වනජීවී නිලධාරීන්ට පහර දුන් බව කියන මේජර් ජෙනරාල්ට දවසින් ඇප

වනෝද්‍යානයකින් අලි පැටවකු පැහැර ගැනීමට පැමිණි බවට සැකකෙරෙන පිරිසක් අල්ලා ගැනීමට උත්සාහ කළ වනජීවි නිලධාරින්ගේ රාජකාරියට බාධා කොට පහරදීම සම්බන්ධයෙන් චෝදනා එල්ල වන යුද හමුදාවේ ඉහළ නිලධාරියකු අත්අඩංගුවට ගත් දාම අධිකරණය විසින් ඇප මත නිදහස් කර යවා තිබේ.

කැකිරාව මහේස්ත්‍රාත් අධිකරණය විසින් අද දිනයේ රුපියල් ලක්ෂ 5 බැගින් වූ ශරීර ඇප දෙකක් මත නිදහස් කර ඇත්තේ මින්නේරිය ජාතික වනෝද්‍යානය ආශ්‍රිතව වන ජීවි නිලධාරින්ගේ රාජකාරිවලට බාධා කිරීම සහ පහරදීම සම්බන්ධයෙන් චෝදනා එල්ල වී සිටින යුද හමුදා මේජර් ජෙනරාල් මොහාන් රත්නායක ය.

වන ජීවි නිලධාරින්ට සිදු වු පහරදීම සම්බන්ධයෙන් හබරණ පොලිසිය ජුනි 30 බදාදා කැකිරාව මහෙස්ත්‍රාත් සමන් වැරනියගොඩ ට කරුණු වාර්තා කිරීමෙන් පසු මහෙස්ත්‍රාත්වරයා නියෝග කර තිබුනේ සැකකාර යුද හමුදා මේජර් ජෙනරාල්වරයා ඇතුළු හමුදා සාමාජිකයන් අත්අඩංගුවට ගන්නා ලෙසයි.

යුද හමුදා මේජර් ජෙනරාල් මොහාන් රත්නායක ජුලි 1 බ්‍රහස්පතින්දා පෙරවරුවේ හබරණ පොලීසියට පැමිණීමෙන් පසු ඔහු අත්අඩංගුවට ගත් බව පොලිස් මාධ්‍ය ප්‍රකාශක අජිත් රෝහණ මාධ්‍ය වෙත පවසා තිබුනි.

සිද්ධිය සම්බන්ධයෙන් වනජීවි නිලධාරීන් මෙන්ම මේජර් ජෙනරාල්වරයා විසින් ද හබරණ පොලීසියට පැමිණිලි කර තිබු බව පොලිස් මාධ්‍ය ප්‍රකාශකයා වැඩිදුරටත් සඳහන් කර තිබේ.

එම පැමිණිල්ලේ අඩංගු කරුණු කවරේදැයි ජ්‍යෙෂ්ඨ නියෝජ්‍ය පොලිස්පති අජිත් රෝහණ පැහැදිලි කළේ නැත.

වන ජීවි නිලධාරින් පවසන ආකාරයට මින්නේරිය ජාතික වනෝද්‍යානයේ හබරණ ආශ්‍රිත බටහිර ප්‍රදේශයේ ගැවසෙන අලි පැටවකු පැහැර ගැනීමට කිසියම් පිරිසක් තැත්කරන බවට ලද තොරතුරක් මත වනජීවි නිලධාරින් ජුනි 23 වැනිදා රාත්‍රියේ සිට සෝදිසි මෙහෙයුමක් ආරම්භ කර තිබේ.

එහිදී ජුනි 25 වැනිදා වනෝද්‍යානයට ඇතුළු වූ සැකකටයුතු වාහන දෙකක් වනජීවි නිලධාරින් විසින් පරික්ෂා කිරීමට උත්සාහ කළද ඒවා නොනවත්වා පලා යාම හේතුවෙන් මින්නේරිය ජාතික වනෝද්‍යානයේ රාජකාරියේ නිරත නිලධාරින් අදාළ රථ දෙක පසුපස ලුහුබැඳ ඇත.

එම වාහන අනුරාධපුර ප්‍රදේශයේ යුද හමුදා කඳවුරක් වෙත ගමන් කර ඇති බවත් වනජිවි නිලධාරින් පොලීසියට කළ පැමිණිල්ලේ සඳහන් වෙයි.

ලුහුබැදීම නතරකර ආපසු හැරී පැමිණෙමින් සිටියදි හබරණ හා මරදන්කඩවල අතර ටැම්පිට යුද හමුදා මාර්ග බාධකය අසලදී හමුදා නිලධාරින් පිරිසක් වනජීවි නිලධාරීන්ට තර්ජනය කර පහර දුන් බවට පැමිණිලි කළේ යයි පොලොන්නරුව වනසත්ව අඩවි ආරක්ෂක කුමාරසිරි විජේකෝන් මාධ්‍යවේදීන්ට පවසා තිබේ.

තර්ජනය කළ බවට චෝදනා ලබන හමුදා නිලධාරින් අතර සිටි 21 සේනාංකයේ ආඥාපති මේජර් ජනරාල් මොහාන් රත්නායක ද තමන්ට තර්ජනය කරන ආකාරය වනජීවි නිලධාරින්ගේ ජංගම දුරකථනයක පටිගත වී ඇත.

පසුව එම සිදුවීම සම්බන්ධයෙන් මින්නේරිය ජාතික වනෝද්‍යානයේ උද්‍යාන භාරකරු භාතිය මඩුගල්ලේ සහ වන සත්ත්ව අඩවි ආරක්ෂක එම්.ඩබ්ලිව්.කේ. වාසල හබරණ පොලීසියට පැමිණිලි කර තිබුනි.

බහින් බස් වීමක්

සිදුවීම “බහින් බස් වීමක්” ලෙස හඳුන්වන ශ්‍රී ලංකා යුද හමුදාව පවසන්නේ ඒ සම්බන්ධයෙන් පරීක්ෂණ මණ්ඩලයක් පත් කොට ඊට සමගාමීව යුද්ධ හමුදා පොලිස් පරික්‍ෂණයක් ද සිදුකෙරෙන බවයි.

“ශ්‍රී ලංකා යුද්ධ හමුදාවේ ජ්‍යෙෂ්ඨ නිලධාරියෙකු සහ වනජීවී දෙපාර්තමේන්තුවේ නිලධාරින් පිරිසක් අතර පසුගිය ජුනි මස 25 දින හබරණ ප්‍රදේශයේදී ඇති වූ බහින්බස්වීමේ සිදුවීම සැල වූ විගස ආරක්‍ෂක මාණ්ඩලික ප්‍රධානි සහ යුද්ධ හමුදාධිපති ජෙනරල් ශවේන්ද්‍ර සිල්වා විසින් එම සිද්ධියේ සියලු කරුණු විමර්ශනය කර වාර්තාවක් ලබාදෙන ලෙස ජ්‍යෙෂ්ඨ මේජර් ජෙනරල්වරුන් දෙදෙනෙකුගේ ප්‍රධානත්වයෙන් යුතු පරික්‍ෂණ මණ්ඩලයක් පත්කරනු ලැබ ඇත්තේ මේ පිළිබඳ පැමිණිලි පොලිසියට ද වාර්තා වී ඇති හෙයිනි,” යි යුද හමුදාව නිවේදනය කොට ඇත.

සිද්ධිය සම්බන්ධයෙන් පළමු පැමිණිල්ල 25 දා හබරණ පොලිසියට කරන ලද්දේ මේජර් ජෙනරාල් මොහාන් රත්නායක විසින් යයි ශ්‍රී ලංකා යුද හමුදාව පවසයි. පැමිණිල්ලේ අඩංගු කරුණු මොනවාදැයි, පොලිසිය මෙන්ම යුද හමුදාවද හෙළි කර නැත. හමුදා නිලධාරියා අත් අඩංගුවට නොගත් බවට ජනමාධ්‍ය විසින් දොස් පැවරුවත්, ස්වේච්ඡාවෙන්ම ජූලි 1 දා පොලිසියට යන තුරුම කිසිදු කැඳවීමක් හෝ විමර්ශනයක් සිදු කොට නැතැයි යුද හමුදාව පොලිසියට චෝදනා කරයි.

තමන්ට සිදුවූ අපහාසය සම්බන්ධයෙන් වන්දි ඉල්ලා නඩු පැවරීමට හමුදා නිලධාරියා සුදානම් වන බව ශ්‍රී ලංකා යුද හමුදාව වැඩිදුරටත් නිවේදනය කර තිබේ.

ඊළඟ නඩු විභාගය යෙදී ඇත්තේ ලබන අවුරුද්දේ පෙබරවාරි 3 දිනටය.