දෙමළ මහවිරු සතිය නොවැම්බර් 21 දා ආරම්භ වීමත් සමගම අවසන් යුද්ධයේ ලේ ගලාගිය වන්නියේ සන්නද්ධ රැකවල් ආණ්ඩුව විසින් තවත් තරකොට තිබේ.
සෑම දෙදෙනකුටම එක සොල්දාදුවකු බැගින් ඉන්නා බවට ගණන් බලා ඇති මුලතිව් දිස්ත්‍රික්කයේ ස්ථාන ගණනාවකම අලුතින් සන්නද්ධ ආරක්ෂක කපොලු පිහිටුවා සමරු මෙහෙය පැවැත්වීමට එරෙහිව දැනට සියයකට වැඩි තහනම් නියෝග ලබාගෙන ඇති බව ප්‍රදේශවාසී ක්‍රියාධරයෝ පවසති.
ඔවුන් පවසන පරිදි යුද්ධයෙන් පසුව රජයේ ආරක්ෂක අංශ විසින් බිමට සමතලා කරන ලද මහවිරු සුසාන භූමි සියල්ලකටම පාහේ තහංචි දමා අලුතින් සෝදිසි කුටි ඉදිකර ඇති ආකාරය දැකගත හැකිය.
මුල්ලියාවලි මහවිරු සුසාන භූමිය ඉදිරිපිට, තේරාවිල් මහවිරු සුසාන භූමියට මුහුණලා ඇති මාර්ගය, අලම්පිල් මහවිරු සුසාන භූමිය ඉදිරිපිට සහ ඉරනප්පලෙයි මහවිරු සුසාන භූමිය අසල මංසන්ධිය එවන් ස්ථාන කිහිපයකි.
යුද්ධයෙන් මියගිය සාමාන්‍ය වැසියන් සැමරීම සඳහා ඉදිකර ඇති මුල්ලිවයික්කාල් ස්මාරකය අසල දෙදිනක සිට දවසේ පැය 24 පුරාම සන්නද්ධ පොලිස් භට කණ්ඩායමක් යොදවා ඒ කරා යන සියලු මාර්ගවල මුරකපොලු ඉදිකර සමරු භුමිය අවට අලුතින් ඉදිකර ඇති බැලු බැල්මට නොපෙනෙන ආකාරයේ මුරකුටිවල සිට සෝදිසි මෙහෙයුමක් සිදුකෙරෙන බවද ප්‍රදේශවාසීහු පවසති.
සමරු භූමිය අවට කෝවිල්, කිතුනු දේවස්ථාන සහ ප්‍රජා ශාලා අසලද භට පිරිස් යොදවා ඇත.
යුද වැදී මියගිය තම නෑසිය හිතවතුන් උතුරු නැගෙනහිර දෙමළ ජනතාව විසින් සමරනු ලබන දෙමළ මහවිරු සතිය නොවැම්බර් 21 සිට 27 දක්වා යෙදී තිබේ.
Facebook Comments
