කඳුකර දෙමළ ජනයාගේ අනන්‍යතාව අහෝසි කර දැමීමට ආණ්ඩුවේ හවුල්කාර පක්‍ෂ උත්සහා කරන බවට චෝදනා එල්ලවී තිබේ.
“ලංකා කම්කරු කොංග්‍රසය විසින් කඳුකර ජනයාගේ අනන්‍යතාව විනාශ කිරීමේ සැකය වඩාත් තහවුරු වන්නේ රාජ්‍ය ඇමැති තොන්ඩමන් ගේ කතාවෙන්,“යැයි කඳුරට ජනතා පෙරමුණේ නායක, පාර්ලිමේන්තු මන්ත්‍රී වේලුසාමි රාධාක්‍රිෂ්ණන් පවසයි.
කඳුරට මාධ්‍යවේදීන් නුවරඑළියේදී සති අන්තයේ හමුවූ රාධාක්‍රිෂ්ණන් මන්ත්‍රීවරයා කියා සිටියේ කඳුකර ජනතාව ගැන කිසිම සඳහනක් නොකළ ජනාධිපතිගේ පාර්ලිමේන්තු කථාව ලංකා කම්කරු කොංග්‍රසයේ නායකයා විසින් සාධාරණය කර ඇති බවය.
මෙරට ජාතියක් ලෙස කඳුකරයේ ජනතාවගේ අනන්‍යතාවය ලාංකික යැයි වතු යටිතල පහසුකම් හා සමාජ සංවර්ධන රාජ්‍ය ඇමැති ජීවන් තොණ්ඩමාන් ජනාධිපතිවරයාගේ ප්‍රතිපත්ති කතාව ගැන විවාදයට එක්වෙමින් ජනවාරි 21 වැනිදා පාර්ලිමේන්තුවේදී ප්‍රකාශ කර තිබේ.
“අපි වෙනම ඉන්න ගියොත් අපිට මොන රටකට වත් යන්න බැහැ. ඒ හින්දා අපි ලාංකිකයෝ කියන්න මම නම් කැමතියි. පොදුවේ ලාංකිකයෝ ගැන ජනාධිපතිතුමා එයාගේ කතාවේ කිව්වේ. අපේ කඳුකරේ ජනයාට ප්‍රශ්න තියෙනවා ඒ ගැන අපිට අවබෝධයක් තියෙනවා. ආර්ථික හා දේශපාලන ප්‍රශ්න එක්ක කොරෝනා ප්‍රශ්න මැද්දේත් මේ ආණ්ඩුව කඳුකර ජනතාවට වෙනසක් කරලා නැහැ,“යි ලංකා කම්කරු කොංග්‍රස් නායකයා සඳහන් කළේය.
කඳුකරයේ දෙමළ ජනයා මෙරට ජිවත්වන වෙනම අනන්‍යතාවය සහිත ජන කොටසක් බව පෙන්වා දෙන කඳුරට ජනතා පෙරමුණේ නායක රාධාක්‍රිෂ්ණන් කියා සිටින්නේ ඒ අනන්‍යතාවය රැක ගැනීම කඳුකර ජනයාගේ වගකීමක් බවය.
“රජයේ රැකියා වලට බඳවා ගැනීමේදීත්, විශ්ව විද්‍යාලයට ඇතුල් කර ගැනීමේදීත්, කඳුකරයේ දෙමළ ජනයාට වෙන්වූ කෝටාවක් දශක ගණනාවක් තිස්සේ ක්‍රියාත්මක වෙනවා. ඒකට උපකාරී වෙලා තියෙන්නේ කඳුකර දෙමළ කියන ජාතික අනන්‍යතාවය. මේක නැති බංග කරන්න කාටවත් ඉඩ දෙන්න බැහැ,“යැයි රාධාක්‍රිෂ්ණන් අවධාරණය කරයි.
Facebook Comments
