මාරාන්තික වසංගතය ආසාදිත වැඩිම පිරිස බස්නාහිර පළාත තුලින් වාර්තා වෙද්දී, සංචරණ සීමා පනවා ඇති මොහොතේ සෞඛ්‍ය නීති කඩ කරන්නන් සොයා බැලීම සදහා උතුරේ තවත් වැඩියෙන් හමුදාව යොදවා තිබේ.
යාපනය ආරක්ෂක සේනා මූලස්ථානය පවසන්නේ කොවිඩ් අවදානම හේතුවෙන් පනවා ඇති සෞඛ්‍ය නීති උල්ලංඝනය කරන පිරිස් අත්අඩංගුවට ගැනීමට හා සෞඛ්‍ය නීති කඩ කරන්නන් සොයා බැලීමට යාපනය ආරක්ෂක සේනා මූලස්ථානය විසින් කාන්තා යුද හමුදා සෙබළියන්ගෙන් සමන්විත විශේෂ කාන්තා යතුරුපැදි කණ්ඩායමක් ස්ථාපිත කොට ඇති බවයි.
දකුණේ දක්නට නොමැති එම විශේෂිත කාන්තා නිලධාරී යතුරුපැදි බලඝනය ස්ථාපිත කර ඇත්තේ යාපනය ආරක්ෂක සේනා ආඥාපති මේජර් ජෙනරල් ප්‍රියන්ත පෙරේරා ගේ අධීක්ෂණය යටතේ ය.
යාපනය ආරක්ෂක සේනා මූලස්ථානය වැඩි දුරටත් පවසන පරිදි ශ්‍රී ලංකා යුධ හමුදා හත්වැනි කාන්තා බලකායේ කාන්තා යුද හමුදා නිලධාරියන්ගෙන් එම බලකාය සමන්විතය .
යුද හමුදා හත්වැනි කාන්තා බලකායේ මේජර් රශ්මි ගල්හේන ගේ මෙහෙයවීම යටතේ එම කාන්තා යතුරුපැදි බලකාය ක්‍රියාත්මක වේ.
සෞඛ්‍ය නීති උල්ලංඝනය කරන පිරිස් සොයා මෙහෙයුම් ක්‍රියාත්මක කිරීම, හදිසි මාර්ග බාධක යොදා සෞඛ්‍ය නීතිවලට අනුගතව කටයුතු නොකරන පිරිස් අත්අඩංගුවට ගැනීම නව යතුරුපැදි බලකාය ස්ථාපිත කිරීමේ අරමුණ බව යාපනය ආරක්ෂක සේනා මූලස්ථානය සඳහන් කරයි.
යාපනය ආරක්ෂක සේනා මුලස්ථානය පවසන පරිදි මෙම විශේෂිත කාන්තා යතුරුපැදි බලකාය පසුගිය 25 වැනිදා සිට සිය මෙහෙයුම් කටයුතු ආරම්භ කර තිබේ.
Facebook Comments
