හින්දු කෝවිලක් විනාශ කළ අය සොයා පොලිස් විමර්ශන

0

උතුරේ හින්දු කෝවිලක් කඩා විනාශ කළ පුද්ගලයන් සොයා පොලීසිය විමර්ශන ආරම්භ කර තිබේ.

යාපනය ඒ-9 ප්‍රධාන මාර්ගයේ කොඩිකාමම් ප්‍රදේශයේ ඉදිකර තිබූ හින්දු කෝවිලක් ජුනි 8 අගහරුවාදා රාත්‍රියේ හඳුනා නොගත් පිරිසක් විසින් කඩා විනාශ කර දමා ඇති බවයි ප්‍රදේශවාසීන් පවසන්නේ.

කොඩිකාමම් සහ මිරුසවිල් අතර ඒ-9 මාර්ගයේ දුම්රිය මාර්ගය හා බස් මාර්ගය අතර භුමියෙහි ඉදිකර තිබූ මෙම හින්දු කෝවිලේ බිත්ති කිසියම් පිරිසක් විසින් කඩා බිද දමා එහි තිබූ ගණ දෙවි රූපවලටද හානි කර ඇති බව ප්‍රදේශවාසීන් වැඩි දුරටත් සදහන් කරයි.

තමන් දීර්ඝ කාලයක් තිස්සේ වැඳුම් පිදුම් කළ කෝවිල විනාශ කල පුද්ගලයන්ට එරෙහිව නීතිය ක්‍රියාත්මක කරන ලෙස කොඩිකාමම් ප්‍රදේශවාසීන් වැඩි දුරටත් පොලීසියෙන් ඉල්ලා සිටි.

Facebook Comments