ආණ්ඩුවේ “කෝකටත් තෛලය” ණය උගුලක් බව සමිති කියයි

0

උත්සව සමයේ කම්කරුවන්ට බැංකුවලින් පොලියට ණය ලබා ගැනීම සදහා රජය විසින් සිදු කරන දිරි ගැන්වීම පුද්ගලික අංශයේ ප්‍රමුඛතම වෘත්තීය සමිතියක අප්‍රසාදයට හේතු වී තිබේ.

රට තුල පැතිරෙන කෝවිඩ් 19 වසංගතයේ බලපැම නිසා අපහසුතාවයට පත්ව ඇති රාජ්‍ය හා පුද්ගලික අංශය ඇතුළු විවිධ ශ්‍රමිකයන්ට උත්සව ණය පහසුකමක් ලබා දෙන ලෙස ජනාධිපතිවරයා පසුගිය වසර අවසානයේ රාජ්‍ය බැංකුවලට නියෝග කර තිබුනි.

ජනාධිපති ලේකම් වෙත ලිපියක් යොමු කරමින් ලංකා වෙළෙද කාර්මික හා පොදු කම්කරු සංගමයේ ප්‍රධාන ලේකම් දැනුම් දී ඇත්තේ රජයේ ක්‍රියා කළාපය තවදුරටත් සේවාදායකයන් “ණය උගුලේ” සිර කිරීමක් ලෙසිනි.

අද වන විට රජය විසින් කෝකටත් තෛලයක් ලෙස “ණය න්‍යාය” ඉදිරිපත් කර ඇති බවට චෝදනා කරන වෘත්තිය සමිති නායක සිල්වෙස්ටර් ජයකොඩි අවධාරණය කරන්නේ සිය වෘත්තිය සමිතිය ප්‍රතිපත්තියක් ලෙස පොලියට ණය ගැනීමට හෝ ණය දීමට සේවාදායකයන් පෙළඹවීමට එකග නොවන බවයි.

“එම නිසා රජය විසින් කුමන හේතුවක් පදනම් කරගෙන හෝ සේවාදායකයන් ණය කාරයන් කිරීමට පහසුකම් සැලසීම හෝ ලබාදීම අප සංගමය අනුමත නොකරමු.”

රටවැසියන් රැකගැනීම හා ආපදා අවස්ථාවල සහායවීම රජයේ වගකීමක් වුවත් මෙම වසංගත තත්වය තුළ රජය ජනතාවට ප්‍රමාණවත් ලෙසින් ආධාර කර නොමැති බවත් ජ්‍යෙෂ්ඨ වෘත්තිය සමිති නායකයා ජනාධිපති ලේකම් පී.බී ජයසුන්දරට යොමු කළ ලිපිය මගින් දැනුම් දී තිබේ.

වර්තමාන වසංගත සමය තුළ ජීවන වියදම පිළිබදව මතු වී ඇති ප්‍රශ්නයට වෘත්තිය සමිති නායක සිල්වෙස්ටර් ජයකොඩි විසදුම් ලෙස ඉදිරිපත් කරන්නේ සේවා යෝජකයන් විසින් තම සේවාදායකයන්ට පහසුකම් සැලසිය යුතු බවයි.

ඒ සදහා වැඩකරන ජනතාවට වඩා ව්‍යාපාරිකයන්ට, ආයෝජකයන්ට, පහසුකම් සපයන රජය පොලියට ණය ගැනීමට සේවාදායකයන් පොළඔවනු වෙනුවට රජය මගින් ඒ සදහා කටයුතු කළ යුතු බවටත් ලංකා වෙළෙද කාර්මික හා පොදු කම්කරු සංගමය යෝජනා කරයි.

මෙවැනි ආපදා අවස්ථාවක සමාගම් හා සේවා යෝජක සමාගම් හා එක්ව රජයේ දායකත්වය ඇතිව සිය ආයතන සේවාදායකයන් ණය කාරයන්වීමට ඉඩ නොදී සමාජ වගකීම ඉටු කිරීමට ඉදිරිපත් විය යුතු බවටත් සිල්වෙස්ටර් ජයකොඩි යෝජනා කර තිබේ.

මෙරට සේවාදායකයන් ණය ගැනීමට හේතු වන කාරණා සලකා බැලීමේදී ඔවුන්ට තිබෙන ණය ගෙවීමට පහසුකම් සපයනු වෙනුවට ඔවුන් තවත් ණය උගුලේ සිර කිරීමට කිසිසේත් එකග විය නොහැකි බවයි සිල්වෙස්ටර් ජයකොඩි ජ්‍යෙෂ්ඨ වෘත්තිය සමිති නායකයා වැඩි දුරටත් පවසන්නේ.

පෞද්ගලික අංශ සේවායෝජකයන්, තම සේවා දායකයන්ට මෙම අසතුටුදායක හා අපහසු අවස්ථාවේ පොලී රහිතව ණය පහසුකම් ලබා දීම සදහා රජයේ අවධානය යොමු කළ යුතු බව ජනාධිපති ලේකම්ට යොමු කළ ලිපිය මගින් ඔහු තව දුරටත් අවධාරණය කර තිබේ.

වෘත්තිය සමිති පරස්පර මතයක

උත්සව සමය වෙනුවෙන් ශ්‍රමිකයන්ට ණය පහසුකමක් ලබා දීමට රජය ගත් තීන්දුව පුද්ගලික බැංකු විසින් ක්‍රියාත්මක නොකිරීම නිසා පුද්ගලික අංශයේ සේවකයන්ට එම අවස්ථාව ගිලිහී තිබියදී රාජ්‍ය බැංකුත් ඔවුන් නොසලකා හැර ඇති ආකාරය දිවයිනේ පුද්ගලික අංශයේ මුල් පෙලේ වෘත්තීය සමිතියක් විසින් පසුගියදා හෙළි කර තිබුනි..

රට තුල පැන නැගී ඇති කෝවිඩ් 19 වසංගතයේ බලපැම නිසා අපහසුතාවයට පත්ව ඇති රාජ්‍ය හා පුද්ගලික අංශය ඇතුළු විවිධ ශ්‍රමිකයන්ට උත්සව සමය සඳහා උත්සව ණය පහසුකමක් ලබා දීමට ජනාධිපතිවරයා ගත් තීරණය අගය කරමින් ජනාධිපති ලේකම් පී. බී. ජයසුන්දර වෙත යොමු කළ ලිපියක් මගින් නිදහස් වෙළඳ කලාප සහ පොදු සේවා සේවක සංගමය ඉල්ලා තිබුනේ එම පහසුකම පෞද්ගලික බැංකු හරහාත් කම්කරුවන්ට ලබා දෙන ලෙසයි.

“කෙසේ වෙතත් පුද්ගලික ආයතන වල සේවය කරන සේවකයන්ගේ බහුතරයක් ගිණුම් පවතින්නේ පුද්ගලික බැංකු වල නිසාත්, එම සේවකයන් ගේ වැටුප් බැර කෙරෙන්නේ එම බැංකුවල නිසාත්, මෙම උත්සව ණය පහසුකම් ලබා දීම රාජ්‍ය බැංකු වලට පමණක් ක්‍රියාත්මක කිරීමට උපදෙස් දීම නිසා පුද්ගලික අංශයේ සේවකයන්ට මෙම උත්සව ණය පහසුකම් ලබා ගැනීමට බහුතරයකට නොහැකි තත්ත්වයක් උද්ගතව ඇත.”

එබැවින් මෙම අවස්ථාව පුද්ගලික අංශයේ සේවකයන්ට ලබා ගැනීමට හැකි වන පරිදි පුද්ගලික බැකු මගින් ද උත්සව ණය පහසුකම් ලබා දීමට විධි විධාන යොදන මෙන් පුද්ගලික අංශය නියෝජනය කරන වෘත්තීය සමිතියක ජ්‍යෙෂ්ඨ වෘත්තිය සමිති නායක ඇන්ටන් මාකස් රජයෙන් ඉල්ලා තිබුනි.

Facebook Comments

wedding people