ආගමික ස්ථානවල පුද පුජා පැවැත්වීම කෝවිඩ් රෙගුලාසියෙන් තහනම් කිරීමට සැරසුණු පොලිස් ප්‍රධානීන්ගේ ඉල්ලීම උසාවිය මගින් ඉවත දමා තිබේ.
මන්නාරම, සිලාවතුර, මුරුක්කන් සහ ඉලුප්පකාඩවෛ පොලිස් ස්ථානාධිපති අධිකරණයට කරුණු කියා සිටියේ නොවැම්බර් 20 වැනිදා සිට 27 වැනිදා දක්වා කතෝලික පල්ලි හා හින්දු කෝවිල් ඇතුළු අනෙකුත් ආගමික ස්ථානවල මිය ගිය කොටි සාමජිකයන් සැමරීමට සුදානම් බැවින් ඒවායේ පැවත්වෙන පුද පුජා තහනම් කරන ලෙසයි.
අපරාධ නීති සංග්‍රහයේ විධි විධානයන්ට හා පවත්නා කෝවිඩ් නිරෝධායන නීති අනුව, විශේෂයෙන් මන්නාරමේ ශාන්ත සෙබස්තියන් පල්ලියේ ඇතුළු සෙසු ආගමික ස්ථානවල විශේෂ පුජා පැවැත්වීම තහනම් කරන ලෙස 19 සිකුරාදා ඔව්හු මන්නාරම් අධිකරණයෙන් ඉල්ලා සිටියහ.
එහෙත් ඊට එරෙහිව මන්නාරමේ ප්‍රකට නීතිවේදියකු වන බී.ඩෙනිස්වරන් ප්‍රමුඛ නිතිඥ කණ්ඩායමක් කරුණු දක්වමින් කියා සිටියේ දිනපතා පවත්වන දේව පුජාවන් හා වත් පිළිවෙත් සෞඛ්‍ය රෙගුලාසි යටතේ තහනම් කිරීමට ආණ්ඩුක්‍රම ව්‍යවස්ථාව යටතේ කිසිදු ඉඩක් නොමැති බවය.
නීතිඥ කණ්ඩායම පෙන්වා දුන් කරුණු සලකා බැලු අධිකරණය කතෝලික හා හින්දු ඇතුළු අනෙකුත් ආගමික ස්ථානයන්හි පුද පුජා කිසිදු බාධාවකින් තොරව, සෞඛ්‍ය උපදෙස් අනුව පැවැත්විය හැකි බවට නියෝග කරනු ලැබුවේ මන්නාරම් පොලිස් ප්‍රධානීන්ගේ ඉල්ලීම ප්‍රතික්ෂේප කරමින්ය.
එහෙත් මහවිරු සමරු, කොටි සංවිධානයේ ධජ හා ලාංජන යොදා ගනිමින් කිසිදු කටයුත්තක් නොකරන ලෙසද මන්නාරම් මහේස්ත්‍රාත් නියෝග කර තිබේ.
Facebook Comments
