හතලිස් වසරක් තිස්සේ නවතා දමා තිබු මරණීය දණ්ඩණය ක්‍රියාත්මක කිරීමට රජය ගත් තීරණය කුමන අන්දමකින්වත් වෙනස් නොකරන බව ජනාධිපතිවරයා පවසයි.
මත්ද්‍රව්‍ය ජාවාරම්කරුවන්ට මරණීය දණ්ඩනය ලබාදීම පිළිබඳ රජය ගත් තීන්දුව නවතා දමා ඇති බවට, මෙම ඉරිදා ජාතික පුවත්පතක සඳහන්ව ඇති ප‍්‍රවෘත්තිය අසත්‍යක් බව පැවසු ජනාධිපති මෛත්‍රීපාල සිරිසේන කුමන අන්දමේ විරෝධතා මතුවුව ද මත්ද්‍රව්‍ය ජාවාරම්කරුවන්ට මරණීය දණ්ඩනය ක්‍රියාත්මක කරන බවයි අවධාරණය කරන්නේ.
චීන රජයෙන් ලැබුණු පූර්ණ පරිත්‍යාගයක් අනුව පොළොන්නරුවේ ඉදිකෙරෙන චීන – ශී‍්‍ර ලංකා මිත‍්‍රත්ව ජාතික වෘක්කවේද විශේෂිත රෝහලේ ඉදිකිරීම් ආරම්භ කිරීමට එක් වෙමින් 21 සෙනසුරාදා ජනාධිපතිවරයා මේ බව ප‍්‍රකාශ කළේය.
නීතිි, බන්ධනාගාර, අධිකරණ යන අදාළ ක්ෂේත‍්‍රවල ප‍්‍රධානීන්ගේ සාකච්ඡාවක් තමා විසින් ලබන අඟහරුවාදා දින කැඳවා තිබෙන බව පැවසු ජනපති එම සියලු ක්ෂේත‍්‍ර නියෝජනය වන පරිදි කමිටුවත් පත් කරන බවත්, මරණීය දණ්ඩනය ලබාදිය යුතු පුද්ගලයින්ගේ නම් සහ එම දින වකවානු එම කමිටුව විසින් තීරණය කරනු ඇති බව ද කියා සිටියේය.
මත්ද්‍රව්‍ය ජාවාරම්කරුවන්ට මරණීය දණ්ඩනය ලබාදීම පිළිබඳ විරෝධතා ඉදිරිපත් කරන කිසිවෙකු මෙම ව්‍යසනය වළක්වා ගැනීමට කිසිදු සහයෝගයක් ලබා නොදීම කණගාටුවට කරුණක් බව කී ජනපති සිරිසේන මත්ද්‍රව්‍යවලින් රටට සිදුවන විනාශය වළක්වා ගැනීමට තමා සමග එක්වන ලෙස එම සියලු දෙනාට ආරාධනා කරන බව පැවසුහ.
ශ්‍රී ලංකා මානව හිමිකම් කොමිසම, ශ්‍රී ලංකාවේ යුරෝපා සංගමය සහ ප්‍රබල තානාපති කාර්යාල කිහිපයක්ම මරණ දණ්ඩනය ක්‍රියාත්මක කිරීමට ගත් තීරණය ආපසු හරවන ලෙසට ජනාධිපතිවරයාගේ ලිඛිතව ඉල්ලා තිබුණි.
Facebook Comments
