ශවේන්ද්‍ර සිල්වාට තහංචි දමන ලෙස යස්මින් සූකා බ්‍රිතාන්‍යයෙන් ඉල්ලයි

එක්සත් ජනපද තහංචි වැටී තිබෙන ශ්‍රී ලංකාවේ හමුදාපති වරයාට එක්සත් රාජධානියේත් සම්බාධක පැනවීමට හේතු දක්වමින් බ්‍රිතාන්‍ය රජයට අතිශය රහස්‍ය වාර්තාවක් භාර දී තිබේ.

යුද්ධයේ අවසන් භාගයේ සිදුකරන ලද බවට චෝදනා කෙරෙන මානව හිමිකම් උල්ලංඝන වලට අදාල පිටු පනහකින් සමන්විත එම වාර්තාව එක්සත් රාජධානියේ විදේශීය පොදු රාජ්‍ය මණ්ඩලීය සහ සංවර්ධනය සඳහා වූ කාර්යාංශය වෙත බාර දී ඇත්තේ සත්‍යය සහ යුක්තිය සඳහා වන ජාත්‍යන්තර ව්‍යාපෘතිය (ITJP) විසිනි.

නඩු නැති ඝාතන ඇතුළු යුද අපරාධ සහ බරපතල මානව හිමිකම් උල්ලංඝන සම්බන්ධයෙන් නැගී ඇති චෝදනා වල විශ්වසනීයත්වය පදනම් කොටගෙන ඇමරිකා එක්සත් ජනපදය විසින් යුද හමුදාපති ශවේන්ද්‍ර සිල්වා ඇතුළු සිය පවුලටම පසුගිය වසර මුල පටන් එරටට පැමිණීම තහනම් කර තිබේ.

2020 ජූලි 6 වැනිදා ස්ථාපිත කරන ලද එක්සත් රාජධානියේ ගෝලීය මානව හිමිකම් සම්බාධක තන්ත්‍රය යටතේ ජනරාල් ශවේන්ද්‍ර සිල්වාට සම්බාධක පනවන ලෙස ITJP ඉල්ලා සිටී.

“එම වාර්තාව සඳහාත්, ශවේන්ද්‍ර සිල්වා සහ ඔහුගේ අණ යටතේ ක්‍රියාකරන්නන් සමග අදාළ සිදුවීම් සම්බන්ධ කිරීම සඳහාත් මේ වනවිට බ්‍රිතාන්‍යයේ ජීවත්වන වින්දිතයන් සහ සාක්ෂිකරුවන් විශාල පිරිසක් විසින් සපයන ලද එම සාක්ෂි අතිශයින් වැදගත් වූවා” යැයි දකුණු අප්‍රිකාවේ ජොහැන්නස්බර්ග් නුවර සිට නිවේදනයක් නිකුත් කරන සංවිධානයේ විධායක අධ්‍යක්‍ෂිකා යස්මින් සූකා ප්‍රකාශ කර තිබේ.

ශ්‍රී ලංකාවේ සිවිල් යුද්ධයේ අවසාන අදියරට අදාළව ජාත්‍යන්තර අභිචෝදකයන් සහ නීතිඥයන් විසින් සුපරික්ෂාකාරීව එක්රැස් කරන ලද සවිස්තරාත්මක සාක්ෂි ගොනුවක් තමන් සතුව ඇති බව ITJP පවසයි.

ජීවත්වීමේ අයිතිය ඇතුළු මානව අයිතිවාසිකම් උල්ලංඝනයකිරීම්වලට අදාළව, 2009 වසර අග භාගයේ යුද්ධයේ අවසන් අදියරේදී 58 වැනි සේනාංකයේ ආඥාපතිව සිටි ශවේන්ද්‍ර සිල්වාගේ භූමිකාව පිළිබඳ විස්තර ITJP සංවිධානය විසින් සම්පාදිත වාර්තාවේ ඇති බව ඔවුන්ගේ නිවේදනයේ දැක්වේ.

එක්සත් රාජධානියේ විදේශ පිළිවෙතට අදාළ ප්‍රමුඛතා ක්‍ෂේත්‍රයක් වන දූෂණය ඇතුළු ලිංගික හිංසන සහ වධ බන්ධනවලට සිල්වාගේ ඇති සම්බන්ධය ගැන ද එම වාර්තාව අවධානය යොමුකරන බව ITJP පවසයි.

“යුද්ධාවසානයේ සිදුවූ මානව හිමිකම් උල්ලංඝනයන්ට අදාළව ඔහුගේ භූමිකාව පිළිබඳ චෝදනා මත 2002දී එක්සත් ජනපද රාජ්‍ය දෙපාර්තමේන්තුව විසින් ශවේන්ද්‍ර සිල්වා නම්කරන ලද අතර, එක්සත් රාජධානියේ සම්බාධක තන්ත්‍රයේ විෂය පථය වූ කලී යුද මෙහෙයුම්වලදී රෝහල් සහ වෙනත් ආරක්ෂා කළ යුතු සිවිල් ස්ථානවලට ෂෙල් ප්‍රහාර එල්ල කිරීම්වලට අදාළ ඔහුගේ භූමිකාව ද ඇතුළත් වන්නා වූ පුළුල් එකකි. මානව හිමිකම් උල්ලංඝනයන්ගේ සමස්ත පරාසය පිළිබඳ අනුදේශයන්ට අදාළවත්, එක්සත් ජනපද ක්‍රියාමාර්ගයට සහාය පළකිරීම සම්බන්ධයෙනුත් මෙය වැදගත්”යැයි ද යැස්මින් සූකා කියා සිටී.

“එක්සත් රාජධානිය විසින් කරනු ලබන එවැනි නම්කිරීමක් වගඋත්තරදායකත්වය සම්බන්ධයෙන් තවත් එක්තරා වැදගත් පියවරක් වනු ඇති අතර එය මෑත දී බ්‍රිතාන්‍යය මූලිකත්වය ඇතුව, ජිනීවා නුවර එක්සත් ජාතීන්ගේ මානව හිමිකම් කවුන්සිලය විසින් සම්මත කරනු ලැබූ යෝජනාවට ද අනුගත එකක් වනු ඇත.”

එක්සත් රාජධානියේ නව සම්බාධක තන්ත්‍රය ශ්‍රී ලංකාවට අදාළව ක්‍රියාත්මක කිරීමට ඇති දේශපාලන අභිලාෂය මෑතදී පැවති බ්‍රිතාන්‍ය පාර්ලිමේන්තු විවාදයකදී පාර්ලිමේන්තු නියෝජිතයන් එකොළොස් දෙනකු විසින් ශවේන්ද්‍ර සිල්වා ඇතුළු ශ්‍රී ලංකාවේ යුද නායකයන්ට අදාළව එක්සත් රාජධානිය විසින් සම්බාධක නොපනවන්නේ ඇයිදැයි විමසා සිටීම විසින් ගම්‍යමාන වූ අතර එම සන්දර්භය තුළ සය වතාවක් ජෙනරාල් සිල්වාගේ නම සඳහන් කෙරුණු බවද ITJP පෙන්වා දෙයි.