‘තර්ඩ් ක්ලාස්’ අපහාසය ගැන සමාව ඉල්ලන ලෙස සෞඛ්‍ය ලොක්කාට බලපෑම්

යුද සමයේ මාධ්‍යවේදීන් ඝාතනය කිරීම යුක්ති සහගත කරමින් ප්‍රකාශයක් කළ සෞඛ්‍ය අමාත්‍යාංශයේ ප්‍රධානියකුට සමාව ගන්නා ලෙස ශ්‍රී ලංකාවේ සියලු ජාතීන් නියෝජනය කරන මාධ්‍ය සංවිධාන එකමුතුවක් බල කර සිටී.

මාධ්‍යවේදීන්ගේ ප්‍රශ්න කිරීම් හමුවේ කෝප වු සෞඛ්‍ය අමාත්‍යාංශයේ මාධ්‍ය ප්‍රකාශක විශේෂඥ වෛද්‍ය හේමන්ත හේරත් ජුනි 3 වැනිදා පැවැති මාධ්‍ය හමුවකින් පසුව තර්ජනය කර තිබුනේ “තර්ඩ් ක්ලාස් මාධ්‍යවේදියෙක් වෙන්න එපා… පසුගිය කාලයේ මැරුම් කෑවේ තර්ඩ් ක්ලාස් මාධ්‍යවේදියෝ ….. ” යනුවෙනි.

ශ්‍රී ලංකාවේ ප්‍රජාතන්ත්‍රවාදය සඳහා මාධ්‍යවේදියෝ (JDS)සංවිධානය ලේඛනගත කර ඇති පරිදි ශ්‍රී ලංකාවේ වැඩිම මාධ්‍යවේදීන් පිරිසක් ඝාතනය හා අතුරුදහන් කිරීමට ලක් කර ඇත්තේ යුද සමයේදීය. ඉනුදු බහුතරයක් පළමු රාජපක්ෂ පාලන සමයේදීය.

එම ලේඛනයේ මාධ්‍යවේදීන් 44 දෙනකුගේ නම් ඇතුලත්ව ඇති අතර ඉන් හතලිහකට අධික ප්‍රමාණය දෙමළ මාධ්‍යවේදීන් වේ.

විශේෂඥ වෛද්‍ය සමන්ත හේරත් වෙත ලිපියක් යොමු කරමින් මාධ්‍ය සංවිධාන එකතුව ජුනි 7 සදුදා දැනුම් දී ඇත්තේ ඝාතනයට ලක්වු මාධ්‍යවේදීන් වැඩි දෙනා ‘තර්ඩ් ක්ලාස් වැඩ කළ මාධ්‍යවේදීන්’ බව හඳුන්වමින් ඔහු කර ඇති ප්‍රකාශය සම්බන්ධයෙන් සිය එකතුව බලවත් අප්‍රසාදය පළ කරන බවයි.

“ජනතාවට මෙන්ම රටට සිදුවන අයහපත සම්බන්ධයෙන් වැඩ කිරීම නිසා ජීවිතයෙන් වන්දි ගෙවන්නට සිදු වූ එම මාධ්‍යවේදීන්ට ඔබ කර ඇත්තේ බලවත් අපහාසයකි. නිග්‍රහයකි.”

ඉතිහාසය පුරා මාධ්‍යවේදීන්ට සිදුවූ අපරාධ (ඝාතන, අතුරුදහන් කිරීම්, ප්‍රහාර) සම්බන්ධයෙන් යුක්තිය ඉටු නොවී ඇත්තේ ද, ඔවුන් විසින් කළ කාර්යභාරයන් වැළැක්වීම සඳහා, ඒවා හිතා මතා සැලසුම් කළ අපරාධයන් නිසා බව, මාධ්‍ය සංවිධාන එකතුවේ විශ්වාසයයි.

කෙසේවෙතත්, මාධ්‍ය සංවිධාන නිවේදනය සමාජ මාධ්‍ය ඔස්සේ බෙදාහදා ගනිමින් “යුද සමයේ මාධ්‍යවේදීන් ඝාතනය කිරීම යුක්ති සහගත කළ සෞඛ්‍ය ලොක්කා “සමාව ගත යුතුයි” – මාධ්‍ය සංවිධාන එකතුව” යනුවෙන් @lankafiles විසින් ට්විටර් මගින් කළ සඳහනට ප්‍රතිචාර දක්වමින් නිදහස් මාධ්‍ය ව්‍යාපාරය පවසා තිබුනේ ශ්‍රී ලංකාවේ මාධ්‍ය සංවිධාන එකතුව විසින් නිකුත් කරන ලද නිවේදනය “යුද සමයේ ඝාතන වලට අදාළ නොවන” බවයි.

‘යුද්ධ සමයේ මාධ්‍යවේදීන් ඝාතනය කිරීම’ යන අවධාරණය මාධ්‍ය සංවිධාන එකතුවේ නිවේදනයේ අන්තර්ගත නොවුනි. මාධ්‍ය සංවිධාන එකතුව” යනුවෙන් නිදහස් මාධ්‍ය ව්‍යාපාරය සිංහලෙන් දැනුම් දී තිබුණි.

දෙමළ, මුස්ලිම් හා තරුණ ආදී මධ්‍ය සංවිධාන හයකින් සමන්විත මාධ්‍ය සංවිධාන එකතුව පෙන්වා දෙන පරිදි ජූනි මස 3 වැනිදා සෞඛ්‍ය ප්‍රවර්ධන කාර්යාංශයේ පැවැති ප්‍රවෘත්ති සාකච්ඡාවේ මූලික අදහස් දැක්වීමෙන් අනතුරුව, විශේෂඥ වෛද්‍ය හේමන්ත හේරත් කෝපයෙන් යුතුව ඉහත ප්‍රකාශය කර ඇත්තේ, එදින “තේමාවට අදාල නොවන ගැටලුවක්” සම්බන්ධයෙන් දිගින් දිගටම ප්‍රශ්න කළ මාධ්‍යවේදියකු ඉලක්ක කර ගෙනයි.

එම නිවේදනයට අත්සන් තබා ඇති මාධ්‍ය සේවක වෘත්තිය සමිති සම්මේලනයේ ප්‍රධාන ලේකම් ධර්මසිරි ලංකාපේලිගේ සහ සභාපති කරුනාරත්න ගමගේ සති අන්තයේ සෞඛ්‍ය අමාත්‍ය පවිත්‍රා වන්නිආරච්චිට යොමු කළ ලිපියක සදහන්ව ඇත්තේ මහනුවර දිස්ත්‍රික්කයේ ස්පුට්නික් V එන්නත විදීමේදී එන්නත්ලාභින්ගෙන් ප්‍රකාශයකට අත්සන ලබාගැනීම පිළිබදව ශ්‍රී ලංකාව තුල මතු වී තිබෙන ආන්දෝලනාත්මක ප්‍රශ්නය මාධ්‍ය වේදියකු විසින් විමසීම වෛද්‍යවරයාගේ වියරු හැසිරීමට හේතු වී ඇති බවයි.

කෙසේ වෙතත්, සෞඛ්‍ය අමාත්‍යාංශයේ මාධ්‍ය ප්‍රකාශක ලෙස පෙනී සිටිමින්, අපරාධවලට ගොදුරු වූ මාධ්‍යවේදීන්ට කර ඇති අපහාසය හා නිග්‍රහය සුලුකොට සැලකිය නොහැක්කක් බවයි මාධ්‍ය සංවිධාන එකතුව පවසන්නේ.

එම එකමුතුව අවධාරණය කරන පරිදි විශේෂඥ වෛද්‍ය සමන්ත හේරත්ගේ ප්‍රකාශයෙන් සිදුව ඇත්තේ බලවත් හිත් රිදීමකි.

“ඔවුන් වෙනුවෙන් යුක්තිය ඉල්ලා හඩ නගන මාධ්‍ය ප්‍රජාව වන අප මෙන්ම ඔවුන්ගේ පවුල්වල සියලු දෙනා ද මෙයින් බලවත් හිත් රිදීමකට ලක් වී ඇත.”

‘තර්ඩ් ක්ලාස් වැඩ’ සහ ‘ක්ලාස්’ සම්බන්ධයෙන් වෛද්‍යවරයාගේ නිර්වචනය ගැන කතිකාවකට යැමේ සුදානමක් නොමැති බව විශේෂඥ වෛද්‍ය සමන්ත හේරත් ට දැනුම් දෙන මාධ්‍ය සංවිධාන එකතුව වැඩි දුරටත් අවධාරණය කර ඇත්තේ මේ වන විට සමාජගත වී ඇති ඔහුගේ ප්‍රකාශයෙන් අගතියක් සිදුවූ අපරාධවලට ගොදුරු වූ මාධ්‍යවේදීන් හා හිත් රිදීමට ලක්වූ ඔවුන්ගේ පවුල්වල අයගෙන් මෙන්ම මාධ්‍ය ප්‍රජාවගෙන් සමාව ගැනීම වගකිවයුතු නිලධාරියකු වශයෙන් ඉටු විය යුතු යුතුකමක් බවයි.

මාධ්‍ය සේවක වෘත්තිය සමිති සම්මේලනයේ ලේකම් ධර්මසිරි ලංකාපේලි, නිදහස් මාධ්‍ය ව්‍යාපාරයේ කැදවුම්කරු සීතා රංජනී, ශ්‍රී ලංකා වෘත්තීය ජනමාධ්‍යවේදීන්ගේ සංගමයේ සභාපති දුමින්ද සම්පත්, ශ්‍රී ලංකා මුස්ලිම් මාධ්‍ය සංසදයේ සභාපති එන්.එම්.අමීන්, දෙමළ මාධ්‍ය සංසදයේ ලේකම් කනපතිපිල්ලේ සර්වානන්ද හා ශ්‍රී ලංකා තරුණ ජනමාධ්‍යවේදීන්ගේ සංගමයේ ලේකම් ඉදුනිල් උස්ගොඩ ආරච්චි ගේ අත්සනින් යුතුව මාධ්‍ය සංවිධාන එකතුව සෞඛ්‍ය අමාත්‍යාංශයේ මාධ්‍ය ප්‍රකාශක විශේෂඥ වෛද්‍ය හේමන්ත හේරත් වෙත ලිපිය යොමු කර තිබේ.

ඉල්ලා අස්කර ගනී

මාධ්‍යවේදී ඝාතන අනුමත කළ ප්‍රකාශය ‘කටින් පැන්න’ බව කියමින් සෞඛ්‍ය අමාත්‍යාංශයේ මාධ්‍ය ප්‍රකාශක එය ඉල්ලා අස් කරගෙන තිබේ.

මෝනිං පුවත්පත කළ විමසීමකට පිළිතුරු දෙමින් විශේෂඥ වෛද්‍ය හේමන්ත හේරත් පවසා ඇත්තේ එය “මිනිස් ගති ස්වභාවයක්” වන බවයි.