ලබන රටකි.

නමුත් පිරිමි හා ගැහැණු අතර ආයු අපෙක්ෂාව නම් කාන්තාවන්ට වාසිදායක අනුපාතයක පවතී.

අසමාන ස්ත්‍රී පුරුෂ සමාජ භාවය

2015 මැතිවරණය වන විට පාර්ලිමේන්තුවේ කාන්තා නියෝජනය 5% ක් විය. වෙනත් ව්‍යවස්ථාපිත නියෝජිත ආයතන වලද තත්ත්වය එසේය.

ඒවායේ සමාන තත්වයක් ලැබීමට අවශ්‍ය ආර්ථික හා තීන්දු ගැනීමේ බලයක් කාන්තාවට සමාජයේ නැත.

කාන්තා හිංසනයේ ප්‍රතිලාභ

ස්ත්‍රී පුරුෂ සමාජභාවය මත පදනම් වූ හිංසනයක ප්‍රතිඵලයන් ලෙස කාන්තාවට තම සිරුර පිලිබද තීන්දු ගැනීමේ අයිතියද අහිමි කරනු ලැබීම මගින් ඇති වන තත්වයත් මෙම සමීක්ෂණ වාර්තාව මගින් අවධාරණය කර තිබේ.

මේ තත්වයෙන් ප්‍රතිලාභ ලබන්නෝ රැකියා ස්ථානවල, අධ්‍යාපන ආයතන වල, අසල්වැසි නිවෙස් වල බියගැන්වීම්, බලපෑම් මගින් ක්‍රියාත්මක වන ආකාරයත් වාර්තාව ඉස්මතු කර තිබේ.

එසේ සිදුවන ස්ත්‍රී දූෂණය, ලිංගික අපයෝජනය, ලිංගික හිරිහැර මෙන්ම කාන්තා ජාවාරම, බලහත්කාරයෙන් ගණිකා වෘත්තියෙහි යෙදවීම, ආදී වූ කාන්තාවන්ට එරෙහි පොදු හිංසනය පාදක කර ගනිමින් දියත් වන ලිංගික හා ව්‍යාපාරික ප්‍රතිලාබ ලැබීමේ පාපී සමාජ භාවිතාවන් වාර්තාව ජනයාගේ අවධානයට ලක් කරයි.

Facebook Comments

wedding people