හමුදාපතිට පමණක් දෙවෙනි වු නිලයක් දරන ශ්‍රී ලංකා යුද හමුදාවේ සෙන්පතියෙකු විදේශයක දී අත්අඩංගුවට ගැනීමේ අවදානමට මුහුණ පා සිටී.
ශ්‍රී ලංකා යුද හමුදාවේ අලුත් හමුදා මාණ්ඩලික ප්‍රධානියා ලෙස උසස් වීමක් ලද මේජර් ජෙනරාල් ශවේන්ද්‍ර සිල්වා යුද සමයේ සිදු කරන ලද සාපරාධී ක්‍රියා සම්බන්ධයෙන් වගකිව යුතු සේනාංකයකට අණ දුන් නිලධාරියකු ලෙසින් එක්සත් ජාතීන් විසින් නම් කොට ඇතැයි පෙන්වා දෙන දේශීය හා ජාත්‍යන්තර සංවිධාන ගණනාවක් එම පත් කිරීම හෙලා දකිමින් ඔහුට එරෙහිව ජාත්‍යන්තර අධිකරණ බලය යොදවන ලෙස දැඩි ලෙස බලකර තිබේ.
ඔහු අණ දුන් 58 සේනාංකය මාස කිහිපයක කෙටි කාලය තුලදී දස දහස් සංඛ්‍යාත නිරායුද වැසියන් මරුමුවට පත් කරමින් රෝහල් වලට, කෑම පෝලිම් වලට සහ අනාථ කඳවුරු වලට 2009 දී හිතාමතා අඛණ්ඩ ප්‍රහාර එල්ල කළ බව එක්සත් ජාතීන්ගේ සංවිධානය විසින් සිදුකළ විමර්ශනයක දැක්වෙයි.
කාන්තාවන් සහ දරුවන් ද ඇතුළු පුද්ගලයන් නඩු නැතිව ඝාතනය කිරීම, සිය ගණනක් බලහත්කාරයෙන් අතුරුදහන් කිරීම මෙන්ම වධහිංසා සහ ලිංගික ප්‍රචණ්ඩතා වලට සම්බන්ධ වීම ගැනද මේජර් ජෙනරාල් සිල්වාගේ සෘජු අණදීම යටතේ පැවති ඒකක චෝදනා ලබා සිටී.
සුදු කොඩි රැගෙන පැමිණ භාර වීම ආරක්ෂා සහගත බවට ආණ්ඩුවෙන් දුන් සහතිකයක් විශ්වාස කොට ආ එල්ටීටීඊයේ දේශපාලන අංශ ප්‍රධානී බාලසිංහම් නඩේසන් සහ සාම කාර්යාංශ ප්‍රධානී සීවරත්නම් පුලිදේවන් ඇතුළු පිරිසක් 2009 මැයි මාසයේ නඩු විභාගයකින් තොරව ඝාතනය කිරීම නව හමුදා මාණ්ඩලික ප්‍රධානියාට එල්ලවී තිබෙන චෝදනාවකි.
සෙන්පති ශවේන්ද්‍ර සිල්වා යුද හමුදා මාණ්ඩලික ප්‍රධානියා ලෙස පත් කිරීමට ජනාධිපතිවරයා ගත් තීරණය “කම්පා කරවන සුළු බාල ගනයේ නව වාර්තාවක්” ලෙස දකුණු අප්‍රිකාවේ ජොහැන්නස්බර්ග් නුවර මුලස්ථාන කොටගත් සත්‍යය හා යුක්තිය සඳහා වන ජාත්‍යන්තර ව්‍යාපෘතිය විසින් හඳුන්වා දී ඇත.
“විදේශගත වන සෑම අවස්ථාවකම අත් අඩංගුවට ගැනීමේ අවදානමට මුහුණ පා සිටින යුද හමුදා මාණ්ඩලික ප්‍රධානියකු දැන් ශ්‍රී ලංකාවේ සිටී. ඒ, ඔහුට වීසා ලබා දීමට තරම් අනුවණ රටක් ඇතිනම් ය,” යි ශ්‍රී ලංකාවේ ITJP විධායක අධ්‍යක්ෂිකා යැස්මින් සූකා ප්‍රකාශ කළාය.
යුද හමුදා මාණ්ඩලික ප්‍රධානී ශවේන්ද්‍ර සිල්වා හට ජාත්‍යන්තර යුද අධිකරණයේ නඩු පැවරීමට ඕනෑ තරමටත් වඩා සාක්ෂි තමන් සතුව පවතින බව පවසන ITJP සංවිධානය “ශ්‍රී ලංකාවේ වඩාත්ම ඕනෑ කර තිබෙන පුද්ගලයා මොහු බවට තර්ක කළ හැකිය. ඉතාම කනගාටුදායක කරුණ වන්නේ, දශකයක් ගතවී තිබියදීත්, ඔහුට නඩු පවරනු වෙනුවට තව තවත් උසස් කරනු ලැබීමයි.” යනුවෙන් ප්‍රකාශ කරයි.
උසස් වීම් ලබා දෙනු වෙනුවට ශවේන්ද්‍ර සිල්වාට එරෙහිව රට තුල නඩු පවරන ලෙස සත්‍යය හා යුක්තිය සඳහා වන ජාත්‍යන්තර ව්‍යාපෘතිය (ITJP) ශ්‍රී ලංකාවේ නීතිපතිවරයාට යෝජනා කරයි.
Facebook Comments
