GSP+ දිගටම දීමට පෙර වෙළෙඳ කලාප කම්කරුවන් දෙස බලන ලෙස ඉල්ලීමක්

0

සහනදායි ලෙස යුරෝපා වෙලදපොළට ඇතුළු වීම සදහා ලබා දී තිබෙන තීරුබදු සහන වරප්‍රසාදය තවදුරටත් ලබා දීමට පෙර ආයෝජන ප්‍රවර්ධන කලාප වල ක්‍රියාත්මක අසාධාරණ කම්කරු පිළිවෙත් දෙස අවධානය යොමුකරන්නැයි කම්කරු අයිතීන් වෙනුවෙන් පෙනී සිටින සංවිධානයක් යුරෝපා සංගමයෙන් ඉල්ලා සිටී.

ශ්‍රී ලංකාව සඳහා වන යුරෝපා සංගමයේ කොළඹ තානාපති ඩෙනිස් චයිබි වෙත ලිපියක් යොමු කරමින් ස්ටෑන්ඩ් අප් සංගමයේ විධායක අධ්‍යක්ෂක අෂිලා දන්දෙනිය ඉල්ලා ඇත්තේ ආයෝජන ප්‍රවර්ධන කලාපයේ සේවකයන් මුහුණ දෙන ගැටළු සම්බන්ධයෙන් සෘජුවම සාකච්ඡා කිරීම සදහා අවස්ථාවක් ලබා දෙන ලෙසයි.

ශ්‍රී ලංකාව තුළ ආයෝජන මණ්ඩලය යටතේ ක්‍රියාත්මක වන ආයෝජන ප්‍රවර්ධන කලාප සංඛ්‍යාව පහලවක් වන අතර, ඒවායේ සේවයේ නියුතු සේවක සංඛ්‍යාව ලක්ෂ තුන හමාරකට අධික වේ.

මේ නිසාම ශ්‍රී ලංකාව වාර්ෂික අපනයන ආදායම් වලින් 14 % ක ප්‍රමාණයක් මේ කේෂ්ත්‍රයෙන් උපයයි.

අෂිලා දන්දෙනිය පෙන්වා දෙන්නේ ශ්‍රී ලංකා පාර්ලිමේන්තුව විසින් පනවන ලද කාර්මික ආරවුල් පනත, කර්මාන්ත ශාලා පනත, ශ්‍රි ලංකා ආයෝජන මණ්ඩල පනත සහ කම්කරුවන්ගේ සේවය අවසන් කිරිමේ පනත වැනි දේශිය නීති රාශියක් මගින්ද, එක්සත් ජාතීන්ගේ සංවිධානයේ මාර්ග උපදේශ හා මූළ ධර්ම මෙන්ම ජාත්‍යන්තර සම්මුති මගින්ද, මෙම සේවක සේවිකාවන්ගේ බොහෝ අයිතිවාසිකම් ආරක්ෂා කර දී තිබුණද, කර්මාන්ත ශාලා හිමිකරුවන් ඒවා ගණන් නොගන්නා තත්වයක් දක්නට ඇති බවයි.

“එසේම ශ්‍රී ලංකා රජය සහ ආයෝජන මණ්ඩලය මගින්ද ආයෝජන කලාප වල සේවකයා ආරක්ෂා කරන බවක් නොපෙනේ. මේ නිසාම කර්මාන්ත ශාලා හිමිකරුවන් බලවත් වී ඔවුන්ගේ ඉහළම ලාභය වෙනුවෙන් ක්‍රියාත්මක වෙමින් සිටි. ”

පසුගිය වසරේ අග භාගයේ ඉන්දියානු සේවකයන් ගෙන්වීම නිසා බ්‍රෑන්ඩික්ස් ආයතනය හරහා කොවිඩ් ව්‍යාප්තිය සිදුවු බවට ඉදිරිපත් වු චෝදනා විභාග කිරිම සදහා රජය විසින් පත්කල කමිටුවේ කමිටු වාර්තාව මේ දක්වාම එලියට නොපැමිණියේ මෙම කර්මාන්ත ශාලා හිමියන්ගේ බලපෑම නිසා බවත් අෂිලා දන්දෙනිය යුරෝපා සංගමයට දැනුම් දී සිටි.

“මේ අනුව බොහෝ කර්මාන්ත ශාලා හිමියන් රජයට වඩා බලවත් වී තිබේ. මේ නිසා අධික ලාභ ඉපයිම සදහා සේවක අයිතිවාසිකම් ගණනකට නොගෙන සිටිමට ඔවුන්ට හැකි වී තිබේ.”

කොවිඩ් 19 ව්‍යාප්තිය නිසා සංචරණ සීමා පැනවූවද, ආයෝජන ප්‍රවර්ධන කලාපයෙහි සේවය අත්‍යාවශ්‍ය සේවාවන්ගේ ලැයිස්තුවට ඇතුළත් කිරිම නිසා මෙම සේවක සේවිකාවන්ට සේවයට පැමිනීමට සිදුවූවත් අත්‍යාවශ්‍ය සේවාවන්හි නිරත අනිකුත් අංශ වලට ලබාදුන් බොහෝ සහනයන් මොවුන්ට ලබා නොදුන් බැවින් දුෂ්කරතා රැසත් සමග මොවුන්ට සේවය කිරිමට සිදුවී ඇති බව අෂිලා දන්දෙනිය සිය ලිපිය මගින් වැඩි දුරටත් අවධාරනය කර තිබේ.

“කොවිඩ් 19 ව්‍යාප්තිය වැළැක්විමට කර්මාන්ත ශාලා හිමිකරුවන් විධිමත් පියවර නොගැනිම නිසා ආනාරක්ෂිතව සේවය කිරිමට සිදුවී ඇත. මෙහි ප්‍රතිඵලයක් වශයෙන් සේවක සේවිකාවන් 50,000 කට පමණ කොවිඩ් ආසාදනය විය.”

වෛරසය ආසාදනය වු කම්කරුවන්ට විදින්නට වු දුක් ගැහැට සම්බන්ධයෙන්ද ඇය සිය ලිපියේ සදහන් කර තිබේ.

දීර්ඝ කාලයක් සිට ආයෝජන ප්‍රවර්ධන කලාපයන්හි කර්මාන්ත ශාලා අනියම් පදනම මත සේවක සේවිකාවන් සේවයේ යෙදීම සම්බන්ධයෙන්ම මෙන්ම ඔවුන්ගේ රැකියාවේ සුරක්ෂිතභාවයක් නොමැති වීම සම්බන්ධයෙනුත් අෂිලා දන්දෙනිය යුරෝපා සංගමයේ අවධානය යොමු කර තිබේ.

ජීවන විදයදට සරිසල වැටුපක් නොලැබීම මෙන්ම භර්භනිභාවයෙන් සිටින සේවිකාවන් මුහුණ දෙන අපහසුතා සම්බන්ධයෙන්ද එම ලිපිය මගින් තවදුරටත් අවධාරණය කර තිබේ.

ත්‍රස්තවාදය වැළක්වීමේ පනත ක්‍රියාවේ යෙදවීම ඇතුළු මානව විරෝධී කටයුතු දිගටම සිදුකරන ශ්‍රී ලංකාවේ ආණ්ඩුවේ මානව හිමිකම් චර්යාව යුරෝපයට භාණ්ඩ අපනයනය සඳහා තව දුරටත් බදු සහන සලසා දීමට ගැලපෙන්නේදැයි විමර්ශනය කිරීම සඳහා යුරෝපා සංගමයේ විශේෂ දූත මණ්ඩලය 27 වැනි සදුදා දිවයිනට පැමිණි අතර මේ වන විට ඔවුන් සිය විමර්ශනය සිදු කරමින් පවති.

GSP+ සහනය නැවත සලකා බැලීමට නියමිත මේ වසරේ නොවැම්බරයේදී යුරෝපා හවුල විසින් ශ්‍රී ලංකාවේ මානව හිමිකම් වාර්තා දැඩි ලෙස විමර්ශනය කරනු ඇති අතර, එහිදී සුළු ජාතීන්ගේත්, කම්කරුවන්ගේත් අයිතිවාසිකම් රැකීම ඇතුළු ජාත්‍යන්තර මානව හිමිකම් වගකීම් ක්‍රියාවට නංවා ඇති ආකාරයද සැලකිල්ලට ගනු ඇත.

Facebook Comments

wedding people