ආණ්ඩුව අභ්‍යන්තරයේ වැරදි අඩුපාඩු සිදුව තිබීම සත්‍යයක් බව ආණ්ඩුවේ හවුල්කාර පාර්ශවයක් ප්‍රකාශ කර තිබේ.
“ආණ්ඩුව ඇතුලේ වැරදි සිදුවෙලා තියෙනවා. ඒක ඇත්ත.ඒ වැරදි ආණ්ඩුවම බාර ගන්න ඕනෑ,“යැයි ජනවාරි 5 වැනි බදාදා කොළඹ දී මාධ්‍යවේදීන් හමුවූ ආණ්ඩුවේ හවුල්කාර පාර්ශවයක් වන ලංකා කම්කරු කොංග්‍රසයේ ප්‍රධාන ලේකම්, වතු නිවාස හා සමාජ සංවර්ධන රාජ්‍ය අමාත්‍ය ජීවන් තොණ්ඩමාන් පැවසීය.
ආණ්ඩුවේ පාර්ශවය නියෝජනය කරමින් නිතරම ආණ්ඩුවට, ජනාධිපතිට හෝ අගමැතිට දොස් පැවරීම නොකළ යුතු බවට තමන් විශ්වාස කරන බවද රාජ්‍ය ඇමතිවරයා ප්‍රකාශ කළේය.
ඇමෙරිකානු සංචාරයෙන් පසු යළි දිවයිනට පැමිණි මුදල් ඇමැති බැසිල් රාජපක්‍ෂ විසින් ප්‍රකාශ කර තිබුනේ හදිසි සහන ලෙස සෑම වතු පවුලකටම කිලෝග්‍රෑම් 01 ක් රුපියල් 80 බැගින් මසකට තිරිඟු පිටි කිලෝග්‍රෑම් 15 ක් ලබා දීමට පියවර ගන්නා බවය.
“මේ වැඩසටහන අපේ අමාත්‍යංශය හරහා කරගෙන යන්න තීරණය කර තිබෙනවා. මුකුත්ම නැතිව ඉන්න වෙලාවේ, මේකත් හොඳයි.ආර්ථිකව වැටිලා ඉන්න අපේ ජනතාවට යම් සහනයක්,“යැයි ද රාජ්‍ය ඇමැති ජීවන් තොණ්ඩමාන් මාධ්‍ය හමුවේ සඳහන් කළේය.
වතු කම්කරුවන්ගේ දිනෙක වැටුප රුපියල් දහසකින් වැඩි කිරීමට පඩි පාලක සභා කළ නිර්දේශයට එරෙහිව වතු සමාගම් අධිකරණ වෙත ගොස් තිබේ.
ලංකා කම්කරු කොංග්‍රස් නායකයා පවසන්නේ එම අධිකරණ තීන්දුව එන තෙක් වෘත්තීය සමිති ක්‍රියා මාර්ග දියත් කිරීම සුදුසු නොවන බවය.
ආණ්ඩුවේ ක්‍රියා කලාපය ප්‍රසිද්ධියේ විවේචනය කළ සුසිල් ප්‍රේමජයන්ත මන්ත්‍රීවරයා අධ්‍යාපන ප්‍රතිසංස්කරණ, විවෘත විශ්වවිද්‍යාල සහ දුරස්ථ අධ්‍යාපන ප්‍රවර්ධන රාජ්‍ය අමාත්‍ය ධුරයෙන් ජනාධිපති විසින් වහාම නෙරපා හරින ලදී.
Facebook Comments
