ත්‍රිකුණාමලයේ ජාතිවාදී මැර ප්‍රහාරයට දෙස් විදෙස් විරෝධය

දෙමළ විමුක්ති අරගලය වෙනුවෙන් අහිංසාවාදීව ජීවිතය පරිත්‍යාග කළ එල්.ටී.ටී.ඊ සංවිධානයේ ඉහළ පෙළේ නායකයකු අනුස්මරණය වෙනුවෙන් ගමන් ගත් රථ පෙළපාලියකට නායකත්වය දුන් දෙමළ ජනතා නියෝජිතයෙකුට නැගෙනහිර දී සිංහල මැර කණ්ඩායමක් විසින් එල්ල කළ ප්‍රහාරය උතුරේ දෙමළ ජනතා නියෝජිතයන් හා ඩයස්පෝරා සංවිධාන දැඩි ලෙස හෙලා දැක තිබේ.

ඉන්දීය හමුදාවට එරෙහිව මාරාන්තික උපවාසයක යෙදී ජීවිතය පරිත්‍යාග කිරීම නිසා ත්‍යාගී තිලීපන් ලෙසින් ගෞරවයට පාත්‍ර වන එල්.ටී.ටී.ඊ සංවිධානයේ ලුතිතන් කර්නල් රාසයියා පාර්තිපන් අනුස්මරණ සතිය නිමිත්තෙන් සැප්තැම්බර් 15 වැනිදා දෙමළ ජාතික ජනතා පෙරමුණ පොතුවිල් වලින් ආරම්භ කළ රථ පෙළපාලිය නැගෙනහිර පළාත හරහා උතුරට ගමන් කරමින් සිටී.

තිලීපන්ගේ රුව සහිත ස්මාරකය රැගත් වාහනය සැප්තැම්බර් 17 වැනිදා ත්‍රිකුණාමලය සර්ධාපුර මංසන්ධිය වෙත ලගා වෙද්දී, පොලු මුගුරු අතැතිව පැමිණි කාන්තාවන්ද සහිත සිංහල මැර කණ්ඩායමක් පොලීසිය බලා සිටියදීම වාහනයට දැඩි ලෙස පහර දී දැඩි අලාභහානි කර පාර්ලිමේන්තු මන්ත්‍රීවරයාටද පහර දෙන ආකාරය පළාත් බද මාධ්‍යවේදීන් විසින් විඩියෝ ගත කර තිබේ.

මැර කණ්ඩායමේ සාමාජිකයෙක් සෙල්වරාජා ගජේන්ද්‍රන් මන්ත්‍රීවරයාට යතුරුපැදිය සදහා පළදින හෙල්මටයකින් පහර දී තිබු අතර කාන්තාවක් මන්ත්‍රීවරයාට පහර දී තිබුනේ සිංහ කොඩිය සවිකර තිබෙන පොල්ලකිනි.

මෙම පහරදීම හෙලා දකිමින් ට්ව්ටර් පනිවිඩයක් ඔස්සේ දෙමළ ජාතික සන්ධානයේ පාර්ලිමේන්තු මන්ත්‍රී, නීතිඥ එම්.ඒ.සුමන්තිරන් වගකිව යුතු බලධාරීන්ගෙන් ඉල්ලා ඇත්තේ ප්‍රහාරකයන් සම්බන්ධයෙන් කඩිනමින් නීතිය ක්‍රියාත්මක කළ යුතු බවයි.

“ගජේන්ද්‍රන් මන්ත්‍රීවරයාට පොලිසිය ඉදිරියේ සිදුකළ මෙම පහරදීම අපි තරයේ හෙළා දකිනවා. ප්‍රහාරකයන් ලේසියෙන්ම හඳුනාගන්න පුළුවන්. එමනිසා පොලිස්පති ඉතා ඉකමනින් මේ සඳහා නීතිය ක්‍රියාත්මක කළ යුතුයි.”

සිය ට්ව්ට්ර් පනිවිඩය ජනාධිපති රනිල් වික්‍රමසිංහ, මහජන ආරක්ෂාව පිලිබඳ ඇමති ටිරාන් අලස් හා විදේශ කටයුතු ඇමති අලි සබ්රිගේ අවධානයටත් යොමු කරමින් මන්ත්‍රිවරයා අවධාරණය කර ඇත්තේ ” දැන්වත් සංහිඳියා වාචාලකම ක්‍රියාවට නංවන්න!” යනුවෙනි.

යාපනයේ තවත් ජ්‍යෙෂ්ඨ පාර්ලිමේන්තු මන්ත්‍රීවරයෙක් වන ශිවඥානම් ශ්‍රීධරන් මෙම ප්‍රහාරය “ම්ලේච්ඡ ප්‍රහාරයක්” ලෙස හෙළා දකිමින් ප්‍රශ්න කර ඇත්තේ තිලීපන්ගේ රුව රැගත් රථ පෙළපාලියක් කැටුව යමින් සිටි දෙමළ මන්ත්‍රීවරයකුට මහ දවල් ප්‍රසිද්ධියේ ප්‍රහාරයක් එල්ල කළ හැකි නම් දෙමළ ජනතාවගේ ආරක්ෂාවට ඇති සහතිකය කුමක්දැයි යනුවෙනි.

“මේ රටේ ජාතිවාදී ගින්න තවමත් නිවී ගිහිල්ලා නැති බව මේ එල්ල කරලා තියෙන ප්‍රහාරයෙන් හොඳට තේරෙනවා. තවමත් ඒ ගින්න යටින් දැල්වෙමින් පවතිනවා. මෙවැනි ප්‍රහාරයක් එල්ල කරලා තියෙන්නේ ජිනීවාවල එක්සත් ජාතීන්ගේ මානව හිමිකම් කොමිසම ශ්‍රී ලංකාව පිළිබඳ කතාකරමින් සිටින වෙලාවක. මේ රටේ දෙමළ ජනතාවට ප්‍රහාරයක් එල්ල උන හැම අවස්ථාවේම නිහඬව සිටින බැවින් අපිට සිංහල සංස්ථාපිතය මේ ප්‍රහාරය සම්බන්ධධව කිසිම පියවරක් ගනු ඇතැයි අපේක්ෂා කරන්න බෑ. මේ සිදුවීම ඊළාම් දෙමළ ජනතාවගේ ස්වයං නිර්ණ අයිතිය යළි කරළියට ගෙනවිත් තිබෙනවා,” යැයි ඔහු තව දුරටත් කියා සිටී.

ගජේන්ද්‍රන් මන්ත්‍රීවරයාට එල්ල වු මැර ප්‍රහාරය හෙලා දකිමින්, යාපනයේ දී මාධ්‍ය හමුවක් පවත්වමින් ඊළාම් ජනතා විප්ලවකාරී විමුක්ති පෙරමුණේ නායක හිටපු පාර්ලිමේන්තු මන්ත්‍රී සුරේෂ් ප්‍රේමචන්ද්‍රන් පවසා සිටියේ මළවුන් සිහි කිරීමට පවා අරගල කිරීමට සිදුව ඇති බවයි.

” තිලීපන්ගේ ප්‍රතිමාව ත්‍රිකුණාමලයට ලගා වන විට එය රැගෙන පැමිණි වාහනය සිංහල ජනතාව විනාශ කරලා තියනවා. එයාලට (මන්ත්‍රීවරයාට) සිංහල ජනතාව දරුණු ලෙස පහරදීලා තියනවා. මේවා හෙළා දකින්න ඕනෑ. මළවුන් සිහිකිරීම ස්වාභාවික දෙයක්. කොහොම නමුත් අපට අනුස්මරණයට පවා අරගල කරන්න සිදු වෙලා තියනවා. ”

ගජේන්ද්‍රන් මන්ත්‍රීවරයාට එල්ල වු මැර ප්‍රහාරය හෙලා දකිමින් ටෙලෝ පාර්ලිමේන්තු මන්ත්‍රී විනෝ නෝහරාදලිංගම් අවධාරණය කරන්නේ තවමත් රට තුළ ජාතිවාදී සහ ආගම්වාදී අදහස් වෙනස් වී නොමැති බවයි.

” ප්‍රජාතන්ත්‍රවාදීව සටන් කරලා ජීවිතය පුජා කරපු කෙනෙකුට ප්‍රජාතන්ත්‍රවාදීව පත් කරපු මන්ත්‍රීවරයෙක් උපහාර දැක්වීම ප්‍රතික්ෂේප කරන එකත්, පාරේ මන්ත්‍රීවරයෙක්ව ඝාතනය කරන්න උත්සාහ කරන එකෙනුත් අපිට පේන්න තියෙන්නේ මේ රටේ තාම ජාතිවාදි සහ ආගම්වාදී අදහස් වෙනස් වෙලා නෑ කියන එක තමයි. ”

ටෙලෝ පක්ෂයේ නායක හා පාර්ලිමේන්තු මන්ත්‍රී සෙල්වම් අඩෙක්කලනාදන් සැප්තැම්බර් 19 වැනිදා පාර්ලිමේන්තුවේදී ඉල්ලා සිටියේ මන්ත්‍රීවරයාට එල්ල වු ප්‍රහාරය සම්බන්ධයෙන් වහාම විධිමත් පරීක්ෂණයක් පවත්වන ලෙසයි.

“ත්‍රිකුණාමලයේ දී සහෝදර පාර්ලිමේන්තු මන්ත්‍රීවරයෙක් වන ගජේන්ද්‍රන්ට ප්‍රහාරයක් එල්ල කරලා ජීවිත තර්ජනයක් එල්ල වෙලා තියනවා. මේ සිද්ධිය සම්බන්ධයෙන් විධිමත් පරීක්ෂණයක් පවත්වන්න ඕන. ”

සෙල්වරාජා ගජේන්ද්‍රන් මන්ත්‍රීවරයාට එල්ල වු මැර ප්‍රහාරය මනෝ ගනේෂන් මන්ත්‍රීවරයාද සමාජ මාධ්‍ය ඔස්සේ හෙළා දැක තිබුනි.

යාපනය විශ්වවිද්‍යාල ශිෂ්‍ය සංගමය ද නිවේදනයක් නිකුත් කරමින් මෙම ප්‍රහාරය දැඩි ලෙස හෙළා දැක තිබේ.

” සිංහල ජාතිවාදීන් විසින් එල්ල කරන ලද මෙම ප්‍රහාරය අපි දැඩි ලෙස හෙලා දකිනවා. මේ ප්‍රහාරය දෙමළ ජනතාවගේ අගනුවර තුළ සිදුවූ ලැජ්ජා සහගත සංස්කෘතිකමය ප්‍රහාරයක්. ගරු බුහුමන් දැක්වීම වැනි මූලික අයිතිවාසිකම් පවා ප්‍රහාරයට ලක්වී ප්‍රජාතන්ත්‍රවාදී අවකාශය ප්‍රතික්ෂේප කර ඇති බවට මෙය හොඳ උදාහරණයක්,” යැයි එම ශිෂ්‍ය සංගමයේ සභාපති සහ ලේකම්වරයා නිකුත් කළ නිවේදනයේ සදහන්ය.

ශ්‍රී ලංකා නැගෙනහිර විශ්වවිද්‍යාලයේ කලා හා සංස්කෘතික පීඨයේ ශිෂ්‍ය සංගමය ද නිවේදනයක් මගින් සිය කම්පනය හා හෙළා දැකීම ප්‍රකාශ කර ඇති අතර ප්‍රහාරයන්ට උල්පන්දම් දුන් අය සහ ඒවා ක්‍රියාත්මක කළ අය හඳුනාගෙන නීතිය ඉදිරියට පමුණුවන ලෙස ඔවුන් ඉල්ලා තිබේ.

කැනඩා රජයේ කැබිනට් අමාත්‍ය ගැරී ආනන්දසංගරී, බ්‍රිතාන්‍ය ආණ්ඩු පක්ෂ මන්ත්‍රිනී තෙරේසා විලියර්ස්, විරුද්ධ පක්ෂ මන්ත්‍රිනී ශෙවාන් මැක්ඩොනා, යුරෝපා පාර්ලිමේන්තු මන්ත්‍රී නිකොලායි විල්ලුම්සන්, හිටපු පින්ලන්ත මන්ත්‍රී හුසේන් අල් තායි, ඕස්ට්‍රේලියානු දෙමළ කොංග්‍රසය (ATC), බ්‍රිතාන්‍ය දෙමළ සංසදය (BTF), අයර්ලන්ත දෙමළ සංසදය (ITF), සාමය සහ යුක්තිය සඳහා සහයෝගිතා කණ්ඩායම (SGPJ – දකුණු අප්‍රිකාව), ස්විස් දෙමළ ක්‍රියාකාරී කණ්ඩායම (STAG) සහ එක්සත් ජනපද දෙමළ ක්‍රියාකාරී කණ්ඩායම (USTAG) සහ ලංකාව තුළ සමානාත්මතාවය හා සහන සඳහා ජනතාව සංවිධානය (PEARL Action) ඇතුළු දෙමළ ඩයස්පෝරා කණ්ඩායම් කිහිපයක් ද මෙම ප්‍රහාරය හෙළා දැක තිබේ.