අල්ලස් හෝ දුෂණ චෝදනා විමර්ශන කොමිෂන් සභාවේ අධ්‍යක්ෂ ජනරාල් දිල්රුක්ෂි වික්‍රමසිංහ සිය ධුරයෙන් ඉල්ලා අස්වීමට තීරණය කර ඇතැයි විශ්වාස කටයුතු ආරංචි මාර්ග සඳහන් කරයි.
ඇය එසේ ඉල්ලා අස්වීමට තීරණය කර ඇත්තේ, ”අල්ලස් හෝ දූෂණ චෝදනා විමර්ශන කොමිෂන් සභාව දේශපාලන න්‍යාය පත්‍රයන්ට අනුව කටයුතු කරන්නේ නම් තමන්ටත් ඒ සම්බන්ධයෙන් තීන්දු තීරණ ගැනීමට සිදු වන බවට” ජනාධිපති මෛත්‍රීපාල සිරිසේන විසින් පසුගිය අඟහරුවාදා (12) සිදු කළ ප්‍රකාශයට විරෝධය පාමිනි.
මේ දිනවල නිල සංචාරයක් සඳහා මැලේෂියාවට ගොස් සිටින දිල්රුක්ෂි වික්‍රමසිංහ යලි දිවයිනට පැමිණි වහාම ඉල්ලා අස්වීමේ ලිපිය ජනාධිපතිවරයා වෙත බාරදීමට නියමිතව ඇතැයි ද පැවසේ.
කොමිසමේ විමර්ශන ඉතා මන්දගාමීව සිදුවීම පිළිබඳව විවේචන එල්ල වුවද කොමිසම පක්ෂග්‍රාහීව දේශපාලන බලපෑම්වලට යටත්ව ක්‍රියා කරන බවට ඇයට මෙතෙක් චෝදනා එල්ල වී නොතිබුණි.
කෙසේවුවද, ‘ඇවන්ගාඩ්’ සිද්ධිය සම්බන්ධව ගෝඨාභය රාජපක්ෂ මහතා ඇතුළු හිටපු නාවික හමුදාපතිවරුන් වෙත කොමිසම මගින් නඩු පැවරීම ජනාධිපතිවරයාගේ දැඩි විවේචනයට ලක්විය.
හිටපු අමාත්‍යාංශ ලේකම්වරුන්, රණවිරුවන් ආදී වශයෙන් වර්ග කරමින් වංචා විමර්ශන සිදු කිරීමත් නීතිය ක්‍රියාත්මක කිරීමත් සිදු කළ නොහැකි බැවින් තවදුරටත් කොමිසමේ විමර්ශන කටයුතු සිදු කිරීමට හැකියාවක් නැතැයි දිල්රුක්ෂි වික්‍රමසිංහ තම හිතවතුන්ට පවසා තිබේ.
(Srilanka mirror)
Facebook Comments
