එදා මෙදා පාර්ලිමේන්තුවේ කිව්ව හොඳම කුණුහරුප ටික

0

සිංහලෙන් කිව්වත්, ඉංග්‍රීසියෙන් කිව්වත් කුණුහරුප කුණුහරුපමය. ලංකා පාර්ලිමේන්තුවේ ඇති තරම් කුණුහරුප, අවලාද, අසභ්‍ය වචන, කියා ඇත. ඒ කුරුහරුප වර්තමානයේ අතිශයින් ග්‍රාම්‍ය වූ අතීතයේ බොහෝ විට තියුණු හා කර්කෂ වූවේය. ‘කුණුහරුප‘ පාර්ලිමේන්තුවට අපකීර්තියක් ඇති කලා පමණක් නොව විටෙක රාජ්‍ය තාන්ත්‍රික ප්‍රශ්න ද ඇති කළේය. මේ එදා මෙදා පාර්ලිමේන්තුවේ කුණුහරුප පුරාණය යි.

එදා මෙදා කුණුහරුප කී ආකාරය දේශපාලන පක්ෂ නායකයින්ගේ අගමැති, විපක්ෂ නායක ගේ රසාස්වාදනය, ශිෂ්ඨත්වය අනුව විචලනය වී ඇත. සිංහල භාෂාවෙන් වැඩියෙන්ම අසභ්‍ය හෝ ශිෂ්ඨ නොවන වචන කියූ පුද්ගලයින් අතර අනුර බණ්ඩාරනායක, ආර්.ප්‍රේමදාස, වාසුදේව නානයක්කාර, එස්.බී. දිසානායක, සිරිල් මැතිව්, මංගල සමරවීර, ඊරියගොල්ල, කැපී පෙනෙති.

දහයේ – එකොළහේ පාසල් දරුවන්ගේ මට්ටමේ කුණුහරුප පළමු වරට කිව්වේ බදුල්ලේ තිස්සකුට්ටිආරච්චිය. ලංකාව කාන්තා හිංසනයට ඉඩ ඇති රටක් බව එක්සත් ජාතීන්ගේ මානව හිමිකම් කවුන්සිලයේ 46/1 යෝජනාවේ ද දැක්වේ.

තිස්සකුට්ටි ආරච්චි ගේ බටු, ගහල, පලා කතාව ආණ්ඩු පක්ෂයේ සංවිධායකවරයාගේ අතිරේක කාලය අනුග්‍රහයෙන්, මුලසුනේ අඳ, බිහිරි ආශිර්වාදයෙන්, කථානායකවරයාගේ අනුකම්පාවෙන් රඟ දැක්වූවේය. එය යුරෝපා සංගමයේ ජීඑස්පී සහනය, මානව හිමිකම් කොමිසමේ අතුරු කතාවලට දැනටමත් උදාහරණයක් වී ඇත.

2021 දෙසැම්බර් 3 දා, මනූෂ නානායක්කාර ට ආණ්ඩු පක්ෂයේ සංවිධානය ජොන්ස්ටන් ප්‍රනාන්දු, ලොහාන් රත්වත්ත ඇතුළු පිරිසක් අමු තිත්ත කුණුහරුපයෙන් බැන්නෝය. ඒ කිසිවක් හැන්සාඩ්ගතවී නැත. මේ හැන්සාඩ්ගතවී ඇති පාර්ලිමේන්තු කුණුහරුප ගැනයි.

සිරිමා බණ්ඩාරනායක දේශපාලන ආගමනය

අගමැතිනි සිරිමාවෝ බණ්ඩාරනායක මහත්මිය අග්‍රාමාත්‍ය ධූරයට පත්වීමත් සමඟ 1960 ජූලි හෝ ඒ ආසන්නයේ දිනෙක, කුලියාපිටියේ (හෝ ඒ පැත්තේ තැනක) රැස්වීමක දී හිටපු අමාත්‍ය ඊරියගොල්ල මහතා ඇයට බලවත් අපහාසයක් සිදු කළේය. එහි වචන අර්ථය (බණ්ඩාරනායක මැතිතුමා මිය ගොස් ඇති නමුත්) ‘මේ ගෑණිට පාර්ලිමේන්තුවේ බබ්බු හම්බවෙයි‘ ‘මෙයාට ළමයෙක් හම්බවෙන්න ඉන්නේ‘ යන්නය. ඒ රැළියේම ආර්.ප්‍රේමදාස කිව්වේ සිරිමා පාර්ලිමේන්තු පැමිණි විට ‘මාසයකට සැරයක් පාර්ලිමේන්තුවේ පුටුව සෝදන්නට වෙයි‘ කියා ය.

එදා එ.ජා.ප. නායක ඩඩ්ලි සේනානායක මේ කතාවට කැමති වූවේ නැත. ඔහු ඊරියගොල්ලට හා ප්‍රේමදාසට නියෝග කළේ තමන් රැස්වීමට එන්නට පෙර කතා පවත්වා පිටව යන ලෙස හෝ තමා රැස්වීමෙන් ඉවත්වූ පසුව ඕනෑ කුණුහරුපයක් කියා ගන්නා ලෙසය. ඩඩ්ලි තමන් වේදිකාවේ සිටින විට කුණුහරුප කියන්නට දුන්නේ නැත. පාර්ලිමේන්තුවේ දී රවා බලා ඒවා නැවැත්වීය.

කතානායක ශ්‍රීමත් මොලමුරේ සහ මියුරියෙල් අසරප්පා ගේ අනියම් සම්බන්ධතාව ගැන කවි 14 ක කැලෑපත්තරයක් නිකුත් විය. එහි එක කවියක් පාර්ලිම්න්තුවේ කියන්නට මන්ත්‍රීවරයෙකු උත්සහ දරා ඇත. ඒ කවිය,

කවුන්සිලේ වැජඹෙන ධනපති රොත්ත
කම්කරු ගොවින් මිරිකා මොළ කන හැත්ත
දැන් දැන් දිග ඇරෙයි කොයි කාගෙත් ඇත්ත
මොලමුරේ මැතිඳු ලේව්වලු ලීලගේ හු. |.ත් | . ත

ඔය කවියේ අවසන් වචනයට වූ ස්ත්‍රී ලිංගයට කියන සමාන පදය එජාප රැළි, රැස්වීම්වල නිතර ඇසුණි. ‘හැත්තෑ හතේ හු….. ති නැතේ‘ 1977 එජාප මැයි රැළියේ ජනප්‍රිය ම සටන් පාඨය යි.

‘සිරිමා සව්දන හෙවත් සිරිමාගේ හා ඇල්ලිස් හාමුගේ විස්තරය‘, විමලා විජයවර්ධනට එරෙහි කැලෑ පත්තර යේ කෑලි පාර්ලිමේන්තුවේ කියවා ඇත. (රජුන් තැනීමේ කලාව – දේශපාලන සන්නිවේදනය කෘතියේ මා මේ ගැන දීර්ඝව ලියා ඇත) ලංකා පාර්ලිමේන්තුව නියෝජනය කළ මන්ත්‍රීවරියන් ලැයිස්තුව මෙහි කමෙන්ටුවක් ලෙස දමා ඇත. මෙයින් බහුතරයක් පාර්ලිමේන්තුවෙන් පිටත වාචික හිංසනයට ලක්ව ඇත.

වාසුදේව ගේ සන්නාම සටහන

රත්නපුර දිස්ත්‍රික් මන්ත්‍රී වාසුදේව නානායක්කාර 2015 මැයි 21 පාර්ලිමේන්තුවේ දී අගමැති රනිල් වික්‍රමසිංහට ‘ප |ක |යා‘ කිවේය. රනිල් එය ගණන් නොගෙන ‘‘ඔබේ රැවුල කපාගන්න. එතකොට මොළේ පෑදෙයි. යැයි කීවේය.
එදා වාසුදේව ගේ කතාව ලංකාදීප පුවත්පත් වාර්තා කළේ මෙහෙමය.

කතානායකතුමා මට අවසර දුන්නාම මේ මිහිහා කෙළගෙන කෙළගෙන යනවා. මේ පිස්සව වාඩි කරන්න. මේ පිස්සව වාඩි කරන්න. මාව වාඩි කරන්න? උඹට පුළුවන්ද මාව වාඩි කරන්න‘ …………….. (පකයා)? මාව වාඩි කරන්න බෑ. (පකයා).. පිස්සු කෙළින්න එපා ඕයි. මේ පාර්ලිමේන්තුවට ගරු කරනවා.

කතානායක (චමල් රාජපක්ෂ) ‘ගැලරියේ පාසල් ළමයින් ඉන්නවා. මේක පුරුද්දකට ගනියි. කියාය. කෙසේ නමුත්, ප / ක/ යා කතාව සාධාරණීකරණය කළේ එය දකුණේ උප භාෂා ව්‍යවහාරයක් බව කියමිනි.

වාසුදේව ගේ ‘පකයා විඩියෝව‘ මෙතැනනින් නරඹන්න.

දඹරාවේ රතනසාර හිමියන් ඝාතනය වූවේ 1966 ජනවාරි දවසකය. මේ පිළිබඳ පාර්ලිමේන්තු විවාදයේ දී අගමැති ඩඩ්ලි සේනානායක ඉතා හැඟීම්බර කතාවක් කළේය. ‘අගමැති බණ්ඩාරනායක මහතා ඝාතනය කළ බව‘ අගමැතිවරයා කියන විට එදා විපක්ෂයේ දෙවැනියා ලෙස සැලකුණු මැදවච්චිය මන්ත්‍රී මෛත්‍රීපාල සේනානායනායක ඇසුවේ ඉංග්‍රීසියෙන් Who? යැයි ඇසුවේය. අගමැති ඩඩ්ලිට මෙය ඇසුනේ ‘YOU‘ එනම්, ‘ඔබ/තමුසේ‘ යන හඬිනි. කෝපයෙන් ඉහවහා ගිය ඩඩ්ලි කතාව නවතා පාර්ලිමේන්තුවේ එහා පැත්තටම ගොස් මෛත්‍රීපාල ට ගහන්න පැන්නේය. ඔහු එල්ල කළ පහර ඇන්.ඇම්.ගේ උරහිසට උඩින් ගිය බවත්, ඉලංගරත්න ඇතුළු පිරිස මැදිහත්ව අගමැතිවරයා සන්සුන් කර ඇත්තේය.

මෛත්‍රීපාල ‘කවුද? යන්නට ඇසු විට එය අගමැතිට ‘ඔබ/තමුසේ‘ යැයි ඇසුණු බව අගමැතිවරයාට පහදා දී ඇත්තේ යාබඳ අසුනේ සිටි ජේ.ආර්. ජයවර්ධන විසිනි. අගමැතිවරයා නිහතමානීව වහා නැගිට සිද්ධිය සම්බන්ධයෙන් සමාව ඉල්ලුවේ තමා ට එය වැරදියට ඇසුණු බව පවසමින් සැබෑ මහත්තයෙකු ලෙසය.

තම වරද අවබෝධ වූ විට එදා සිටි අගමැතිවරයා පවා සමාව ගන්නට පැකිලුනේ නැත. අපහාස කිරීමේ චේතනාවක් නොති බූ නිසා ඔවුන් මහත්වරුන් ලෙස කටයුතු කළහ.

ලේක් හවුස් පත්තරවල කොලාට් ‘සිරිමා සහ හවුල් ආණ්ඩුව‘ ගැන ඇදි කාටුන් ගැන පාර්ලිමේන්තුවේ කතා වුණේ පුවත්පත් කොමිසම් විවාදයේ දී ය. කාටුන්වල තිබූ දෑ තරමට විවාදය, පත්තර පනතේ ඡන්ද විමසීමේ ප්‍රතිඑලය ද ශිෂ්ඨ වූවේ නැත.

ප්‍රේමදාස – අනුර හටන

ලංකා පාර්ලිමේන්තුවේ එක දිගට ඇදුණු අසභ්‍ය, අශිෂ්ඨ සංවාද මාලාව සිදුව ඇත්තේ අගමැති ආර්.ප්‍රේමදාස සහ මන්ත්‍රී/විපක්ෂ නායක අනුර බණ්ඩාරනායක අතර ය. 1977 මහා මැතිවරණ ව්‍යාපාරයේ දී අනුර විසින් ප්‍රේමදාස හැදින්වූවේ, ‘කෙහෙල්වත්තේ ලැවරිය විකුනපු අම්මගේ පුතා‘ කියා ය. ප්‍රේමදාස 77 ආණ්ඩුබලය ලබා සිය පළමු පාර්ලිමේන්තු කතාවේ දී ම එය පිළිතුරු දුන්නේ ‘වලව්වක අවජාතක පුතෙක් වෙලා ඉපදුනාට වඩා පැල්පතක සහජාතක පුතෙක් වුනු එක ගැන ආඩම්බරයි‘ කියන අර්ථයෙන්. (වැදගත් පවුලක සුජාත පුතෙක් වෙන එක හොඳයි වලව්වක අවජාතක පුතෙක් වනවට වඩා – යැයි ද මෙය ලියවී ඇත.) මේ හැන්සාඩ් වාර්තාව සොයා ගැනීමට දැරූ උත්සහය සාර්ථක වූවේ නැත.

අනුර බණ්ඩාරනායක මස්කෙළිය ආසනයේ සංවිධායක විදිහට පත් කිරීමේ පුවත ඇත්ත පළ කළේ ‘අනුර මස් කෙළියට මරු‘ කියා ය. කියවන වේගයට එහි අරුත ඔබට නොතේරෙන්නට ඇත. එජාප ප්‍රචාරක යාන්ත්‍රණය අනුර සල්ලාලයෙකු – සම ලිංගිකයෙකු ලෙස හැදින්වූ යුගයේ ‘අනුර මස් කෙළියට මරු‘ කියන කතාව තෙරෙන්නට ටිකක් වෙලා යන්නේය. අනුරට ‘පට්ටිගොනා‘ යැයි කීවේ දේශපාලන වේදිකාවේ දී පමණක් නොවේ. සිරිල් මැතිව් මෙවැනි කතා කියූ අය අතර ප්‍රමුඛයෙකි.

අනුර – ප්‍රේමදාස ගැටුම දිගින් දිගටම ඇදුණි. ඒ ගැන 2021 ඔක්තෝබර් මස 12 දින පැවති සිරිමා බණ්ඩාරනායක මැතිණියගේ ගුණ සමරු උත්සයේ දී හිටපු මන්ත්‍රී ඩ්ව් ගුණසේකර එතෙක් සීමිත පිරිසක් පමණක් දැන සිටි මේ අපූරු කතාව ප්‍රසිද්ධියේ පැවසීය.
“සිරිමාවෝ මැතිනිය විපක්‍ෂනායක ලෙස සිටියදී අගමැති ප්‍රේමදාස මහතා සහ අනුර බණ්ඩාරනායක මහතා අතර පාර්ලිමේන්තුවේ ඇතිවූ ගැටුමක් දුර ගියා. අනුර ඒ අවස්ථාවේ අගමැතිවරයාට අසභ්‍ය ආකාරයෙන් කතා කළා. මැතිනිය රූපවාහිනී තිරයෙන් එය බලා සිට අනුරට එන්න කියන්නැයි වේත්‍රධාරීවරයාට පැවසුවා. අනුර බණ්ඩාරනායක මහතා ආ සැණින් ඇය ඔහුගේ කම්මුලට පාරක් ගසා ‘අගමැතිට කතා කරන්නේ එහෙමද?’ කියා ඇහුවා. එය අම්මා කෙනෙක් වගේම දේශපාලන නායිකාවක් ලෙස කියාදුන් පාඩමක්. ඊට පසු අනුර අගමැති ප්‍රේමදාස මොනවා කීවත් සිනා මුහුණින් ඒවාට සවන් දුන්නා.”

ඩිව් ගුණසේකර එසේ පැවසුවත් අනුර – ප්‍රේමදාස ගැටුම දිගින් දිගටම තිබුණා. ලංකාවේ පාර්ලිමේන්තුවේ බිහි වූ විශිෂ්ඨම විපක්ෂ නායකවරයෙකු බවට අනුර බණ්ඩාරනායක පත්වන්නේ ය. අනුර බොහෝ විට දෙපැත්ත කැපෙන කතා කිව්වේ ඔක්ෆර්ඩ්/කේම්බ්‍රිජ් ඉංග්‍රීසියෙනි. ඒ දවස්වල අනුර බණ්ඩාරනායක පාර්ලිමේන්තුවේ කතා කරන්න දවසට විශිෂ්ඨතම ඉංග්‍රීසි භාෂා පරිවර්ථකයා ගෙන්වා ගන්නට වේත්‍රධාරීවරයා කටයුතු කර ඇත්තේ මොන පොතෙන් කුමක් උපුටා දක්වයිද? එය කෙසේ පරිවර්ථනය කරන්නේ ද? යන අවදානම නිසාය. අනුර පාර්ලිමේන්තුවේ ඉංග්‍රීසියෙන් කියූ අවකැපෙන කතා වියතුන්ට මිස සාමාන්‍ය මිනිසුන්ට තේරුණේ ද නැති බව ඩේලි නිවුස් කර්තෘ අජිත් සමරනායක ද වරක් පැවසීය.

මේ ගැන ගාමිණී ගුණසේකර, 2021 මාර්තු 7 ‘ද අයිලන්ඩ්‘ පුවත්පතට මෙසේ ලියා තිබේ. අනුර කතාකරන විට ප්‍රේමදාස පාර්ලිමේන්තුවෙන් නැගිට යන පුරුද්දක් පසු කළෙක ඇති වූ බව ප්‍රකට කරුණකි.( Anura led his attack to the great discomfiture of the UNP leadership. Mr Premadasa dominated Parliament through his oratory. But Anura’s verbal attacks were so sharp and reasoned that Premadasa used to leave the chamber when Anura rose to his feet.) ද අයිලන්ඩ් 2021 මාර්තු 7

මේ උත්සවයේ දී ඩ්ව් ගුණසේකර මෙසේ පැවසුවා.

‘‘මැතිනියට පාර්ලිමේන්තුවේ වැඩියෙන්ම අපහාස කළේ ප්‍රේමදාස මහතායි. ඒත් මැතිනිය ඒවා හිතේ තියාගෙන හිටියේ නැහැ. මොනවා වුණත් ප්‍රේමදාස මහතා අගමැති කියන තැන සිට කටයුතු කළා. ඇය රාජ්‍ය නායිකාවක් ලෙස හැසිරුණු ආකාරය ඉතා ආදර්ශමත්. ඒ කාලේ පාර්ලිමේන්තුවේ මොන තරම් ගැටුම් වුණත් ඇය, ඩඩ්ලි සේනානායක වැනි නායකයන් පිටුපස හැරී බැලූ සැනින් සභාව නිහඬ වෙනවා. අද ජනාධිපතිතුමා, අගමැතිතුමා හැරිලා බැලුවට කවුරුත් තුට්ටුවකට ගණන් ගන්නේ නැහැ.”

ඇත්තටම, අද පාර්ලිමේන්තුවේ සිදු වන ප්‍රහාරයන් බහුතරයක් සිදුවන්නේ පක්ෂ නායකයින්ගේ අවශ්‍යතාවට ඔවුන්ගේ දිරිගැන්වීම යටතේ ය. මහින්ද රාජපක්ෂ සිටි වේදිකාවේ ආචාර්ය මර්වින් සිල්වා බොහෝ දෙනාට කුණුහරුප කියා ඇත. 1994 ජනාධිපතිවරණයේ අනුර බණ්ඩාරනායක මුලසුන දැරූ වේදිකාවේ දී මර්වින් සිල්වා චන්ද්‍රිකා ගේ දරුවන් දෙදෙනාගෙන් එක් අයෙකුගේ පියා තමන් බව නොකියා කීවේය.

ප්‍රේමදාස – අනුර ප්‍රකට අව කතා අතර, පාර්ලිමේන්තුවේ දී අගමැති ප්‍රේමදාස ලබාදුන් පිළිතුරක් සම්බන්ධයෙන් අනුර බණ්ඩාරනායක වරක් ‘I’m not satisfy with your answer’ යැයි පවසනු ලැබූ සිද්ධිය සුවිශේෂ වන්නේය.
එයට ප්‍රේමදාස ගේ පිළිතුර වූවේ ‘No one can satisfy you!‘ යන්න ය.

මොහොතකින් අනුර ගේ මුවින් පිටවූවේ ‘Only your wife can satisfy me!‘

තමන්ගේ මුවින් නුසුදුසු දෙයක් පිටවූ බව අවබෝධ කොට ගත් අනුර, වහා පාර්ලිමේන්තුවෙන් පිටවන විට Good one පුතා Good one යැයි කියමින් අනික් පස දොරටුවෙන් අනුර පිටුපස දුව ආවේ ප්‍රේමදාස මහතා සමඟ ඒ වන විට ගැටෙමින් සිටි ඊ.එල්.සේනානායක අමාත්‍යවරයාය. එදා කථානායක පුටුවේ සිටි බාකීර් මාකර් වහා එම කතාව හැන්සාඩ් එකෙන් ඉවත් කළා පමණක් නොව සෑම පුවත්පතකටම එය වාර්තා නොකරන ලෙස ද දැනුම් දෙනු ලැබීය.

එදා ‘ජනදින‘ පමණක් මේ සිද්ධිය වාර්තා කර තිබුණි.

කැස්බෑවේ සෝමවීර චන්ද්‍රසිරි ට කවි මඩුවක දී ප්‍රකට සහ සුන්දර කිවිදියක වන සෝමා උඩබාගේ මන්ත්‍රීවරයාගේ කාන්තා ඇසුර ගැන විවේචනයක්, අපහාසයක් වන ලෙසට කවි කිහිපයක් ගායනා කරලා තියෙනවා. සෝමා උඩබාගේ ගේ කවි සිනාමුසුව අසා සිටි සෝමවීර චන්ද්‍රසිරි එයට පිළිතුරු දී ඇත්තේ ද පහත කවියෙනි.

සෝමා උඩබාගේ සෝමා උඩබාගේ
පැයකට දෙනවද උඹෙ යටබාගේ

මේ කවි දෙපද සභාවේ කුමන කුමන තත්වයක් ඇති කරන්නට ඇති දැයි සිතා ගැනීම ඔබට බාරය.

නමුත්, සෝමා උඩබාගේ කියන්නේ ලේසියෙන් පරාජය බාරගන්නා කිවිඳියක් නොවේ. ඇය ලංකාවට බතික් කලාව හදුනා දුන් කෙනා. පේරාදෙණියේ තම්බපන්නී කලායතනයේ ප්‍රේමකුමාර එපිටවෙල ගේ බිරිඳ. ඇයගේ පිළිතුරු ඊටත් වඩා රසවත් ය.

ඔය වයසට මොනවටදෝ යට බාගේ
ඕනම නම් දෙන්නම් මගේ පසුබාගේ
(* මෙහි පසුබාගේ යනු පස්සා පැත්තයි)

මේ කවියේ අවසන් පදය වෙනස් විදිහකටද සමහර තැන්වල හමුවෙනවා.
ඔය වයසට මොටදෑ තට යට බාගේ
ඕනම නම් ලෙවකන් මගේ පසු බාගේ

සෝමා උඩබාගේ ගේ කවිය මෙලෙසින් වූ බවත් සමහර තැන්වල සඳහන් වෙනවා.

මේ කතාව තවත් කවියෙකු වූ දඹුල්ලේ තෙන්නකෝන් මන්ත්‍රී අතින් පාර්ලිමේන්තුවේ (හෝ වෙනත් සභාවකදැයි නිශ්චිතව නොදනිමි) කියැවී උසුළු විසුළු එහා මෙහා වී ඇත්තේය. මේ කතාව වරක් පාර්ලිමේන්තුවේ දී ද දිගහැරී ඇත. එය ලැබුණු දිනෙක දින වකවානු සහිතව ලියන්නට හැකිය.

තිස්සකුට්ටිආරච්චිගේ පාර්ලිමේන්තු කතාවට රෝහිණී කවිරත්න දුන් පිළිතුර ඇයගේ ෆෙස් බුක් පිටුවේ විය. එයට කමෙන්ටුවක් ලෙස කිසිවෙකු ලියා තිබුණේ, ඝාතනයට ලක් වූ බණ්ඩාරනායක මහතා, එම ඝාතන කුමන්ත්‍රණයට සම්බන්ධ වූ විමලා විජේවර්ධනයට පාර්ලිමේන්තුවේ (හෝ රැස්වීමක) පහත කවියෙන් අපහාසයක් කළ බව ය.

අනේ
පනේ
තනේ
වැනේ

මේ කවිය පාර්ලිමේන්තුවේ කියවී ඇතැත් ඒ බණඩාරනායක මහතා හෝ එහි ඉලක්කය විමලා විජේවර්ධන නොවේ. පාඨකයාගේ කමෙන්ටුවේ කරුණු සත්‍යයක් නොවේ. හැලපයා බ්ලෝග් පිටුවේ සඳහන් වන්නේ මේ කතාව මුනිදාස කුමාරතුංග විසින් කියන ලද බවත්, ඒ ගැන කිවිඳියක් කළ අභියෝගයට කියූ හිටිවන කවියක් බවය. ඇයට එම කවියෙන් අපහසායක් වූ බව පැවසූ විට, මුණිදාස උන්නැහේ මේ කවියේ තේරුම ‘‘අනෙක ප්‍රාණීහු තෘෂ්ණාවෙන් වැනසෙත්‘ යැයි එහි අරුත් පහදා දුන් බවත්ය. ‘අනේ පනේ තනේ වැනේ‘ දහම් ගැටයක් බව තවත් අදහසකි.

තිස්සකුට්ටි ද, වරප්‍රසාද ප්‍රශ්නයේ දී කිව්වේ ‘මම කුණුහරුප කිව්වේ නෑ. මම වල් නෑ. අහන ඔබලා තමයි කුණුහරුප හිතාගත්තේ‘‘ කියාය. මුනිදාස ගේ නිර්මාණශීලීත්වය හෝ සෝමවීර චන්ද්‍රසිරි ගේ කවිත්වය හෝ නිර්මාණශීලීත්වය තිස්සකුට්ටිගෙන් ලැබෙන්නේ නැත. ඇත්තෙන්ම ‘බටු, ගහල, පලා කතාව පාසල් දරුවන්ගේ බාලාංශ කුණුහරුපයකි.

සුසිල් ප්‍රේමජයන්ත හා රේණුකා හේරත්

කුණුහරුප හා ශික්ෂණය දැණුම පිළිබඳ ප්‍රකාශනයක්ද වන්නේය. පාසල් පොතක තියෙන කවියක් ගැන 2009 ජනවාරි හෝ ආසන්නයේ දිනක අධ්‍යාපන අමාත්‍ය සුසිල් ප්‍රේමජයන්ත සහ රේණුකා හේරත් මන්ත්‍රීතුමිය අතර කතාවක් සිදු වුණා. සුසිල් ප්‍රේමජයන්ත පැවසූවේ ‘‘පාර්ලිමේන්තුවේදී වත් ප්‍රකාශ කළ නොහැකි අසභ්‍ය වචන සහිත කවි පන්තියක් පාසල් පෙල පොතකින් ඉවත් කළ බවයි.

රේණුකා හේරත් මේ කවිය කුමක්දැයි අසනවා. සුසිල් ඇමතිතුමා එය කිව්වේ නෑ. නමුත් ඔබගේ දැනගැනීමට කවිය මෙයයි.

ගැබිණියකගේ තනපුඩුවක පැහැය උරා
පාවෙන වළාකුළු පවතී අහස පුරා
මිටියාවතේ මීදුම ගොඩ දෙපළු ඉරා
ඉගිලෙති කුරුළු හමුදාවෝ කැදලි කරා

සිංහල සාහිත්‍යය කන්නදැයි ඇසූ පාර්ලිමේන්තුවක, පසු කළෙක මේ කවිය අසභ්‍ය යැයි සිතූ සුසිල් ප්‍රේමජයන්ත අධ්‍යාපන අමාත්‍ය ධූර දරා ඇත.

චන්ද්‍රිකාට ‘බැල්ලී‘ කීම

විජය කුමාරතුංගට සම්බන්ධ නැක්සලයිට් විවාදයේ දී (1982.10.28) ලංකා පාර්ලිමේන්තුව කුණුහරුප වරුසා වැස්සේය. එදා ප්‍රේමදාස කිව්වේ ‘චන්ද්‍රිකා කුමාරතුංග අත්තනගල්ලේදී ජනාධිපතිතුමාට කතා කළේ ‘බල්ලා’ කියලයි. ඒ කතාව අසාගෙන සිටි අය කියන්න ගත්තා ‘අනේ මේ පර බැල්ලී කියන්නේ මොනවද?’ කියා. ලංකාවේ ජනවරමින් පත්වූ ජනාධිපතිවරයාට චන්ද්‍රිකා කතා කළේ ‘බල්ලා’ කියලයි. ජනතාවගේ ඉවසීමේ සීමාව ඉක්ම ගියාය කිව්වොත් මම හිතනවා කිසි කෙනෙක් මා සමඟ විරුද්ධ වන්නේ නැහැ කියා. (පාර්ලිමේන්තු හැන්සාර්ඞ් වාර්තා 1051-1052)

රාජ්‍ය තාන්ත්‍රික අර්බුදයක් උතුරේ යුද්ධයක් ඇති කළ අශ්ලීල වදන් භාවිතය

1977 මැතිවරණ වේදිකාවේ ආර්. ප්‍රේමදාස සිදු කළ කතා ද, පාර්ලිමේන්තුවේ විවාද ද, ඉන්දු ලංකා රාජ්‍ය තන්ත්‍රික සබඳතා පළුදුවීම පිළිබඳ බලපෑ ආකාරය ජේ.එන්.ඩික්සිට් ගේ කොළඹ භුමිකාව (Assignment Colombo) කෘතියේ දැක්වේ. (කමෙන්ටුව බලන්න) ප්‍රේමදාස ඉන්දිරා ගාන්ධි සහ ඇගේ පුතා සංජය ගාන්ධි හැඳින්වූවේ ‘එළදෙනයි – වහුපැටියයි‘ ලෙසිනි. ‘එහෙත් එළදෙනයි – වහුපැටියයි පරාදයි. මෙහෙත් එළදෙනයි වහුපැටියයි පරාදයි‘ කතාව සිරිමා – අනුර සම්බන්ධයෙනි.

1977 ඉන්දීය අගමැති මුරාජ් දේසායි සහ ජනපති සංජය රෙඩ්ඩි සමඟ ලංකාවේ ජනපති අගමැති සමීප සබඳතා පැවැත්වීය. දෙරටේ නායකයින් හමුවූ විට දෙරටේ පිළිගත් රාජ්‍ය නායක සම්බන්ධතාවලින් පරිබාහිරව බණ්ඩාරනායක හා ගාන්ධි ගේ පෞද්ගලික ජීවිත හා සම්බන්ධ උපහාස හා අපහාස කථා කිරීමට වැඩි කාලයක් ගත කර ඇත. ඒ සියළු තොරතුරු ඉන්දිරාට වාර්තා වී තිබූ අතර වසර දෙකකට පසුව නැවත ඉන්දිරා අගමැති ධූරයට පත් වූවේය.

මේ ශිෂ්ඨ නොවන කතා, ඉන්දු ලංකා සබඳතා කෙරෙහි බලපෑ ආකාරය ‘කොළඹ භුමිකාවේ‘ සවිස්තරව දැක්වේ. ඉන්දු ලංකා සබඳතා බිඳවැටීම හා ප්ලොට්, ඊරෝස්, එල්.ටී.ටී.ඊ. සංවිධාන බිහිවීම දැන් ඉතිහාසයට එක් වූ කතාවකි. (බලන්න. මලිත් ජයතිලක ගේ අලිමංකඩ පරාජයෙන් පසු ශ්‍රී ලංකාව හා ඉන්දියාව පි. 90 සහ කොළඹ භුමිකාව පිටුව 40 – 41)

මංගල සමරවීර

2017 දී මංගල සමරවීර සහ විමල් වීරවංශගේ බහුජන නිදහස් පෙරමුණ පාර්ලිමේන්තුවේ දී ඇවිලුනේ ‘තක්කඩියා‘ යන වචනය නිසාය. එයට ප්‍රතිචාර ලෙස මංගලට ‘පොන්නයා‘ යැයි අමතනු ලැබීය. සිය සමරිසි භාවය කිසිවිටෙක වසන් කිරීමට උත්සහ නොකළ මංගල පැවසූවේ ‘මිනීමරුවාට වඩා පොන්නයා ගෞරවනීයයි ! කියමිනි. මංගලට එදා දිගින් දිගටම බාධා ඇති වූ නමුත්, කථානායක කරු ජයසූරිය ගේ උපදෙස් ද නොතකමින් මංගල දිගින් දිගටම හැන්සාඩ් එකෙන් ඉවත් කළ වචනය පාවිච්චි කළේය. (ප්‍රංශයේ හෝටලයක වෙසක් දිනයේ ඩේසි ආච්චි සමඟ ගත කළ හෝටලයේ බිල සම්බන්ධයෙන් කතා කළේ ඒ දවසේය.)

මංගල සමරවීර තම සමලිංගික ලැදියාව රහසක් ලෙස තබා ගත්තේ නැත. එය එළිපිටම කිවේය. වරක් කැලණියේ ආචාර්ය මර්වින් සිල්වා මන්ත්‍රී සමඟ පැටළුණු මංගල, කොළඹ අවන්හලක දී මර්වින් ගේ පුතා ද සවසට සවසට තමන්ට හමුවන බව කීවේය. මර්වින් ගේ කට වැහුනේය.

මංගල තවත් වරක් පාර්ලිමේන්තුවේ සැබෑ කරදරකාරී මන්ත්‍රීවරයෙකු වූ ඒ.එච්.එම්. අස්වර් ගේ සමලිංගක කතාවකට ප්‍රතිචාර දැක්වූවේ ‘මට ඔබතුමා මීට අවුරුදු 25 – 30 කට පෙර හමුවුණා නම් සලකා බලන්න තිබුණා කියාය. මර්වින් සේම අස්වර් ද කට වහගත්තේය.

අප්‍රිකානු කළු පිරිමි කතාව

ක්‍රීඩා ඇමති එස්.බී.දිසානායකට විරුද්ධ විශ්වාස භංග යෝජනාවක දී මංගල සමරවීර සුසන්තිකා ජයසිංහ ගැන අශිලාචාර වදන් භාවිත කළේය. 1997 අවුරුද්දේ දී සුසන්තිකා ජයසිංහට විසින් එවකට ක්‍රීඩා ඇමති එස්.බී. දිසානායක තමන්ට ලිංගික බලපෑම් කළ බවට එල්ල වූ චෝදනාව පිළිබඳ විවාදයේ දී, එවකට මාධ්‍ය ඇමතිවු මංගල සමරවීර තම මිතුරු එස්.බී. බේරා ගැනීමට ‘අප්‍රිකානු කළු පිරිමියෙක් වගේ ඉන්න සුසන්තිකා ජයසිංහට ලිංගික බලපෑම් කරන්නේ කවුද ? ඔන්න මේ මම බලපෑම් කළා කිව්වා නම් පිළිගන්නවත් තිබුණා’ යන අදහස සහිත ගර්හිත ප්‍රකාශ සිදු කළේය. මංගල එදා නම් බොහෝ දෙනාගේ දැඩි විවේචනයට ලක් වූනා.

එස්.බී. ගේ ‘ඇඳුම් ගලවලා, ලන්කට් එක පිටින් පිස්සෙක් වගේ පිස්සෙක් වගේ‘ ජනාධිපතිවරයෙකු සම්බන්ධයෙන් සිදු කළ අශ්ලීන වූ ප්‍රකාශයකි. එය පාර්ලිමේන්තුවේ කියූවක් නොව මැතිවරණ වේදිකාවක කියූවක් ය.

2020 ඔක්තෝබර් ආසන්නයේ සමගි ජනබලවේගයේ උප සභාපතිනිය ලෙස සිටින අතර 20 වන ව්‍යවස්ථා සංශෝධනයට සහාය දුන් ඩයනා ගමගේ මන්ත්‍රීවරිය ‘දේශපාලන ගණිකාවක්‘ ලෙස සජබ නායකයන් විසින් හදුන්වා දෙනු ලැබීය. මන්ත්‍රී හර්ෂණ රාජපකාරුණා විසින් ඩයනා මස්කෑල්ලකට එහාට මෙහාට පණින ගණිකාවක් යැයි පවසූ නමුත්, 20 ට සහාය දුන් පිරිමි මන්ත්‍රීවරුන් කිසිවෙකුට ‘පිරිමි ගණිකාවෝ‘ හෝ ‘දේශපාලන ගණිකාවෝ ලෙස හදුන්වන්නේ නැත.

2021 ජනවාරි මස විපක්ෂ නායක සජිත් ප්‍රේමදාස සහ ආණ්ඩු පක්ෂයේ සංවිධානය ජොන්ස්ටන් ප්‍රනාන්දු පාර්ලිමේන්තුවේ ගැටුණි. එහි දී ජොන්ස්ටන් විපක්ෂ නායකට ‘පිස්සා‘ යැයි කියා එම වචනය ඉල්ලා අස්කර ගත්තේ ‘මම ඒ වචනය ඉල්ලා අස්කර ගන්නවා. හැබැයි, රනිල් (වික්‍රමසිංහ) කිව්වේ Bloody Fool කියලා යැයි කියමිනි.

පාර්ලිමේන්තුවේ අවලං කතා වාර්තාව අධිකරණය රු. 100 ට දැමූ ඇමති ගේ ගෞරවය

‘කාල්මාක්ස් යනු නඩු නැති කබල් පෙරකදෝරුවකු බව‘ හිටපු උසස් අධ්‍යාපන ඇමති අත්තනායක පාර්ලිමේන්තුවේ දී කීවේය. ‘ඇත්ත‘ කතාව ගැන කතුවැකියක් ලියමින් ඇමති අත්තනායක නැත්තටම නැති කළේය.

“අපට දුක අත්තනායක ගැන නොව ඔහු ගුරුවරයකුව සිටියදී ඔහුගෙන් ඉගෙන ගත් ළමයින් ගැන‘ යැයි ද,
“අත්තනායක තමුසේ ගොනා වුණාට උම්බෑ කියන්න එපා” යයි ද කතු වැකියේ විය.

ඇමති අත්තනායක මහතා ‘ඇත්ත’ට විරුද්ධව අපහාස නඩුවක් දමා ලක්ෂ ගාණක වන්දියක් ඉල්ලුවේය. අගවිනිසුරු නෙවිල් සමරකෝන් ගේ නඩු තීන්දුවේ මෙසේ සටහන් විය.

“ඇත්ත කර්තෘවරයා ද්වේෂයට ද්වේෂයෙන් පිළිතුරු දී ඇත. වෛරයට වෛරයෙන් කරුණු කියා ඇත. ඔහුට එසේ තරහින් කරුණු කියන්නට අයිතියක් ඇතත් පුවත් පතක් මඟින් අපහාස කරන්නට අයිතියක් නැත. ඒ නිසා අත්තනායක මහතාට අපහාස කිරීමේ වන්දි වශයෙන් රුපියල් 100 ක් ගෙවන ලෙස නියෝක කරමි. (සටහන මහින්ද අබේසුන්දර සිළුමිණ පුවත්පතට මෙය රු. 250 ක් යැයි ලියා ඇත. දඩය රු. 50 ක කතාව ද නිවැරදි නොවේ. ) නඩු තීන්දුවෙන් ඇමතිගේ කීර්තිය රු. 100 ට වැටුනේය. ඇත්ත නැවත වරක් අර පුවත පළ කර පාඨකයින්ගෙන් දඩය ගෙවන්නට ශතය බැගින් දායකත්වයක් ඉල්ලුවේය. ඇමති නැවත නැවත අපහාසයට ලක් වූවේය.

1977 – 1987 යුගයේ හත් – අට දෙනොගේ විපක්ෂය ත්, 1989 – 1994 විපක්ෂයත් ලංකාවේ සක්‍රීයම විපක්ෂය ලෙස සැලකෙන්නේ ය. මන්ත්‍රීවරුන් සභාවෙන් ඉවත් කිරීම, ගුටි කෙළ එන්නේ කුණුහරුප ද සමගය. පාර්ලිමේන්තුවේ දී විරුධවාදීන්ට බාධා කිරීමටම සැදී පැහැදි සිටින මන්ත්‍රීවරු නැතිවා නොවේ. ඒ.එච්.එම්.අස්වර්, මර්වින් සිල්වා අයත්වූවේ මේ ලැයිස්තුවට ය. අද පාර්ලිමේන්තුවේ ආණ්ඩු පක්ෂයේ ප්‍රමාණාත්මකව එවැනි කරදරකාරයින් වැඩිවී ඇත. දැන් පාර්ලිමේන්තුවේ කතානායක අණ නොතනක අබ උස්සාගෙන යන්නේ නැත. ආණ්ඩු පක්ෂය විපක්ෂයේ වැඩිපුරු කතාකරන මන්ත්‍රීවරයාට අතින් පයින් පහරදෙන්නටම පනී. කතානායක සිනා සෙමින් බලා සිටී. අනෙක් අතට, එයට මුහුණදීමට විපක්ෂය සංවිධානාත්මක හෝ උපක්‍රමශීලි නැත. පාර්ලිමේන්තුවේ බලහත්කාරයන්ට ඒකාබද්ධව මුහුණදීම අභියෝගය ජයගත හැකි මාර්ගයයි.

රජිත් කීර්ති තෙන්නකෝන්
දකුණු පළාත් හිටපු ආණ්ඩුකාර

Facebook Comments

wedding people