දහ අවුරුද්දක් ගෙවිලාත් ජනප්‍රිය විෂයකට කුඩම්මාගේ සැලකිලි

0

සන්නිවේදනය හා මාධ්‍ය අධ්‍යයනය විෂය පාසල් තුළ ආරම්භ කර වසර දහයකට වැඩි කාලයක් ගතව ඇතත් මේ දක්වා විෂය අධ්‍යක්ෂවරු පත් කිරීමට කටයුතු කර නොමැති බවට දිවයිනේ ප්‍රමුඛතම ගුරු සංගමයක් චෝදනා කරයි.

ජුනි 04 දිනැති ගැසට් පත‍්‍රය මගින් ශ්‍රී ලංකා අධ්‍යාපන පරිපාලන සේවයේ III ශ්‍රේණියට නිලධාරීන් බඳවා ගැනීම සඳහා වන සීමිත තරග විභාගයට අයඳුම්පත් කැඳවා ඇති අතර එම ගැසට් නිවේදනයේ එක් එක් විෂයයන්ට අදාළව පවතින පුරප්පාඩු දක්වා ඇති බවයි ලංකා ගුරු සංගමය පවසන්නේ.

“එම පුරප්පාඩු සඳහා සන්නිවේදනය හා මාධ්‍ය අධ්‍යයනය විෂයේ පුරප්පාඩු ඇතුළත් කර නැත.”

මීට හේතු වී ඇත්තේ එම විෂයට අදාළ විෂය අධ්‍යක්ෂ තනතුර අධ්‍යාපන අමාත්‍යාංශය විසින් අනුමත කරවා නොගැනීම බවයි ලංකා ගුරු සංගමයේ ප්‍රධාන ලේකම් ජෝසප් ස්ටාලින් පවසන්නේ.

ජ්‍යෙෂ්ඨ වෘත්තිය සමිති නායකයා පෙන්වා දෙන පරිදි රාජ්‍ය සේවා කොමිෂන් සභාව විසින් අධ්‍යාපන අමාත්‍යාංශ ලේකම්වරයා අමතමින් 2017වසරේ ජුනි 30 දින යොමු කරන ලද ලිපියකින් රාජ්‍ය සේවා කොමිෂන් සභාව දන්වා ඇත්තේ සන්නිවේදනය හා මාධ්‍ය අධ්‍යයනය විෂය සඳහා තනතුරක් අනුමත කරවා ගැනීම සුදුසු බව රාජ්‍ය සේවා කොමිෂන් සභාව නිරීක්ෂණය කර ඇති බවයි.

ඒ සම්බන්ධයෙන් රාජ්‍ය සේවා කොමිසම අවධානය යොමුකර තිබියදීත් අධ්‍යාපන අමාත්‍යාංශය ඊට අදාළ කටයුතු සිදු කර නොමැති බවට ලංකා ගුරු සංගමය වැඩි දුරටත් චෝදනා කරයි.

ගුරු සංගම් නායකයා පෙන්වා දෙන පරිදි මේ තත්වය තුළ සන්නිවේදනය හා මාධ්‍ය අධ්‍යයනය විෂය කටයුතු ආවරණය කරනු ලබන්නේ වෙනත් විෂයයන් සඳහා සිටින විෂය අධ්‍යක්ෂවරු විසිනි.

“සන්නිවේදනය හා මාධ්‍ය අධ්‍යයනය විෂ්‍ය සාමාන්‍ය පෙළ සිසුන් සඳහා 2006 වසරේ ආරම්භ වූ අතර, උසස් පෙළ සිසුන් සඳහා 2008 වසරේ දී ආරම්භ විය. ප‍්‍රථම වරට සාමාන්‍ය පෙළ විභාගය සඳහා 2008 වසරේත්, උසස් පෙළ විභාගය සඳහා 2010 වසරේත් සිසුන් මෙම විෂය සඳහා පෙනී සිටින ලදී. මෙම විෂය උසස්පෙළ සඳහා ආරම්භ වී වසර 10 කට වැඩි කාලයක් ගත වී ඇති අතර, මෙය සිසුන් අතර ජනප්‍රිය විෂයක් වී ඇත.”

එබැවින් 30,000 කට ආසන්න සිසුන් පිරිසක් මෙම විෂය හදාරන අතර, විෂය උගන්වන ගුරුවරු 1000 ක් පමණ පාසල් පද්ධතිය තුළ සිටින බව ලංකා ගුරු සංගමය පෙන්වා දෙයි.

මෙම තත්වය තුළ ඉහත ගැසට් නිවේදනය සංශෝධනය කර සන්නිවේදනය හා මාධ්‍ය අධ්‍යයනය විෂයේ විෂය අධ්‍යක්ෂ තනතුරු සඳහා වන පුරප්පාඩු සඳහා ද අයඳුම්පත් කැඳවන ලෙස ලංකා ගුරු සංගමය අධ්‍යාපන ලේකම්වරයාගෙන් ලිඛිතව ඉල්ලා සිටී.

Facebook Comments

wedding people