ශවේන්ද්‍ර සිල්වාට ඇමරිකාවේ දොර වැසේ

0

නඩු නැති ඝාතන ඇතුළු යුද අපරාධ සහ බරපතල මානව හිමිකම් උල්ලංඝන සම්බන්ධයෙන් නැගී ඇති චෝදනා වල විශ්වසනීයත්වය පදනම් කොටගෙන ඇමරිකා එක්සත් ජනපදය විසින් යුද හමුදාපති ශවේන්ද්‍ර සිල්වා ඇතුළු සිය පවුලටම එරටට පැමිණීම තහනම් කර තිබේ.

එක්සත් ජනපද රාජ්‍ය ලේකම් මයිකල් පොම්පෙයෝ විසින් පෙබරවාරි 14 නිකුත් කරන ලද විශේෂ නිවේදනයකින් දැනුම් දී තිබුනේ ශ්‍රී ලංකාවේ සිවිල් යුද්ධයේ අවසාන අදියරේදී ශ්‍රී ලංකා යුද හමුදාවේ 58 වැනි සේනාංකය විසින් කරන ලද නඩු විභාගයකින් තොර ඝාතන ආදී බරපතල මානව හිමිකම් උල්ලංඝන සඳහා විධාන වගකීම තුලින් සම්බන්ධ වීම පිළිබඳ විශ්වසනීය තොරතුරු හේතු කොටගෙන එම තහනම පනවන බවයි.

ශවේන්ද්‍ර සිල්වා ප්‍රසිද්ධියේ නම් කිරීමට අමතරව ඔහුගේ පවුලේ සමීපතම සාමාජිකයන්ද නම් කර ඇත්තේ බරපතල මානව හිමිකම් උල්ලංඝන වලට හෝ සැලකිය යුතු දූෂණ වංචා වලට හෝ සම්බන්ධ බවට විශ්වාසනීය තොරතුරු තිබෙන පුද්ගලයන් ප්‍රසිද්ධියේ හෝ පෞද්ගලිකව නම් කිරීමට රාජ්‍ය ලේකම්වරයාට ඇති බලයට අනුව බවයි පෙන්වා දෙන්නේ.

එක්සත් ජනපදය හා ශ්‍රී ලංකාව අතර ඇති ද්විපාර්ශ්වික සම්බන්ධතාවය ශක්තිමත් කිරීමට මෙන්ම වර්තමානයේ ඇති හා ඉදිරියට මතුවිය හැකි තර්ජනවලට මුහුණ දීම සඳහා එහි ආරක්ෂක අංශ නැවත සකස් කිරීම සදහා දීමට ද කැමැත්ත පළ කර ඇති එක්සත් ජනපද රාජ්‍ය දෙපාර්තුමේන්තුව එම ආධාර වල මූලික අංගයක් ලෙස මානව හිමිකම්වලට ගරු කිරීමට ඇති අවශ්‍යතාවය ලෙස අවධාරණය කර ඇත.

ලොව පුරා මානව හිමිකම් උල්ලංඝනය කිරීම් සහ අපයෝජනයන් සිදු වූ විට ඒවා සිදුකළේ කවුරුන්ද යන්න පිළිබඳව සොයා බැලීමට එක්සත් ජනපදයේ ඇති සියලු බලධාරීන් සහ මෙවලම් භාවිතා කරනු ලබන බවද එක්සත් ජනපද රාජ්‍ය ලේකම් මයිකල් පොම්පෙයෝ විසින් නිකුත් කල ලද නිවේදයේ සඳහන්ව තිබේ.

මෙම ක්‍රියාවන් මගින් ඇමෙරිකානු එක්සත් ජනපදය අවධාරණය කරනුයේ සාමකාමී, ස්ථාවර සහ සමෘද්ධිමත් ශ්‍රී ලංකාවකට සහාය දැක්වීම සඳහා මානව හිමිකම් ප්‍රවර්ධනය කිරීමත් වැරදිකරුවන් සදහා වගවිමේ ක්‍රියාවලිය ප්‍රවර්ධනය කිරීම සහ සංහිඳියාව දිරිමත් කිරීමට බැඳී සිටින බවයි එම නිව්දනයේ වැඩි දුරටත් සඳහන් කර ඇත්තේ.

මේ අතර එක්සත් ජනපදය විසින් යුද හමුදාපති ශවේන්ද්‍ර සිල්වා ඇතුළු සිය පවුලටම එරටට පැමිණීම තහනම් කිරීම ගත් තීරණයට ශ්‍රී ලංකා රජය දැඩි ලෙස සිය විරෝධතාවය දක්ව තිබේ.

ඇමරිකාව විසින් පනවා ඇති මෙම කොන්දේසියට පාදක කර ගෙන ඇති කරුණු සත්‍යයෙන් තොර බවත් යුධ හමුදාපතිවරයාට එරෙහිව කිසිදු මානව හිමිකම් චෝදනාවක් නොමැති බවත් ශ්‍රී ලංකා විදේශ කටයුතු අමාත්‍යාංශය නිවේදනයක් නිකුත් කරමින් සඳහන් කර ඇත.

ලුතිනන් ජෙනරාල් ශවේන්ද්‍ර සිල්වා යුද හමුදාපති ධුරයට පත් වී මාස 6 කට පසුව මෙම සංචාරක තහනම පැනවීමේ කාලය සම්බන්ධයෙන් හා ජාතික ආරක්ෂාව සම්බන්ධයෙන් ප්‍රධානියා මෙන්ම මෙන්ම ප්‍රජාතන්ත්‍රවාදීව තේරී පත් වූ ජනාධිපතිවරයෙකු ගේ පරමාධිපත්‍යය පිළිබඳව විදේශීය රාජ්‍යයක් මේ අයුරින් ප්‍රශ්න කිරීම කලකිරීමට කරුණක් බවයි විදේශ කටයුතු අමාත්‍යාංශය සිය නිවේදනයෙන් කියා සිටින්නේ.

යුද හමුදාපති ශවේන්ද්‍ර සිල්වා හට ඇමරිකාව විසින් සිය රටට ඇතුල්වීමට තහනමක් පැනවු දිනට පසුදා එක්සත් ජනපද කොංග්‍රස් සභිකයින් පිරිසක් අග්‍රාමාත්‍ය මහින්ද රාජපක්ෂ හමුවී දෙරටේ දැනට පවතින සහයෝගීතාවන්ට අමතරව ත්‍රස්තවාදය පිටුදැකීම සංචාරක කර්මාන්තය සහ බලශක්ති යන ක්ෂේත්‍රවල සහයෝගීතාව ව්ර්ධනය කර ගැනීම ගැන සාකච්ඡා පවත්වා ඇත.

Facebook Comments

wedding people