ශ්‍රී ලංකාවේ විශ්වවිද්‍යාල වලට අතීතයේ ජාත්‍යන්තරයේ හිමි වී තිබූ තත්ත්වය මේ වන විට පහත වැටී ඇති බැවින් ශ්‍රී ලංකාවේ විශ්වවිද්‍යාල නැවතත් ජාත්‍යන්තර මට්ටමට ගෙන ඒම සෑම උප කුලපතිවරයෙකුගේම වගකීම බව අගමැති රනිල් වික්‍රමසිංහ පවසා තිබේ.
විශ්වවිද්‍යාල ගොඩනැගිලි ඉදිකිරීම සඳහා ප්‍රමුඛත්වය ලබාදීම වෙනුවට උසස් අධ්‍යාපනයේ ගුණාත්මක භාවය ඉහළ නැංවීම සඳහා අවශ්‍ය පියවර ගන්නා ලෙස අගමැතිවරයා විශ්වවිද්‍යාල උපකුලපතිවරුන්ගෙන් ඉල්ලා සිටියේ 14 බ්‍රහස්පතින්දා අරලියගහ මන්දිරයේ පැවැති සාකච්ඡාවක දීය.
පශ්චාත් උපාධි අධ්‍යයන හා පර්යේෂණ ක්ෂේත්‍ර පුළුල් කිරීම සඳහා අවශ්‍ය පියවර ගැනීමටත්, විදේශ විශ්වවිද්‍යාල සමඟ සම්බන්ධතා වැඩිදියුණු කරගනිමින් හවුල් අධ්‍යයන පාඨමාලා හඳුන්වාදීමටත් කටයුතු කරන ලෙස අගමැතිවරයා මෙහිදි උපකුලපතිවරුන්ට උපදෙස් ලබා දී ඇත.
නවක වදයෙන් නිදහස් කිරීම
විශ්වවිද්‍යාල වල ක්‍රියාත්මක වන නවකවදය තුරන් කිරීම සඳහා අවශ්‍ය කඩිනම් පියවර ගත යුතු බව පෙන්වා දී ඇති අගමැති රනිල් වික්‍රමසිංහ අවශ්‍ය නම් විශ්ව විද්‍යාලවලට අලූතින් සේවකයින් බඳවා ගෙන හෝ නවකවදය තුරන් කර සිසුන්ට නිදහසේ සිය අධ්‍යාපන කටයුතු කිරිමට අවස්ථාව සලසා දෙන මෙන් ඉල්ලා තිබේ.
එසේම විශ්වවිද්‍යාල සිසුන් පන්ති වර්ජනයට නොව අධ්‍යාපනය සඳහා යොමු කළ යුතු බව පවසා ඇති අගමැතිවරයා සංවර්ධන උපායමාර්ග හා ජාත්‍යන්තර වෙළෙඳ අමාත්‍යාංශය හරහා දේශීය විශ්වවිද්‍යාල විදේශයන්හි ප්‍රවර්ධනය කිරීමට අවශ්‍ය කටයුතු යොදන ලෙසට උපකුලපතිවරුන්ට දැනුම් දී ඇත.
Facebook Comments
