රාජ්‍ය ත්‍රස්තවාදය හා ජාතිවාදය යොදා ගනිමින් සුළුතර ජනතාව පීඩාවට පත් කරන ඉන්දීය අගමැතිවරයාගෙන් දෙමළ බස කතා කරන පීඩිතයන් යුක්තිය ඉල්ලා සිටීම නොකළ යුතු බවට නැගෙනහිර මුස්ලිම් දේශපාලන නියෝජිතයෝ අවධාරණය කර තිබේ.
“ඉන්දියාවේ දී මුස්ලිම්වරුන් මරා දමන, ජාතිවාදී අදහස් දරන අගමැති නරේන්ද්‍ර මෝඩිට දෙමළ කතා කරන ජනතාව යුක්තිය ඉල්ලා ලිපි යැවීම ලංකාවේ මුස්ලිම්වරුන්ට නිගරුවක්,“යැයි කාරතිව් ප්‍රාදේශීය සභා මන්ත්‍රී ඒ.ආර් බස්මීර් කියා සිටියේ අම්පාර දිස්ත්‍රික් පළාත් පාලන නියෝජිතයන් විසින් කල්මුණේ දී ජනවාරි 4 වැනිදා පැවැත්වූ මාධ්‍ය හමුවට එක්වෙමිනි.
නැගෙනහිර ජීවත්වෙන ජනතාව සමඟ සාකච්ජා නොකොට උතුරු නැගෙනහිර ඒකාබද්ධ කිරීමට තීන්දුවක් ගත හොත් විශාල ගැටුමක් ඇතිවීමේ අනතුරක් පවතින බව බස්මීර් ගේ අදහසවේ.
“අනුගාමිකයන් විසින් හොඳම නායකයා කියලා හඳුන්වන මුස්ලිම් කොංග්‍රස් නායක රවුෆ් හකීම් තනි තීන්දු නොගෙන පක්ෂයේ උත්තරීතර මණ්ඩලය රැස් කරලා මේ ගැන තීන්දු කරන්න ඕනෑ,“යැයි ද ඔහු පවසයි.
උතුරු නැගෙනහිර ඒකාබද්ධ කරන 13 වැනි ව්‍යවස්ථා සංශෝධනය මුළුමනින්ම ක්‍රියාත්මක කරන ලෙස දෙමළ බස කතා කරන පක්‍ෂ එක්ව ඉන්දීය අගමැතිවරයාට යැවීමට සකස් කර ඇති ලියවිල්ල සම්බන්ධයෙන් මෙම මුස්ලිම් දේශපාලන නියෝජිතයෝ විරෝධය දක්වති.
“දෙසැම්බර් 23 වැනිදා රැස්වුණු සමස්ත ලංකා ජනතා කොංග්‍රසයේ උත්තරීතර මණ්ඩලයේදී මේ ලියවිල්ලට සහාය දක්වා අත්සන් කරන්නේ නැහැ කියලා අපි තීන්දුවක් ගත්තා,“යැයි කල්මුණේ මහ නගර සභා මන්ත්‍රී ඒ.එච්.එම්.අබ්දුල් මනාෆ් මෙහිදී මාධ්‍ය වෙත කරුණු දක්වමින් පැවසීය.
එහෙත් සමස්ත ලංකා ජනතා කොංග්‍රසයේ නායක,පාර්ලිමේන්තු මන්ත්‍රී රිෂාඩ් බදියුදීන් දෙමළ කතා කරන පක්‍ෂ නායකයන් වෙත දන්වා තිබුනේ ඒකාබද්ධ ලියවිල්ල ගැන අධ්‍යනය කිරීමට කාලයක් අවශ්‍ය බවය.
ශ්‍රී ලංකා මුස්ලිම් කොංග්‍රසය ආරම්භ කිරීමට හේතුවූ ඉන්දු ලංකා ගිවිසුම යළි ක්‍රියාත්මක කිරීමට එහි වත්මන් නායක රවුෆ් හකීම් සකස් කරන ලියවිලි වල ඇතුලත් කරුණු ගැන නැගෙනහිර ජනතාව දැනුවත් කළ යුතු බව ද කල්මුණේ නාගරික මන්ත්‍රී මනාෆ් අවධාරණය කළේය.
අක්කරෙපත්තු නගර සභා මන්ත්‍රී එස්.එම්.සබිස් අනතුරු හඟවමින් කියා සිටින්නේ රහසිහතව සකස් කෙරෙන මෙම ලියවිල්ල ගැන ජනතාවට හෙළි නොකොට අත්සන් කළ හොත් නැගෙනහිර මුස්ලිම්, දෙමළ, සිංහල ජනයා එක් කරගනිමින් ඊට එරෙහිව උද්ඝෝෂණය කරන බවය.
Facebook Comments
