දිලීපන් සමරුවට එරෙහිව උසාවි නියෝග ගැනීමේ පොලිස් තැත වරදී

දෙමළ විමුක්ති අරගලය වෙනුවෙන් මාරාන්තික උපවාසයක යෙදී ජීවිතය පරිත්‍යාග කළ එල්.ටී.ටී.ඊ සංවිධානයේ හිටපු ප්‍රධානියකු අනුස්මරණය වෙනුවෙන් සිදු කෙරෙන රථ පෙළපාලියක් නැවැත්වීමට පොලීසිය කළ ඉල්ලීම අධිකරණය විසින් ප්‍රතික්ෂ්‍රේප කර තිබේ.

දිලීපන් නමින් ප්‍රකට එල්.ටී.ටී.ඊ සංවිධානයේ රාසයියා පාර්තිපන්ගේ 36 වැනි වාර්ෂික අනුස්මරණය වෙනුවෙන් ගමන් ගන්නා රථ පෙළපාලිය නතර කරන ලෙස වව්නියාව පොලීසිය විසින් වව්නියාව මහේස්ත්‍රාත් අධිකරණයෙන් ඉල්ලා ඇත්තේ ප්‍රදේශවාසීන් දෙදෙනකු පොලීසියට කළ පැමිණිල්ලකට අනුවයි.

ඉන්දීය හමුදාවට එරෙහිව මාරාන්තික උපවාසයක යෙදී ජීවිතය පරිත්‍යාග කිරීම නිසා ත්‍යාගී දිලීපන් ලෙසින් ගෞරවයට පාත්‍ර වන එල්.ටී.ටී.ඊ සංවිධානයේ ලුතිතන් කර්නල් රාසයියා පාර්තිපන් අනුස්මරණ සතිය නිමිත්තෙන් සැප්තැම්බර් 15 වැනිදා දෙමළ ජාතික ජනතා පෙරමුණ පොතුවිල් වලින් ආරම්භ කළ රථ පෙළපාලිය මඩකලපුව, ත්‍රිකුණාමලය, වව්නියාව, කිලිනොච්චිය හරහා නල්ලුර් කන්දසාමි කෝවිල අසල ඉදිකර තිබී 2010 දී රජයේ ආරක්ෂක අංශ විසින් කඩා බිඳ දමන ලද තිලීපන්ගේ ස්මාරකය දක්වා ගමන් කරමින් සිටි.

ප්‍රදේශයේ වාර්තාකරුවන් පවසන පරිදි වව්නියාවේ පදිංචි කරුවන් දෙදෙනකු පොලිසියට ගොනු කළ පැමිණිල්ලේ සදහන් කර ඇත්තේ මෙම රථ පෙළපාලිය නිසා ජනතාව අතර ගැටුම් කාරී තත්වයක් හටගෙන ජාතීන් අතර සහජීවනයට බාධා ඇති විය හැකි බවයි.

සැප්තැම්බර් 17 වැනිදා ත්‍රිකුණාමලය හරහා ගමන් කරමින් තිබු දිලීපන් රුව සහිත රථයට සර්ධාපුර සංසන්ධියේදී පොලු මුගුරු අතැතිව කාන්තාවක්ද කැටුව පැමිණි සිංහල මැර කණ්ඩායමක් දැඩි ලෙස පහර දී දැඩි අලාභහානි කර සෙල්වරාජා ගජේන්ද්‍රන් පාර්ලිමේන්තු මන්ත්‍රීවරයාටද පහර දී තිබුනි.

එම ප්‍රහාරය සම්බන්ධයෙන් කාන්තාවන් දෙදෙනකුද ඇතළුව හය දෙනකු පොලිසිය විසින් අත්අඩංගුවට ගෙන අධිකරණයට ඉදිරිපත් කර ඇත.

වව්නියාව මහේස්ත්‍රාත් සුබාජානී දේවරාසා වව්නියා පොලීසියට අවධාරණය කර ඇත්තේ සැමරීමේ අයිතිය ඕනෑම අයකු සතු බවයි.

එබැවින් ජන වර්ග අතර ගැටුම් හා ප්‍රශ්න ඇති නොවන ආකාරයට ප්‍රදේශයේ සහ ජනතාවගේ ආකාරක්ෂාව තහවුරු කරන ලෙස මහේස්ත්‍රාත්වරිය පොලීසියට නියෝග කළ බව පළාත්බද වාර්තාකරුවන් වැඩි දුරටත් සදහන් කරයි.

සිංහල හමුදා කඳවුරු දෙමළ පළාත් වලින් ඉවත් කර ගත යුතුයි, දෙමළ ජනතාවගේ පළාත්වල තාවකාලික දෙමළ ආණ්ඩුවක් පිහිටුවන තෙක් පුනරුත්ථාපන වැඩ තාවකාලිකව අත්හිටවිය යුතුයි, දෙමළ ජනතාවට අයිති ගම් පළාත්වල සිංහලයන් පදිංචි කරවීම කරගෙන යාම නැවැත්විය යුතුයි, දෙමළ පළාත්වල සිංහල පොලිස් ස්ථාන පිහිටුවීම නතර කළ යුතුයි, ත්‍රස්තවාදය වැලැක්වීමේ පනත යටතේ පොලිස් ආරක්ෂක මූලස්ථාන වල සිටින දේශපාලන රැඳවුම්කරුවන් වහා නිදහස් කළ යුතුයි ආදී ඉල්ලිම් ඉදිරිපත් කරමින් 1987 සැප්තැම්බර් 15 වනදා දිලිපන් උපවාසයක් ආරම්භ කළේය.

යාපනය විශ්ව විද්‍යාලය ඉදිරිපිට උපවාසයක යෙදී සිටියදී දිලීපන් මිය ගියේ 1987 සැප්තැම්බර් 26 වෙනිදා ය.