ගුවන් බෝම්බයෙන් ඝාතනය කරන ලද සිය ගණනක් සැමරේ

විසිහය වසරකට ඉහතදී ගුවන් හමුදාව විසින් ක්‍රිස්තියානි දේවස්ථානයකට බෝම්බ හෙලා සමුහ ඝාතනය කරන ලද එකසිය පනහකට අධික උතුරේ දෙමළ ජනයා සිහිකරමින් මලින් පහනින් උපහාර දැක්වීමට දෙමළ ජනතා නායකයන් කටයුතු කර තිබේ.

1995 වසරේ ජුලි 9 වනදා යාපනය නවාලි පල්ලිය, කතරගම හින්දු කෝවිල සහ නේවාසික ප්‍රදේශවලට හෙලූ බෝම්බ වලින් දරුවන්, කාන්තාවන් සහ වැඩිහිටියන් ඇතුළු 147ක් මරණයට පත්වී වසර 26 ක් පිරීම නිමිත්තෙන් 2021 ජුලි 09 සිකුරාදා පැවැත්වු උපහාර දැක්වීමට හිටපු පාර්ලිමේන්තු මන්ත්‍රී එම්.කේ සිවාජිලිංගම් සහ දෙමළ ජාතික සන්ධානයේ හිටපු පලාත් සභා මන්ත්‍රීනී ආනන්දි ශෂිදරන් එක්ව සිටි බවයි පලාත් බද වාර්තාකරුවන් පවසන්නේ.

රටේ පවතින වංසගත ව්‍යාප්තිය හේතුවෙන් පනවා ඇති නිරෝධායන රෙගුලාසි නිසා උපහාර දැක්වීමට සෙනගක් එක්ව නොසිටි නමුත් දේවස්ථානය ආසන්නයේ සන්නද්ධ පොලිස් නිලධාරීන් විශාල පිරිසක් මුරට යොදවා සිටි බව ඔවුහු වැඩි දුරටත් පවසති.

නවාලි දේවස්ථානයේ වැට මායිමේ ස්ථාපිත කර තිබෙන අනුස්මරණ ස්මාරකය අබියස මල් පුදා පහන් දල්වා අනතුරුව පිළිසකර කර තිබෙන නවාලි හි ශාන්ත පීතර කතෝලික දේවස්ථානය තුළ ඇති ප්‍රහාරයෙන් මිය ගිය 130 කගේ නාම ලේඛනයක් ඇතුලත් පුවරුවක් ඉදිරිපිට ද පුෂ්ප උපහාර දැක්වීමට ජනතා නියෝජිතයන් දෙපළ කටයුතු කර තිබේ.

බෝම්බ මාලාවක්

1995 ජූලි මාසයේ දී යාපනයේ නවාලි හි ශාන්ත පීතර සහ පාවුලු කතෝලික දේවස්ථානය යුද්ධයෙන් රැකවරණය හා ආරක්ෂාව පතා රැඳී සිටි දෙමළ ජනයාගෙන් පිරී තිබු මොහොතක ගුවන් හමුදා ප්‍රහාර මාලාව සිදුව තිබුනි.

ජනයා එම වන්දනා ස්ථාන වලට ගොස් ඇත්තේ ආරක්ෂාව සඳහා පොදු ස්ථාන කරා යන ලෙස රජයේ ආරක්ෂක අංශ විසින් ප්‍රසිද්ධියේ කරන ලද නිවේදනයකට අනුගත වෙමිනි.

ඇසින් දුටු සාක්ෂිකරුවන් සහ දිවි ගලවා ගත් පිරිස් පවසන පරිදි චන්ද්‍රිකා බණ්ඩාරනායක කුමාරතුංග පාලනය පැවති 1995 වසරේ ජූලි 09 වන දින සවස 4.30 -5.00 ට පමණ “පුකාරා” ගුවන් යානයක් මඟින් නවාලි පල්ලිය, කතරගම මුරුගන් හින්දු කෝවිල සහ නේවාසික ප්‍රදේශවලට ඉහළින් බෝම්බ 8-13 ක් හෙලා ඇත්තේ මිනිසුන් සිය ගණනක් ඝාතනය කරමින් සහ තවත් බොහෝ දෙනෙකුට තුවාල සිදු කරමිනි.

උතුරු නැගෙනහිර මානව හිමිකම් සඳහා වන කාර්යාංශය විසින් වාර්තා කර ඇති පරිදි ප්‍රහාරයෙන් අනතුරුව හමුවූ මල සිරුරු ගණන 155 කි.

ඝාතනයට ලක්වූවන් අතර අවුරුදු 4 දරුවකු සහ 68 හැවිරිදි වියේ පසුවූවන් දෙදෙනකුද ද වේ.

ඝාතනයට ලක්වූවන්ගෙන් 45 ක් පමණ නවාලි පදිංචි කරුවන් යැයි ගණන් බලා වැඩි දෙනෙක් යුද්ධයෙන් උන්හිටිතැන් අහිමිවී වෙනත් ප්‍රදේශ වලින් පලා ආ අයයි.

මෙම බෝම්බ ප්‍රහාරයෙන් කතෝලික දේවස්ථානයට, හින්දු කෝවිලට සහ නිවාස 30 කට පමණ දැඩි හානි සිදුවී ඇත.

“ගුවනින් බෝම්බ හෙලීම නිසා ඇති වූ තුවාල නිසා මරණය සිදුවීම” ලෙස දැක්වෙන මරණ සහතික රජය විසින් නිකුත් කිරීම මගින් බෝම්බ ප්‍රහාරය එල්ල කළේ ශ්‍රී ලංකා ගුවන් හමුදාව බවට ප්‍රදේශවාසීන් කරන චෝදනා තහවුරු වේ.