ඇමෙරිකාවේ ගෝලීය ආයෝජන කළමනාකාර සමාගම් දෙකක් ශ්‍රී ලංකන් ගුවන් සේවයේ කළමනාකාරිත්වය භාරගැනීමට කැමැත්ත පළ කර ඇතැයි අමාත්‍යවරයෙකු පවසා තිබේ.
ලංකා බිස්නස් ඔන්ලයින් වෙබ්අඩවිය වාර්තා කරන අන්දමට බ්ලැක්රොක් (BlackRock) හා ටීපීජී කැපිටල් (TPG Capital) යන සමාගම් මෙලෙස කැමැත්ත පළකර ඇති පාර්ශව අතර සිටින බව සංවර්ධන උපායමාර්ග හා ජාත්‍යන්තර වෙළඳ අමාත්‍ය මලික් සමරවික්‍රම පවසා ඇත.
ණය මුදල් සමඟ මෙම සමාගම භාරගැනීමට කිසිඳු පාර්ශවයක් එකඟ නොවන බැවින් මේ වන විටත් ශ්‍රී ලංකන් ගුවන් සේවයේ පියවා නැති ණය මුදල් රජයට ගෙවීමට සිදුවන බව අමාත්‍යවරයා වැඩිදුරටත් පවසන බව එහි දැක්වේ.
මීට පෙර වාර්තා වූයේ ශ්‍රී ලංකන් ගුවන්සේවයේ කළමනාකාරිත්වය භාරගැනීමට කැමැත්ත පළ කර ඇති විදෙස් ගුවන් සමාගම් අතරින් ඉදිරියෙන්ම සිටි චීනයේ හයිනෑන් ගුවන් සමාගම බවයි.
කෙසේ වෙතත් මේ වන විට හයිනෑන් සමාගම ශ්‍රී ලංකන් ගුවන්සේවයේ කළමනාකාරිත්වය බාර ගැනීමට අකමැත්ත පළ කර ඇති බව ගුවන් තොටුපළ ආරංච් මාර්ග පවසයි.
Facebook Comments
