කොවිඩ් මර්දනය යොදා ඇති මාර්ගෝපදේශ සහ රටේ පොදු නීතිය රාජපක්ෂවරුන් අදාළ නොවන්නේ දැයි විපක්ෂයේ ප්‍රබල මන්ත්‍රීවරයෙකු ප්‍රශ්න කර සිටී.
සෞඛ්‍ය නීති තඹයකට මායිම් නොකර නරඹන්නන් 2000 කගේ පමණ සහභාගීත්වයෙන් ක්‍රීඩා ඇමැතිවරයාගේ ප්‍රධානත්වයෙන් කුරුඳුවත්ත පොලීසිය ඉදිරිපිට රේස් හෝස් ක්‍රීඩාංගනයේදී සිකුරාදා (19) සවස පාපන්දු තරඟයක් පවත්වා ඇති බවටයි සමගි ජනබලවේගයේ මැද කොළඹ ප්‍රධාන සංවිධායක පාර්ලිමේන්තු මන්ත්‍රී මුජිබර් රහුමාන් චෝදනා කරන්නේ.
මෙවැනි තරඟයකට අවසරයක් නොදුන් බවත් එවැනි තරඟයක් ගැන නොදන්නා බවත් සෞඛ්‍ය අධ්‍යක්ෂ ජනරාල්වරයාගෙන් විමසීමේදී ඔහු සඳහන් කළ බව කී රහුමාන් එයින් පෙනෙන කාරණය වන්නේ රාජපක්ෂලාට මේ රටේ නීතිය අදාළ නොවන බව යැයි නොවැම්බර් 20 සමගි ජන බලවේගයේ මැද කොළඹ කාර්යාලයේ දී මෙම මාධ්‍ය හමුවකදී කියා සිටියේය.
“හැම එකටම සෞඛ්‍ය නීති රීති තියෙනවා නමුත් රාජපක්ෂලාට විතරක් සෞඛ්‍ය නීති රීති නෑ. රාජපක්ෂලාට අපරාද නීතියක් අදාළ නෑ, රාජපක්ෂලාට සිවිල් නීතියත් අදාළ නෑ, රාජපක්ෂලාට සෞඛ්‍ය නීති රීතියත් අදාළ නෑ. ඒගොල්ලො ඔක්කොම නීතියට උඩින් ඉන්නේ. මේ රටේ සාමාන්‍ය ජනතාව ඇතුළු අපි තමයි නීතියට යටත් වෙලා ඉන්නේ.”
රුපියල් දහස බැගින් නරඹන්නන්ට ටිකට් ද විකුණා පවත්වා ඇති මෙම තරඟය නැරඹීමට මුළු රාජපක්ෂ පවුල ම සහභාගි වී ඇතැයි ද ඒ අනුව කොරෝනා බෝ කිරීමේ වගකීම විපක්ෂය නොව ආණ්ඩුව විසින් භාරගත යුතු යැයි ද මුජුබර් රහුමාන් සඳහන් කළේය.
සමගි ජන බලවේගය කන්න නැති ජනතාව වෙනුවෙන් උද්ඝෝෂණයක් කරන්නට සැරසෙද්දී සෞඛ්‍ය අධ්‍යක්ෂ ජනරාල්වරයා අලුත් මාර්ගෝපදේශ නිකුත් කළ අතර පොලිස්පතිවරයා විසින් කොළඹට සෙනඟ පැමිණීම පාලනය කළ බවත් මෙවැනි මොහොතක උද්ඝෝෂණ කිරීම සුදුසු නැති බව ආණ්ඩුවේ ඇමතිවරුන් සියලු දෙනාම එක හඬින් පැවසු බවත් කී මන්ත්‍රීවරයා සෞඛ්‍ය නීති ඇතුළු සියලු නීති අදාළ වන්නේ මේ රටේ විපක්ෂයට සහ සාමාන්‍ය ජනතාවට පමණක් දැයි ප්‍රශ්න කර සිටි.
ජනාධිපතිගේ නෑදෑ හිතවතුන්ට ඕන නීතියක් කඩා ගෙන යන්න පුළුවන් අතර ඒ අයම නීති පනවා ඒ අයම නීති කඩන තැනට පත්ව තිබෙන බවද මුජිබර් රහුමාන් පැවසීය.
කුරුඳුවත්ත පොලිසිය ඉදිරිපිට අදාල තරඟය පැවැත්වෙද්දී ජනතාව ඒකරාශි වන හැටි පොලිසියත් බලා සිටි අතර ජනතා උද්ඝෝෂණය කරන විට පොලිසිය ශබ්ද විකාශන යන්ත්‍ර මගින් ජනතාව එලවන්න උත්සාහ කළ නමුත් පාපන්දු තරඟයේ දී පොලිසිය ඔවුන්ට ආරක්ෂාව දුන් බවද මන්ත්‍රීවරයා කීය.
ඇත්ත ප්‍රශ්න යට ගැසීම සඳහා ආණ්ඩුව සෞඛ්‍ය රෙගුලාසි පනවා ඇති බවත් මේ කරුණු වලින් පෙනෙන්නේ ආණ්ඩුවට ඇත්තටම කොරෝනා පාලනය කරන්නට අවශ්‍යතාවයක් නැති අතර ආණ්ඩුවේ අපේක්ෂාව වී ඇත්තේ කොරෝනා තව තවත් ව්‍යාප්ත කිරීම යැයි ද එහි යටි අරමුණ කුමක්දැයි සෙවිය යුතු බවද මන්ත්‍රී මුජිබර් රහුමාන් වැඩි දුරටත් කියා සිටියේය.
Facebook Comments
