ත්‍රිපිටක සංරක්ෂණ පනත් සාකච්ඡාවට මහනාහිමි රතු එළියක්

යෝජිත ත්‍රිපිටක සංරක්ෂණ පනත් කෙටුම්පත පිළිබදව ගිහි පැවිදි විශේෂඥ නිර්දේශ ලබා ගැනීම සදහා කැඳවා තිබු විද්වත් සභාවට සහභාගි වීම රටේ ඉහළම මහනායක හිමිවරුන් විසින් ප්‍රතික්‌ෂේප කර තිබේ.

රටේ පවත්නා කොරෝනා වසංගත තත්වය පිළිබදව හෝ අවධානය යොමු නොකොට කඩිනමින් පනත් සංශෝධනය සඳහා සැරසීම බුද්ධ ශාසනය තුල ගැටුම් ඇති කිරීමට මග පාදනු ඇති බවට මල්වතු, අස්ගිරි මහ නාහිමිවරු අනතුරු අඟවා සිටිති.

“එහෙයින් 2021.08.02 වන දින ඔබතුමන් විසින් උක්ත විද්වත් සභාවට සහභාගී වන ලෙස අප වෙත එවා ඇති ආරාධනාවට අනුව අප සංඝ සභා ද්විත්වය නියෝජනය කරමින් එයට සහභාගී නොවන බව වැඩිදුරටත් දන්වා සිටිමු,” යි මල්වතු පාර්ශවයේ මහානායක තිබ්බටුවාවේ ශ්‍රී සිද්ධාර්ථ සුමංගල හා අස්ගිරි පාර්ශවයේ මහානායක වරකාගොඩ ධම්මසිද්ධි ශ්‍රී පඤ්ඤානන්ද ඤාණරතන යන නාහිමිවරුන් බුද්ධ ශාසන අමාත්‍යාංශයේ ලේකම්ට ලිඛිතව දැනුම් දී තිබේ.

බුද්ධශාසන, ආගමික හා සංස්කෘතික කටයුතු අමාතාංශයේ ලේකම් දේශබන්දු මහාචාර්ය කපිල ගුණවර්ධන වෙත අගෝස්තු 4 බදාදා යොමු කර තිබෙන එම ලිපියේ වැඩි දැක්වෙන පරිදි යෝජිත ත්‍රිපිටක සංරකෂණ පනත් කෙටුම්පත පිළිබදව මහාසංඝරත්නයේ සහ විද්වතුන්ගේ නිර්දේශ ලබා ගැනීම 2021 අගෝස්තු මස 5,6,7 යන දිනවල පෙ.ව 9 සිට ප.ව 4 දක්වා බණ්ඩාරනායක සම්මන්ත්‍රණශාලාවේදී සිදු කෙරේ.

නා හිමිවරුන් දෙදෙනා බුද්ධශාසන අමාත්‍යාංශයේ ලේකම්ට වැඩි දුරටත් දැනුම් දී ඇත්තේ මෙම පනත ගෙන ඒම සදහා මෙය සුදුසු අවස්ථාවක් නොවන බව ජනාධිපතිවරයාටද තමන් විසින් ලිඛිතවම දැනුම් දී ඇති බවයි.

“මෙම පනත් කෙටුම්පත සම්බන්ධයෙන් 2021.07.09 දින අප විසින් ගරු ජනාධිපතිතුමන් වෙත යොමුකරන ලද ලිපිය මගින් මෙම පනත ගෙන ඒම සදහා මෙය සුදුසු අවස්ථාවක් නොවන බවත්, අදාල විශාරදයන් සමග දීර්ඝ අධ්‍යනයකින් අනතුරුව මෙම පනත් කෙටුම්පතට අවශ්‍ය සංශෝධන ගෙන ඒමට අපේක්ෂා කරන හෙයින් කඩිනමින් මෙම පනත සම්මත කිරීමට කටයුතු කිරීම උචිත නොවන බවත් නිසි අධ්‍යයනයකින් තොරව මෙම පනත සම්මත කිරීම මගින් අනාගතයේ නොයෙක් ශාසනික ව්‍යාකුලතාවන් කිර්මාණය වීමට ඉඩ ඇති බවත් දන්වා එවා ඇත්තෙමු.”