යාපනය විශ්ව විද්‍යාලයේ උපාදි අපේක්ෂකයන් දෙදෙනකුට මරු කැඳවමින් පොලිසිය වෙඩි තැබූ ස්ථානය අසල තිබී උණ්ඩය පිටවූ පතුරොම් කොපුවක් හමුවී තිබේ.
විජයරාජා සුලක්ෂන් සහ නඩරාසා ගජන් හට වෙඩි තබන ලද යාපනය කොකුවිල්හි කුලප්පිට්ටි මංසන්ධියේ පරීක්ෂණ පවත්වන විශේෂ පොලිස් කණ්ඩායම 26 බදාදා පෙරවරුවේ එම පතුරොම් කොපුව සොයාගනු මාධ්‍යවේදීන්ට දැකගත හැකි විය.
සිසුන් දෙදෙනාට වෙඩි තැබීම ගැන සැක පිට රිමාන්ඩ් භාරයට පත් කොට සිටින පොලිස් නිලධාරීන් පස් දෙනා පරීක්ෂණ පවත්වන ස්ථානයට ගෙන එන ලද්දේ සන්නද්ධ ආරක්ෂක රැකවල් මධ්‍යයේය.
අහසට වෙඩි තැබීම
වෙඩි තැබීම සම්බන්ධයෙන් මාධ්‍යවේදීන්ට කරුනු දක්වමින් නීතිය හා සාමය භාර අමාත්‍ය සාගල රත්නායක ප්‍රකාශ කළේ තරුණ සිසුන් දෙදෙනාට නවතින්නට අණ කළ අවස්ථාවේ ඔවුන් යතුරු පැදිය පොලිස් භටයන්ගේ ‘ඇඟට ඇල්ලූ’ බවයි.
ඒ අවස්ථාවේ අහසට වෙඩි තැබූ බව සැකකාර පොලිස් භටයා ප්‍රකාශ කළත් ‘ඇත්තටම හිතලා තිබ්බද ඇඟටම, නැත්නම් මේක උඩට තිබ්බ එක වැදුනද හරියට තුවක්කුව එල්ල කරගන්න කලින් තුවක්කුව එල්ල කරගන්න කලින් තුවක්කුව පත්තු වෙලා වැදුනද’ කියා සැකයක් පවතින බවයි අමාත්‍යවරයාගේ පැහැදිලි කිරීම.
කෙසේ නුමුත්, ‘තීන්දුව දෙන උසාවිය’ තමන් නොවන බව ඇමැතිවරයා ප්‍රකාශ කර සිටියේය.
මේ අතර මියගිය සරසවි සිසුන් දෙදෙනා මරා දැමීමේ අරමුණින්ම යුතුව වෙඩි තැබීම සිදුවී දැයි සැකයක් මතුවන බවට ශ්‍රී ලංකා තරුණ ජනමාධ්‍යවේදීන්ගේ සංගමය පවසයි.
හිතා මතා වෙඩි තැබීම
වෙඩි වැදී තිබුනු විජයරාජා සුලක්ෂන් සරසවි අරගල පෙරමුණේ සිටි ප්‍රකට සමාජ ක්‍රියාධරයකු බව පෙන්වා දෙන තරුණ ජනමාධ්‍යවේදියෝ එම ක්‍රියාකාරිත්වය සහා වෙඩි වැදීම අතර සම්බන්ධයක් වේදැයි විමර්ශනය කළ යුතු බව ශ්‍රී ලංකාවේ මානව හිමිකම් කොමිසමට පැමිණිල්ලක් ඉදිරිපත් කරමින් කියා සිටිති.
මරණ සිදුවූ රාත්‍රියේ නවත්වා නොයද්දී වෙඩි තැබුවේ නම් පසුපස ආසනයේ සිටි ගජන්ට වෙඩි නොවැදී යතුරු පැදිය පදවාගෙන ගිය සුලක්ෂන් වෙඩි පහරට ලක්වුයේ කෙසේ දැයි සංගමයේ ලේකම් තරිඳු ජයවර්ධනගේ අත්සනින් යුතුව 26 බදාදා කරන ලද පැමිණිල්ලෙන් ප්‍රශ්න කෙරේ.
මියගිය ගජන්ගේ හිස බරපතල ලෙස තුවාල වී තිබියදී හිස් ආවරණය නිරුපද්‍රිතව තිබීමද සැකයට භාජන කරන තරුණ ජනමාධ්‍යවේදීන්ගේ සංගමය ඊට අදාළ ඡායාරූප ද ඉදිරිපත් කර ඇත.
“අපරාධය සිදු කළ, අපරාධය වසන් කළ සහ ඊට අනුබල දුන් උසස් පොලිස් නිලධාරියාගේ සිට පහළ පොලිස් නිලධාරියා දක්වා අපරාධ නඩු විධාන සංග්‍රහයේ 296 වගන්තිය අනුව මිනී මැරීම යටතේ නඩු පවරන ලෙස නිර්දේශ කරන ලෙසත්, වින්දිතයන්ට අවශ්‍ය වන්දි පිරිනමන ලෙස නිර්දේශ කරන ලෙසත්,” ශ්‍රී ලංකා මානව හිමිකම් කොමිසමට ඉදිරිපත් කරන ලද පැමිණිල්ලෙන් ඉල්ලා තිබේ.
(Radio gagana)
Facebook Comments
