දිනෙන් දින ශ්‍රී ලංකාවේ ආර්ථිකය පිරිහෙන සමයක රට හැර දමා යෑමට උත්සාහ කළ බවට සැක කෙරෙන ශ්‍රී ලාංකිකයන් පිරිසක් උපන් බිමේම රඳවා ගන්නට ශ්‍රී ලංකා නාවික හමුදාව පියවර ගෙන තිබේ.
නීති විරෝධී ලෙස මුහුදු මාර්ග ඔස්සේ ඔස්ට්‍රේලියාවට සංක්‍රමණය වීමට උත්සාහ කළ බවට සැකකෙරෙන පුද්ගලයන් පනස් එක් දෙනෙකු ජුලි 03 වනදා අත් අඩංගුවට ගත් බව නාවික හමුදාව පවසනවා.
නාවික හමුදාව පවසන පරිදි ත්‍රිකුණාමලයට ඔබ්බෙන් වූ මුහුදේදි අත් අඩංගුවට ගත් පිරිස අතර ජාවාරමට සම්බන්ධ පුද්ගලයන් හය දෙනෙකු ද ඇතුළුව පිරිමි පුද්ගලයන් 41 ක්, කාන්තාවන් 05 ක් සහ ළමුන් 05 ක් සිටි.
ඔවුන් වයස අවුරුදු 05 ත් 56 ත් අතර වයසේ පසුවන යාපනය, වව්නියාව, ත්‍රිකුණාමලය, මඩකලපුව, අම්පාර, ගම්පහ සහ රත්නපුර යන ප්‍රදේශවල පදිංචිකරුවන් බව නාවික හමුදාව හඳුනාගෙන ඇත.
අත්අඩංගුවට ගත් පිරිස ඉදිරි නීතිමය කටයුතු සඳහා ත්‍රිකුණාමලය වරාය පොලිසිය වෙත භාරදීමට නියමිත බවයි නාවික හමුදාව නිවේදනය කරන්නේ.
මේ අතර ශ්‍රී ලංකා නාවික හමුදාව, ශ්‍රී ලංකා වෙරළාරක්‍ෂක දෙපාර්තමේන්තුව සහ පොලිසිය එක්ව මාරවිල ප්‍රදේශයේ ජුලි 02 සෙනසුරාදා කළ සෝදිසි මෙහෙයුමක දී ලැගුම්හලක සැකසහිත ලෙස රැඳී සිටි පිරිමි පුද්ගලයන් 08 ක්, කාන්තාවන් 06 ක් සහ ළමුන් 10 ක් ඇතුළු 24 දෙනෙකු සමග ලැගුම්හලෙහි හිමිකරු අත්අඩංගුවට ගෙන ඇත.
එම පිරිස නීති විරෝධීව මුහුදු මාර්ගයෙන් මෙරටින් විදෙස් රටකට සංක්‍රමණය වීමට සිටි බවටයි සැක කෙරෙන්නේ.
මඩකලපුව, වාලච්චේන සහ හලාවත යන ප්‍රදේශවල පදිංචිකරුවන් බවට හඳුනාගෙන ඇති එම පිරිස ඉදිරි විමර්ශන කටයුතු සඳහා මාරවිල පොලීසිය වෙත භාර දී තිබේ.
Facebook Comments
