උතුරු නැගෙනහිර ප්‍රතිසංස්කරණ හා සංවර්ධන ඒජන්සිය ( රාඩා ) හරහා රජයේ මුදල් අවභාවිතා කරන ලදැයි චෝදනා ලද හිටපු පාර්ලිමේන්තු මන්ත්‍රී, ව්‍යාපාරික ටිරාන් අලස් ඇතුළු තිදෙනෙකු නොවැම්බර් මස 10 වනදා දක්වා රක්ෂිත බන්ධනාගාර ගත කර ඇත.
අදාළ නඩුව අද (02) කැඳවූ අවස්ථාවේදී කොළඹ මහාධිකරණ රෝජනී කුසලා වීරවර්ධන විසින් මොවුන් රක්ෂිත බන්ධනාගාර ගත කරන ලෙසට නියෝග කළේය.
අධිකරණය විසින් නිකුත් කළ නොතීසියට අනුව ටිරාන් අලස්, සාලිය වික්‍රමසූරිය සහ ජයන්ත ඩයස් සමරසිංහ තිදෙනා අද අධිකරණයේ පෙනී සිටියේය.
එහිදී අධිකරණය විසින් විත්තිකරුවන්ට චෝදනා පත්‍ර බාරදුන් අතර නීතිපති වෙනුවෙන් පෙනී සිටි අතිරේක සොලිස්ටර් ජනරාල් යසන්ත කෝදාගොඩ විසින් විත්තිකරුවන්ට එරෙහිව පොදු දේපළ පනත අනුව චෝදනා එල්ලවී ඇති බැවින් සුවිශේෂි කරුණු ඉදිරිපත් නොවන්නේනම් ඔවුන් රිමාන්ඩ් බාරයට පත්කරන ලෙස ඉල්ලීමක් කරන ලදී.
මෙම නඩුවේ දෙවන විත්තිකරු ලෙස නම් කර ඇති එල්.ටී.ටී.ඊ නායකයෙකු වන එමිල් කාන්තන් අධිකරණය මගහැර සිටියද ඒ වෙනුවෙන් නීතිඥයෙකු පෙනී සිටි බවද නීතිඥයින් විසින් මෙහිදී අධිකරණයට දන්වා ඇත.
Facebook Comments
